Nehemi 4 - Bible

Niɛmaya è gbɔara-ƃelai yée mɛi ɣâle

¹ Saŋbala è kɛ̀ a kâloŋ Sameria lɔii mɛi. È m̀ɛni a gɛɛ kúai a Zuda-ŋai kwa kɛ́ Zerusâlɛŋ siɣãŋ tɔɔ̂i. M̀ɛnii ŋí è ŋwàna ma kpɔ́ a ŋ̀ánaa. È pɛ̀lɛ ɣɛ́lɛ maa kulâi kúkponôi.

² È m̀arâai da Sameria kɔ kɔ́-ƃelai tòli ǹyɛɛ dîai, “Lé ƃé ǹúu kpulu loŋ su ƃela fíi kpɛɛ-ŋai ŋí da ŋ̀wɛ̂lii dí gɛi? Da gâai da pâi pɔ̂rii daa lêei tɔɔ̂i pôlu? Dí lâai la sâla-ŋa kúlaa a pɔ̂ri gɛ̂i dí daa lêei ŋí tɔ́ɔ pôlu tãi kpua yée mu? Daa pîleŋ ŋa kélee a kɛ́ a túluŋ ŋá. Lé pɔ̂ri ƃé dîɛ a gɛɛ dí gɔni-ŋai ŋí kúla, dí daa lêei tɔ́ɔ la pôlui?”

³ Tobaya è kɛ̀ tɔɔ̂ ni Saŋbala kɔlɛ ma. Ǹyaa máŋ è mò ǹyɛɛi, “Ziɣãŋ sîi ŋí káa da dɔɔ̂i! Kɛlɛ̂ŋ kpîŋ à tɛ̀ mɛi a pâi wôloi la.”

⁴ Kɛ́lɛ ŋá Ɣâla fɛ̀li ńyɛ̂ɛi, “Óo Kúɣâlai, ŋ̀ɛ́lɛ maai káa ǹûai ŋí da gulâi kúkponôi. Gɛ́ m̀ɛni nyɔ́mɔɔi da ŋ̀wɛ̂lii é kɛ́ a kúai, é kɛ́ a dia. Gɛ́ díkpɔara-ƃela dí díkɔ̃liŋ kélee kúla díyêei dí lí a dia luɛ-laa su lɔii da kpɛ́ni-ŋa su.

⁵ Ífe dí su mɛ̂ni lɛ̀ɛ. Ífe tèla nìa dísɔnyɔ̂ŋ-ŋai dîa da gɛ̂i da ŋ̀óo nyɔ̂ŋ-ŋai da bilîi kûai. Kwa kɔ̂i a gɛɛ kú Zerusâlɛŋ taa-leei tɔ́ɔ ŋɔ́nɔ pôlu.”

⁶ Ǹûai dí tíi kɛ̀ kpɔ́ a gbanaŋɔɔ. Kú Zerusâlɛŋ siɣãŋ-ŋai tɔ̂ɔ kú seri la zâmai.

⁷ Saŋbala, Tobaya, Arebia-ƃelai, Amɔŋ-ƃelai da Asɔdɔ taa-leei su ƃelai dí kú kàa ziɣãŋ tɔɔ̂i a maa félaa, ƃɛ́i-ŋai kɛ̀ a búɔɔ zui kúkɛ naa yée pù gîei. M̀ɛnii ŋí a ŋwàna kpɔ́ dîa a ŋ̀ánaa.

⁸ Nya ƃe dí gbɛ̀tɛ a gɛɛ dí kɔ́ pɛ́lɛ kûa Zerusâlɛŋ, dí yó-yo tóo díi kɛ́ɛi su.

⁹ Kɛ́lɛ kúkɛ̀ nɔ́ Kúɣâlai fɛlîi. Kú nûa sìɣe a gɛɛ díkɛ kúmɛi kâa a kpíni da fólo.

¹⁰ Nya ƃe Zuda-ƃelai díkɛ̀ malôŋ wule toôi díi kɛ́ɛi su dîyɛɛi, “Kɔlɔ a kpɛɛ kûa a kôlo kpànaŋ kɛ́ɛ da kpîri wuyɛ́ɛ-ŋa siɣéɛɛ! Kwa pâi pɔrîi kpɛɛ̂i ziɣãŋ ŋí tɔ̂ɔ ma nɔ́ ƃè ŋí?”

¹¹ Kú kpɔara-ƃelai dí kɛ̀ m̀ôi dîyɛɛi, “Kwa pâi tɛ̂i nɔ́ a Zuda-ŋai kú dípaa, dítii é kpéra.”

¹² Kú ƃarâa Zuda-ŋai da-ŋa da kú kpɔara-ƃelai díkɛ̀ kwaa tɔ̂nɔ ma. Dí pà kúpɔ naa a tãi támaa díkɛ mò kûa a gɛɛ kú kúmɛi káa kpɛ́ni fêi, kú kpɔara-ƃelai da ŋ̀wɛ̂lii dí kɔ́ pɛ́lɛ kûa kútɛ̂i pere.

