Nehemi 6 - Bible

Nûa dí gbɛ̀tɛ a gɛɛ dí mɛni ŋánaa kɛ́ a Niɛmaya

¹ Saŋbala, Tobaya, Arebi nuui Gɛsɛŋ da kúkpɔara-ƃelai kpéli-ŋai dí mɛ̀ni a gɛɛ kwa kpɛɛ ziɣãŋ tɔ̂ɔ ma pôlu, ǹaa da fé lɛɛ ní. M̀ɛnii nɔ́ lɛ̀ɛ a gɛɛ kú gɛ́i ƃé kɛ̀ a gbôŋ-ŋai sɛ̂lɛŋ mɛni ziɣãŋ lá a tɛ̀ɛ-ŋa.

² Nya ƃe Saŋbala da Gɛsɛŋ dí worɛ̂ tɛ̀ɛ mî a gɛɛ kwa dîa ni kú kɔyɛ̂ŋ gbanâŋ-ŋai da lá Ono tiŋ-tiŋ su. Dí gbɛ̀tɛ a gɛɛ dí mɛni ŋánaa kɛ́ a ńyãa pere sîi da su.

³ Ŋá díworɛ̂ wooi ŋá pène ńyɛɛ dîai, “Ŋá tíi maa mɛ̂ni kpanaŋɔ̂ɔi kpɔ́ ḿâ. Fa pɔ̂ri gɛ́ mɛni kperâi a gɛɛ nɔ́ ŋá ká káa.”

⁴ Dí ŋ̀orɛ̂ woo tɔnɔi ŋí tɛ̀ɛ ḿbɔ naa gîei náaŋ a gɛɛ ŋá lí kwa dîa ni kú kɔyɛ̂ŋ. Berei nɔ́ ŋá díworɛ̂ wooi ŋá pène la a maa ŋuŋ, bere nɔ́ ƃé ŋá gbéli-ŋai ŋá pène la. Fé wɔ́lɔ lì ní dítoli wooi dɔnɔ kpîŋ ma.

⁵ Ǹaa pôlu ma, Saŋbala è ǹyée mu nuu tɔnɔ tɛ̀ɛ ḿbɔ naa a kɔlɔ. Kɛ́lɛ vé gɔlɔi ŋí too-ni kɔlɔ tâai. Díworɛ̂ wooi ǹɔ́ɔlu ɣelei ká kɛ̀ ŋí.

⁶ Gɔlɔi kpîŋ wóoi ká ŋí: “Gɛsɛŋ a m̀ó ḿâ a gɛɛ kú kɔlɛ maa lɔii ŋuŋ-ŋai su ƃela da mɛni saâi é pîlaŋ kâa. Da m̀ôi a gɛɛ káai a Zuda-ŋai kà ŋ̀wɛ̂lii ká tɔ́ɔ ǹɔii kâloŋ kɛ́tɛi ma. M̀ɛnii ŋí ƃé ka ziɣãŋ tɔɔ̂i la pôlu. Ǹyaŋ ƃa ŋ̀wɛ̂lii a gɛɛ íkɛ a díkâloŋ.

⁷ Dîɛ ya íyee lɛ́ Ɣâla ŋɔlono kɛ́-ƃela da-ŋa dîa a gɛ́ɛ dí mò Zerusâlɛŋ taa-leei su a gɛɛ yá ƃa Zuda lɔii gâloŋ. Gɔ́lɔŋ a gɛɛ gâloŋ a pâi m̀ɛnii ŋí mɛni tí-ti ƃôi. M̀ɛni ma ŋa ŋ̀wɛ̂lii kwa yá kú kɔyɛ̂ŋ kú lóno é pîlaŋ m̀ɛnii ŋí ma.”

⁸ Ŋá worɛ̂ tɛ̀ɛ pôlu Saŋbala pɔ́ naa ńyɛɛ mai, “M̀ɛnii ŋí da fé a tɔ̃yâ a dɔnɔ kpîŋ! Íkpîŋ kili ŋa sìa nɔ́ ká ŋí.”

⁹ Kúkpɔara-ƃelai díkɛ̀ kɔ̂i a gɛɛ dí kú ḿaa yáo. Dí kɛ̀ gɛ̂i tí a gɛɛ dí kú kpéra kú tíi ma. Kɛ́lɛ ŋá Ɣâla marê kɛ̀ a gɛɛ é gɛ́ kú kponôi é kpanaŋ.

