Osia 10 - Bible

¹ Eezuɛ è kɛ̀ yɛ̂ɛ ƃá kpɔmɔ-kpalaŋ nyii a ƃâ a dámaai. Berei nɔ́ a ƃâ lai, bere nɔ́ ƃé a ŋɔɣâla-teƃelei dámaa tɔ̀ɔ la. Berei nɔ́ ŋɔlɔii ƃûu a ƃô lai, bere nɔ́ ƃé a ŋɔɣâla-fɛli kwaai ma kpɛ̀tɛ la a ǹɛ́lɛɛ.

² Dílii su nyɔ̂mɔɔi Ɣâla mɛni ma. Da pâi dísɔnyɔ̂ŋ vela-fei sɔlɔ ƃôi. Yâwɛɛ a pâi díɣâla fɛli-teƃele-ŋai wôloi, é díɣâla-pɛrɛ-ŋai wólo.

³ Da pâi môi dîyɛɛi, “Kâloŋ fé kúyêei, kpɛ́ni fêi, kúfa yâo Yâwɛɛ ma. À kɛ̀ kpîŋ kâloŋ à kɛ̀ kúyêei, lé ƃé a pɔ̂ri gɛ̂i kûɛ?”

⁴ Da lôno nɔ́ kpɛ́ni-kpɛni dí kɛ́ kono-têe kɛ̀ a foo-wôo kpɛ́ni-kpɛni. M̀aa mɛ̂ni ma, mɛni ŋá-teeɛɛ a nyɔ́mɔɔ káa dísama yɛ̂ɛ kala nyɔ́mɔɔ a kùla kpâlaŋ ŋá.

⁵ Sameria-ƃelai kpaaŋɔ̂ɔi díkɛ kpɛ̃liŋ díɣâla niŋa-loŋ pɔkɔɔŋ mɛ̂ni ma Bɛtɛ taa-leei su. Ŋɔnûai da pâi wɔ̂lɔi mɛ̀ni ma. Ŋɔɣâlai ŋɔsâla láa-soŋ-ƃelai da pâi gbêɣe toôi mɛ̀ni ma, kpɛ́ni fêi, ƃaa kɛ́-maa fé ŋɔ́nɔ mà.

⁶ Díkpɔara-ƃelai da pâi liî a bɔkɔɔ̂ŋ ŋí a sama-sɛŋ gâloŋ kɛ́tɛi pɔ́ Asiria lɔii su. Eezuɛ a pâi ŋumɛ̂i ŋɔniŋa-loŋ pɔkɔɔŋ ŋí fɛli mɛni ma.

⁷ Sameria kaloŋ su a pâi karâi yɛ̂ɛ wuru-kalaŋ a tɛ̀ yá ŋá.

⁸ Eezuɛ-ŋai dí lɛ́ɛ ɣala-fɛli kwaa-ŋai ma ƃɛ́i da sɔnyɔ̂ŋ kɛ̀ naai su a pâi karâi. Kala a pâi tɛ̂i díɣâla teƃele-ŋai dîa. Da pâi môi ǹyée kpaya-kpayai dîa, “Ka kúloo,” dîyɛɛ bɛlɛ-pɛlɛɛi dîa, “Ka tòo kûa.”

Yâwɛɛ è Eezuɛ ŋɔmɛnii ŋá tée-mɛni ƃò

⁹ Yâwɛɛ è mò ǹyɛɛi, “Óo Eezuɛ-ŋa, ká sɔnyɔ̂ŋ kɛ̀ tãi ká kɛ̀ la Giƃia taa-leei sui. Kákaa nɔ́ niî gɛ̂i. M̀ɛni ma, da pâi kɔ́ pɛlɛ̂i kâa Giƃia.

¹⁰ Ŋa pâi pâi ŋá zɔnyɔ̂ŋ-ƃelai kula-maa kɛ́. Ǹɔii-ŋuŋ-ŋai da pâi díwoo kɛ̂i zu tɔnɔɔ dí kɔ́ pɛ́lɛ dîa dísɔnyɔ̂ŋ-ŋai mɛ̂ni ma.

¹¹ “Eezuɛ è kɛ̀ yɛ̂ɛ niŋa nyii ŋ̀áa kɔŋɔɔ̂i, gɛ́ tíi fii-kpɛ̂ɛ kɛ̀. Kɛ́lɛ ŋá gbɛ̀tɛ a gɛɛ ŋá kɔŋ ma-kpɔnɔ too gɔŋ ma. Zuda ŋɔtíi ƃa é ǹɔii síŋ, Zeeka ǹyaŋ é pɔ̂rɔ wólo é zu táa-tâa.

¹² Ka tɔ̃yâ kɔ́ri. Gáa yɛ̂ɛ sí-sɛŋ kao lɛ́lɛɛ síɣɛɛ ká kpâlaŋ ŋá. Ka tɔ̃yâ mɛni kɛ̀, ka pâi ƃɛlɛ-sêe sɔlɔ ƃôi ńyêei. Gáa yɛ̂ɛ sí-sɛŋ lɛ́lɛɛ ḿba kuláa. Ka ńyãa Yâwɛɛ ḿvɛ̀li, ŋa pâi lûwa toôi kâa ŋá ká ƃálo. A pâi kɛ̂i yɛ̂ɛ tuna nyii pâi pûi ká sí-sãai dîa a gɛɛ dí ƃɔ̀lɔ.

¹³ Ká sɔnyɔ̂ŋ sì, ka m̀á kúla a wôya-mɛni. Ka kálɛɛ kɛ́ɛi m̀á miî. “Kpɛ́ni fêi kákili tɔɔ̂i kákpîŋ wala-wala-laai ma da kákɔ kɔ́-ƃelai.

¹⁴ M̀ɛni ma da pâi kɔ́ toôi kâa, dí kátaa-ŋai wólo, yɛ̂ɛ berei Saama è Bɛtavɛ wòlo la tãi dí kɛ̀ kɔ́ kɔ̂i lai. Dí gɔ̃ɔlee-ŋai pàa a nyɔ́mɔɔ da dílônii.

¹⁵ Óo Eezuɛ ŋɔpɛ́rɛi mu-ƃelai, m̀ɛni tɔnɔi tí a pâi kɛ̂i a káa ká ŋwana-lɔ̂ɔ kɛ́tɛi mɛni ma. Eezuɛ kaloŋ a pâi saâi a gɔ́i kɔ́ɔ pîlaŋ tãi.”