¹³ Nya ƃe ŋá nûa kùla Zuda-nuu suu tɛi-tɛ́i su. Ŋá ƃóa sɔkpɔ-ŋa, kerâŋ-ŋa, kpála-ŋa da tɔ̃a-ŋa tɛɛ dípɔ a gɛɛ dí ziɣãŋ m̀ɛ́i-ŋai kɛ̀ a naa wóloɔɔi, díkɛ ǹaa mɛi kâa. Ŋá díŋaa kɔ̀lɛ gwaa-ŋai ŋí ma yɛ̂ɛ berei dísîi káa lai.

¹⁴ Ŋá ŋánûai kàa ŋá gɔ́lɔŋ a gɛɛ dílii è kɛ̀ sɛ̂lɛnii. Nya ƃe ŋá ǹûai da dílaa túɛ-ƃelai tòli kwaa tɔ̂nɔ ma ńyɛɛ dîai, “Káfe yào ǹûai ŋí dîa. É lɛ́ɛ kákili ŋá a gɛɛ wála wâla káa Kánuu-namui yêei. A mɛni nyɔ́mɔ kɛ́ nuu kula maa kɛ̂. M̀ɛni ma, kà tɔɔ a gbanaŋɔɔ. Ká kɔ́ kákayɔɔ-ŋai mɛni ma, kánɛyâai da kápɛrɛ-ŋai!”

¹⁵ Kú kpɔara-ƃelai dí m̀ɛni a gɛɛ kwa dí mɛni kpɛtɛɛ nyɔ́mɔɔi kɔ́lɔŋ. Dí gɔ̀lɔŋ máŋ a gɛɛ m̀ɛni kpɛtɛɛ nyɔ́mɔɔi dí gɛ̀ é pîlaŋ kûai, Ɣâla a zu kàra. È kɛ̀ tí, kúkelee kú lì pôlu ziɣãŋ tɔɔ tîi ma.

¹⁶ É síɣe vóloi tí ma, ŋá gbakolo-ŋai ŋáa kɔ̀lɛ a díkpulu feerɛ. Kwa gbulu tɔ̂nɔ su-ƃelai kwa kɛ̀ tíi kɛ̂i, gbulu tɔ̂nɔ su-ƃelai díkɛ kúmɛi kâa. Dí kɔli seɣe-ŋa tòo dîa, kpála-ŋa kɛ́ ƃò díyêei, kpála ŋá ɣále kɔli kalaŋ-ŋa kɛ́ ƃò díyêei, é pɛ́lɛ kerâŋ-ŋa da tɔ̃a-ŋa dîa. Kúlaa túɛ-ƃelai díkɛ̀ kpɔŋ mâa tɛɛ̂i díi kɛ́-ƃelai pɔ́.

¹⁷ Diai kpîŋ kɛ̀ ziɣãŋ tɔɔ sãai tɛɛ̂i díi kɛ́-ƃelai pɔ́i, kɔ́ kɔ sãa díkɛ̀ díkelee díyee ŋá a tɛ̀ɛ-ŋa.

¹⁸ Diai kɛ̀ ziɣãŋ tɔɔ̂i dí ƃóa sɔ̂kpɔ-ŋai díkɛ̀ sɛ̂lɛni dí pɛ̂rɛi a tɛ̀ɛ ŋa. Ŋá túru fɛ́ɛ nuu tɔnɔ sìɣe a gɛɛ mɛni kpɔ̂lu a kɛ̀ pâi, é dúruii fɛ́ɛ. Maa núui è kɛ̀ ŋ́gɔlɛ ma.

¹⁹ Ŋá ǹɔii lônii da dí láa túɛ-ƃelai lia wôo ƃò ńyɛɛ dîai, “Kúai ziɣãŋ tɔɔ̂i kúfe lɛɣɛ ní a kúkîe ni.

²⁰ Ka dúru wooi mɛ̂ni, ka lɛɣɛ a ńyãa a maa félaa. Kúɣâlai a pâi kɔ̂i kú mɛni ma.”

²¹ Kwa ǹúu kpului su-ƃelai dɔ̀nɔ kwa kâa kɛ̀ tíi kɛ̂i, dɔ̀nɔ su-ƃelai díkpala-ŋai kɛ́ ƃò díyêei díkɛ kúmɛi kâa. Bere ƃé kwa kâa tíi kɛ̀ la a ɣele kélee é kúla ɣele wâla ma é too ɣele wûlii ma.

²² Tãi ŋí su, ŋá díi kɛ́ kpakolo-ŋai da díkpɔŋ maa ƃelai marê kɛ̀ a gɛɛ kúkɛ ǹyii Zerusâlɛŋ taa-leei su. È kɛ̀ tí, kwa kâa tíi kɛ̀ a fólo ŋá, kú kɛ́ daa-lêei mɛi kâa a kpíni.

²³ Kú ta fa kâa ŋɔtíi kɛ́ seɣe-ŋai da kùla ma a kpíni. Ńyãa, ḿaraâi, díi kɛ́-ƃelai kpéli-ŋai, da ǹûai kɛ̀ kú ḿɛi kâai. Ǹyaŋ kú kélee kú kɔ́ kɔ sãai dí kɛ̀ nