Nwun mąąɓo 4 - Bible

Dibora da Bara dí Eezuɛ ŋuŋ-ma ƃò

¹ Ɛwuu kɛ́ɛ a sàai, Eezuɛ-ŋai dí ŋɔ́nɔ Yâwɛɛ wóo pìli.

² Nya ƃe Yâwɛɛ è kùla dípôlu é gɛ́ Keena Kaloŋ Zaƃiŋ é díyee mɛi ɣále. Zaƃiŋ seɛ́ɛ è kɛ̀ Azɔ taa leei su gɛ́ gâloŋ laai kɛ̂. Zaƃiŋ ŋɔkɔ-kuluƃa kɛ́tɛi láa ƃé kɛ̀ a Sisela. Sisela seɛ́ɛ è kɛ̀ Alosɛi Agoyiŋ taai su. Daai ŋí fé a Zûu-ŋai dí taai da.

³ Kɔli kɔkɔ keleŋ ŋuŋ lɔ́ɔlu mɛi náaŋ ƃé kɛ̀ Zaƃiŋ yêei. Zaƃiŋ è kɛ̀ Eezuɛ-ŋai mɛi a kóraŋ buu feerɛ. Góraŋ-ŋai tí yée mu, è dísòŋ kpɔ́ a ŋwana lɔ̂ɔ pere, é mɛni nyɔ́mɔɔ támaa kɛ́ a dia. Gɛ́ɛ tíi, Eezuɛ-ŋai dí ŋɔ́nɔ wɔ̀lɔ Yâwɛɛ ma a gɛ́ɛ é kpɔ́ŋ mâa tɛɛ dípɔ.

⁴ Maa tãi tí ma, nɛnî tɔnɔ è kɛ̀ naa ǹáa ƃé kɛ̀ a Dibora. Dibora ŋí è kɛ̀ a Ɣâla ŋɔlóno kɛ́-nuu. Ŋɔsurɔ̂ŋ láa ƃé kɛ̀ a Lapidɔ. Dibora è kɛ̀ a mɛni-saa ƃó-nuu Eezuɛ-ŋai mɛni ma a tãi tɔnɔi ŋí.

⁵ Dibora a kâa kɛ̀ mɛni-saa ƃôi tóu-wuru tɔnɔ da mu. Dóu wurui ŋí è kɛ̀ Lama da Bɛtɛ loai ǹyée lɔii su Ifiraŋ kpiniŋ su. Naa ƃé Eezuɛ-ŋai da kâa lì naa a gɛ́ɛ Dibora é dímɛni-ŋai su káa.

⁶ Ɣele tɔ̂nɔ da è Bara worɛ̂ tɛ̀ɛ. Bara ǹâŋ láa ƃé kɛ̀ a Aƃiaŋ. Aƃiaŋ è kùla Kedɛ taa leei su Nɛfɛtɛli lɔii kpiniŋ su. Bara páai, Dibora è mò ma ǹyɛɛ, “Yâwɛɛ nyíi gáa a Eezuɛ-ŋai Díɣâlai è mò ǹyɛɛ, ‘Kɔ-kûluƃa wála puu kúla Nɛfɛtɛli da Zɛbulɔŋ ni dínuu-suui su í tɔ́ɔ dítuɛ í lí a dia Tabɔ Yeei ma.

⁷ Ŋa pâi pâi a Zaƃiŋ ŋɔkuluƃa kɛ́tɛi Sisela pɔ́ naa a gɛ́ɛ ka dîa-ni ká kɔ́ kɔ́ Kisoŋ Ya-leei kɔlɛ. A pâi pâi a ŋɔkɔ́ kɔ́-keleŋ-ŋai da ŋɔkɔ́ kɔ́-ƃelai kélee, kɛ́lɛ ya pâi díyee mɛi ɣâlei.’ ”

⁸ Nya ƃe Bara è Dibora wóo su tòo ǹyɛɛ, “Ŋa pâi nɔ́ fâai a gɛ́ɛ ŋá lí à kɛ̀ kwa yá kwa lì. Kɛ́lɛ à kɛ̀ ífe liî, gɛ̀ ní ńyaŋ fé pâi liî.”

⁹ Dibora è mò Bara ma ǹyɛɛ, “Owoei, kwa yá kwa pâi liî, kɛ́lɛ ífe pâi gɔ́i ŋí ǹaa maa tɛ̂ siɣêi, kpɛ́ni fêi, Yâwɛɛ a pâi gɛ̂i nɛnî é Sisela sòŋ.” Naa kɛ́ɛ tíi, Dibora è mù sìɣe da Bara dí lí Kedɛ.

¹⁰ Bara è nâa kɔ-kuluƃa wála puu tòli nyii-ŋai kùla Nɛfɛtɛli da Zɛbulɔŋ suu sui. Dí lɛ̀ɛ bôlu da Dibora ni dí lí.

¹¹ M̀ɛni-ŋai ŋí dí lɛ́ɛ pâi kɛ̂i, nalôŋ tɔnɔ da nyíi da kâa kɛ̀ ma Ɛƃa nyíi kɛ̀ a Keena-nuui è kòloŋ é kúla m̀arâa Keena-ŋai sáma é ŋɔƃûui tɔ́ɔ Kedɛ kɔlɛ ma ôo wurui mu nyíi kɛ̀ Zanani. Keena-ŋai díkɛ̀ a Oba nuu-suui su-ƃelai nyíi kɛ̀ a Mose m̀ɔ̂lɔ suui su-ƃelai da.