¹⁰ Ɣele tɔ̂nɔ da ŋá lì Simaya naa kâai. Simaya ǹâŋ láa ƃé kɛ̀ a Dilaya. Dilaya ǹyaŋ ǹâŋ láa ƃé kɛ̀ a Miitabɛ. Simaya è kɛ̀ ŋɔpɛ́rɛi mu zɔɔ̂ŋ tóɔɔ mà. È mò ḿâ ǹyɛɛi, “Kú lí Ŋ̀âla-pɛrɛ Kɛ́tɛi mu kú kúloo ŋɔkwaa maa waai ma kú gbôŋ-ŋai sɔ́ɔŋ tóo kûa kpɛ́ni fêi, íkpɔara-ƃelai da pâi sâa kpinii ŋí su a gɛɛ dí ípaa.”

¹¹ Ŋá ŋ̀óo su tòo ńyɛɛ mai, “Fé a ǹúui nyii a pû gɛ́ ǹooi. Ya gâai ŋà ńôo Ŋ̀âla-pɛrɛ Kɛ́tɛi mu núu da fá pɔ̂ri ḿbaâi? Fé liî naa.”

¹² Tãi ŋá ŋ́gili ŋá sìa la m̀ɛnii ŋí ma a ǹɛ́lɛɛi, ŋá gàa ŋá gɔ́lɔŋ a gɛɛ Ɣâla fé worɛ̂ woo tɛ̀ɛ ní a Simaya. Kɛ́lɛ Tobaya da Saŋbala dí véla fè a gɛɛ é ŋ́giri.

¹³ Dí véla fè a gɛɛ é gɛ́ ŋá yao, ŋá mɛni nyɔ́mɔɔ kɛ́ Ɣâla ŋɛ́i-tuɛ, ńaa lɛ́lɛɛi é kara.

¹⁴ È kɛ̀ tí, ŋá Ɣâla fɛ̀li ńyɛɛi, “Óo Ŋáɣâlai, Saŋbala da Tobaya kula maa kɛ́ m̀ɛnii dí gɛ̀i m̀ɛni ma. Í lóno kɛ́-nɛnii Naodia da m̀arâai nyii-ŋai díkaa ḿaa yaôi, dí kula maa kɛ́.”

Dí kpɛ̀ɛ ziɣãŋ tɔ̂ɔ ma

¹⁵ Dí ziɣãŋ tɔ̀ɔ fólo buu lɔ́ɔlu káo feerɛ yée mu. Kú kpɛ̀ɛ ma a ŋ̀áloŋ da kɛ̂ ma Ilu Ibulu-wooi sui, ŋɔfólo buu feerɛ káo lɔ́ɔlu ɣele.

¹⁶ Tãi kú kpɔara-ƃelai kɛ̀ kúkɔlɛ ma lɔii ŋuŋ-ŋai su dí m̀ɛni la a gɛɛ kwa kpɛɛ ziɣãŋ tɔ̂ɔ mai, dí kɔ̃ɔŋ è sàa dîa, kpɛ́ni fêi, dí gɔ̀lɔŋ a gɛɛ Kúɣâlai è kpɔŋ mâa tɛ̀ɛ kúpɔ díi ŋí kɛ́ mɛni ma.

¹⁷ Tãi kú kɛ̀ ziɣãŋ tɔɔ̂i la m̀ɛni-ŋai ŋí díkɛ kɛ̀ kúloai kwa Tobaya ni, Zuda-ŋai láa túɛ ƃelai da-ŋa da Tobaya ni díkɛ̀ nɔ́ kili ŋa pôno-ŋa tɛɛ̂i díkîe ni pɔ́.

¹⁸ Zuda-ƃelai dámaa ɣele díkɛ̀ Tobaya pôlu kpɛ́ni fêi, ŋɔnɛnîi ǹâŋ è kɛ̀ a Zûu nuu. Ǹɛnîi ŋí ǹâŋ láa ƃé kɛ̀ a Sikania. Sikania ǹyaŋ ǹâŋ láa ƃé kɛ̀ a Ara. Tobaya ǹóŋ-surɔŋ láa ƃé kɛ̀ a Zioana. É Zûu naloŋ Mɛsulaŋ ǹóŋ-nɛnii kùla a ŋɔnɛnî. Mɛsulaŋ ǹâŋ láa ƃé kɛ̀ a Bɛrikaya.

¹⁹ M̀ɛni lɛ́lɛɛi Tobaya è kɛ̀ gɛ̂i ǹûai dîɛi, da kâa mò ḿâ a tãi kélee. Ńyaŋ m̀ɛnii kélee ŋa kâa mò dîai, da kâa m̀o m̀a. Nyíŋi mɛni ma Tobaya a kâa kɔlɔ tɛ̂ɛ ḿbɔ naa a ɣele kélee a gɛɛ é ḿaa yao.