Osia 12 - Bible

¹ Eezuɛ a vãai kpɛ̂i a ɣele láa-ƃoɔɔ su kôyaa. M̀ɛnii kélee da gɛ̀i gáa nɔ́ kpɛ́ni-kpɛni. Da lɛ́ɛ-mɛni támaa kpɛ̀tɛ, díkɛ ŋwana-lɔ̂ɔ kɛ̀, díkɛ lawoi-laa kɛ̀ da Asiria lɔii, díkɛ ŋɔ́nɔ lì a wúlɔ Ize-lɔii su a sama-sɛŋ.

² Yâwɛɛ a mɛni ƃôi a Zuda-ƃelai láa. A pâi tɔ̂ŋ kpɛ̂i Eezuɛ-ƃelai dîa yɛ̂ɛ berei dítûa-pere káa lai.

³ Dílɛɛ pâi Zeeka da ǹîa maa-sɔlɔ ƃôi, è ǹîa túme sòŋ. Tãi è kɛ̀tɛ lai da Ɣâla dí kɔrɔ-ma kɔ̀.

⁴ Da ŋ̀âla taa-kelai dí kɔrɔ-ma kɔ̀ é ǹyée mɛi ɣále é wɔ́lɔ Ɣâla ma, Ɣâla é lûwa láa ma. Da Ɣâla dí kòyaŋ Bɛtɛ. Ǹaa ƃé Ɣâla è lòno naa bɔ́.

⁵ Ńyãa ƃa Yâwɛɛ, Ŋ̀wála-wâla kélee Ɣalai.

⁶ “M̀ɛni ma, Íɣâlai ŋɔwála-wala-laai su, pá pôlu bɔ́, íwɛli-kɛ-maa da tɔ̃yâ-laa soŋ a gbanaŋɔɔ í Íɣâlai maa kpɛ́ŋ a tãi kélee.”

⁷ Bɔni-tɔɔ-nuui nyii sɛŋ-kɔ̂ɔŋ-sɛŋ nyɔ́mɔɔ káa ǹyêei, è wɛ́lini a m̀arâai filiɛɛ.

⁸ Eezuɛ è mò ǹyɛɛ, “Ńdɔɔ̂i, ŋa tɔɔ-sãa támaa sɔlɔ ƃó. Núu da fa pɔ̂ri kɛ̂i ǹyɛɛ ŋá ŋátɔɔ-sãai sɔlɔ ƃô a fili-pere.”

⁹ Ńyãa ƃa Yâwɛɛ, Káɣâlai, nyii kákùla Ize-lɔii sui. Ŋa pâi ŋɔ́nɔ gɛ̂i ká kɛ́ ǹyii ƃûu mu yɛ̂ɛ berei ká gɛ̀ la vɛ̃ɛ-kpâlaŋ su tãi ŋá pà la kápɔi.

¹⁰ “Ŋá lòno ŋálono-kɛ́-ƃelai pɔ́. Ŋá díkɛ dí pili zĩ̂a su, dí sɛŋ támaa káa. Dísârai, ŋá ŋánûai lia-wôo ƃò.

¹¹ Sɔnyɔ̂ŋ káa niî Gilia lɔii su. Ǹaa-ƃela kélee su a pâi karâi. Díkaa niî niŋa-sîrɛ-ŋa kulâi a sâla Geega taa-leei su, ǹyaŋ dísâla kula kwaa-ŋai ma ɣala teƃele-ŋai da pâi wôloi dí táa-tâa.”

¹² Kúnuu-pɔlɔi Zeeka è pù é lí Mɛsopotamia. Ǹaa ƃé è tíi kɛ̀ naa ŋɔnɛnîi mɛni ma a taa-tulɛ mɛi káa.

¹³ Yâwɛɛ è Eezuɛ-ŋai kùla Ize-lɔii su ŋɔlóno kɛ́-nuui sârai, é ŋɔ́nɔ dímɛi káa ŋɔlóno kɛ́-nuui sârai.

¹⁴ Eezuɛ-ŋai da Yâwɛɛ líi ŋwána a gbɛɛ pôlu. Ǹɛ̂lɛɛi dí sáa. Yâwɛɛ a pâi tɔ̂ŋ kpɛ̂i dîa m̀áa-kula-maai mɛni ma dí gɛ̀ lai.