Osia 11 - Bible

Ɣâla ŋɔwɛli kɛ́-maai ŋɔnûai mɛni ma

¹ Tãi Eezuɛ è kɛ̀ la a lôloŋ, ŋá ŋ̀wɛli, ǹyaŋ ŋá ńoŋ tòli ŋá gula Ize lɔii su.

² Berei nɔ́ ŋá kɛ̀ dítôlii lai, bere nɔ́ ƃé dí kɛ̀ dípôlu fêi la ḿî. Dí kɛ̀ nɔ́ sâla kulâi díɣâlai Bêe-ŋai dîa, dí kɛ́ sɛŋ kúŋ-nɛ̃ɛ kèreŋ dí Ɣâla pɔkɔɔŋ-ŋai dîa.

³ Ńyãa ƃé sia-pere lɛ̀ Eezuɛ-ŋai dîa ŋá dísee ńyee tɔ̃ɔi. Kɛ́lɛ dífe díyee see ní ḿû a gɛɛ ńyãa ƃé dí kùla zu.

⁴ Ŋá lì a dia maloŋ-kâa da wɛli-kɛ-maa pere su. Ŋá díkɔŋ ma-kpɔnɔi kùla díkɔŋ ma, ŋá díkɔ a mii-sɛŋ.

⁵ “Da pâi liî pôlu Ize-lɔii su. Asiria ƃé pâi kɛ̂i a díkâloŋ, kpɛ́ni fêi, dífe ŋ̀wɛ̂lii dí lene pôlu ḿbɔ naa-pere.

⁶ Ƃóa-sɔkpɔ a pâi dítaa-lêe-ŋa maa tínaŋɔɔ a siɣãŋ su karâi, é ŋánûai páa dítua-pere nyɔ̂ŋ-ŋai mɛni ma.

⁷ Ŋánûai ŋuŋ su kpanaŋɔ̂ɔi. Díkaa nɔ́ liî díkpîŋ-kwaa-ŋa ma. Da pâi kɔŋ-ma-kpɔnɔ toôi díkɔŋ ma. Da pâi kɛ̂i wɔ̂lɔi kpɔŋ maa mɛni ma kɛ́lɛ núu da fé pâi kɛ̂i naa é gula díkɔŋ ma.

⁸ “Óo Eezuɛ, ŋa pâi ńyee kulâi léŋ ímu? Óo Eezuɛ ŋa pâi teêi yâ lé-mɛni ma? Ŋá pɔ̂ri tuâi a yá yɛ̂ɛ berei ŋá gɛ̀ la a Adama kpaa máŋ yɛ̂ɛ da Zeboŋ taa-lee-ŋai? Fa pɔ̂ri nyíŋi kɛ̂i. Ŋáwɛli kɛ́-maai káa nɔ́ kámɛni ma.

⁹ Fé pâi íkula-maa kɛ̂i yɛ̂ɛ berei ŋálii-ŋwânai káa lai. Fé pâi Eezuɛ su karâi ŋɔ́nɔ, kpɛ́ni fêi, ŋ́gaa a Ɣâla, fé a núu-kpune. Ńyãai a Ǹúu-maa Waai ŋ́gaa kásama. M̀ɛni ma fé pâi pâi ŋá ǹaa kara.

¹⁰ “Da pâi pîlanii ḿbôlu ńyãa Yâwɛɛ. Ŋa pâi kpêɣei yɛ̂ɛ yala-sulu. Oweei, ŋa pâi kpêɣei, ǹyaŋ ńônii da pâi kɛ̂i kpɛ̃linii dí kɛ́ kùla vóloi liî-pere.

¹¹ Da pâi kɛ̂i kpɛ̃linii yɛ̂ɛ ŋɔni-ŋa, díkɛ kula Ize lɔii su, da-ni dí kúla Asiria lɔii su yɛ̂ɛ tòloŋ-ŋa. Ŋa pâi pâi a dia pôlu dípɔ-taai tɛi-tɛi. Ńyãa Yâwɛɛ ƃé nyíŋi ƃôi.”

Yâwɛɛ è Eezuɛ da Zuda dímɛnii ŋáa tèe

¹² Eezuɛ a lɛ́ɛ kɛ́ ḿâ. Eezuɛ a ḿbɛlɛ̂i. Kɛ́lɛ Zuda-ƃelai díkaa nɔ́ niî ŋ́gbɔarâi ńyãai a gili-kɛ-zu Ɣala Maa-Waai.