¹² Sisela kɛ́ɛ a m̀ɛni a gɛ́ɛ Bara ni dí lì Tabɔ Yeei mai,

¹³ è ŋɔkɔ́ kɔ́ keleŋ ŋuŋ lɔ́ɔlu mɛi náaŋ sìɣe da ŋɔkɔ-kuluƃa-ŋai kélee é kúla a dia Alosɛ é lí a dia Kisoŋ Ya-leei kɔlɛ.

¹⁴ Dibora è mò Bara ma ǹyɛɛ, “Lí, kpɛ́ni fêi, Yâwɛɛ káa ítuɛ gɛ́ lì a yá! A pâi sâa gɛ̂i í Sisela yée mɛi ɣále.” Bara da ŋɔkɔ-kûluƃa wála puui dí ǹyéei yèŋ.

¹⁵ Bara kɛ́ɛ da ŋɔkɔ-kûluƃa-ŋai da pɛlɛ Sisela mai, Yâwɛɛ è gɛ̀ Sisela da ŋɔkɔ-kûluƃa-ŋai kélee dí kɛ́ wúlee. Sisela è kùla ŋɔkɔ́ kɔ́-keleŋ su é pɛ́lɛ pûi.

¹⁶ Bara da ŋɔkɔ-kuluƃa-ŋai dí nâa pɛ̀lɛ Sisela ŋɔkɔ́ kɔ́ keleŋ-ŋai da ŋɔkɔ-kuluƃa-ŋai kpɛ̂i é lɛ́ɛ la zu dí seri Alosɛ. Dí Sisela ŋɔkɔ-kuluƃa-ŋai kélee pàa. Dítɔnɔ da kpîŋ fé lɛɛ ní.

¹⁷ Lawoi-laa è kɛ̀ Azɔ Kaloŋ Zaƃiŋ da Keena nuui Ɛƃa díkaayɔɔ-ŋai loai. Nya ƃe Sisela è pù é lí Keena nuui Ɛƃa ŋɔnɛnîi Zaɛɛ ŋɔƃûui lá.

¹⁸ Zaɛɛ kɛ́ɛ a Sisela káai, è lì é kpulɔ̂ŋ ma. È mò ma ǹyɛɛ, “Ǹalôŋ, ye pá ŋáƃûui mu. Ífe yào!” Sisela è lì é lɔ́ m̀ûui mu. Ǹɛnîi è ǹoo zeɣei mu.

¹⁹ Naa kɛ́ɛ tíi, Sisela è mò ma ǹyɛɛ, “Kpera yɛ̂ɛ yá fé ḿî ŋá gbele. Kpele wɛ̂li támaa káa ḿâ.” Ǹɛnîi è zua-kɔlɔ gònoŋ lá ƃò é niŋa ŋíni-ya kula zu é dɛɛ bɔ́ é gbele. Gɛ́ɛ a gbèlei, ǹɛnîi è ŋɔ́nɔ ǹoo pôlu.

²⁰ Naa kɛ́ɛ tíi, Sisela è mò ma ǹyɛɛi, “Tɔɔ m̀ûui lá-ƃêrei. À kɛ̀ núu da a ḿaa mare kɛ́ɛ kɛ̀ yâ, ye m̀ó maa nûui ma a gɛ́ɛ ḿve ƃɛ́.”

²¹ Gɛ́ɛ tíi, Sisela è pɛ̀lɛ, ma, kpɛ́ni fêi, víi è kɛ̀ kpɛɛ̂i a ŋ̀ánaa. Zaɛɛ è gɔ̀lɔŋ a gɛ́ɛ Sisela è kɛ̀ nyîi. Nya ƃe è gbɔ́-kpɔi da m̀ûui pîlaŋ wuruii síɣe é lí la sĩi-sĩi é gbamo ŋ̀uŋ ma é ƃɔ́ zu é pîlaŋ ǹɔii ma é sáa.

²² Bara páa gɛ́ Sisela kɔrii, Zaɛɛ è lì é m̀ó mà ǹyɛɛ, “Pá ƃɛ́! Ŋa pâi ǹalôŋ lɛ̂i ya íkaa gɔ̂rii.” Bara da ǹɛnîi dí lì é Sisela káa gɛ́ ƃò lâani a boma bɛ́rɛ pîlaŋ wuruii kpamoɔ́ɔ ŋuŋ ma a tɛɛ ŋ̀uŋ su a pîlaŋ ǹɔii ma.

²³ Ǹyaŋ ŋ̀elei ŋí ƃé Ɣâla è gɛ̀ la Eezuɛ-ŋai dí Keena Kaloŋ Zaƃiŋ yée mɛi ɣále.

²⁴ Eezuɛ-ŋai dí lɛ̀ɛ kpɔ́ kɔ̂i Keena Kaloŋ Zaƃiŋ pɔ́ é lɛ́ɛ la zu dí zu-kara.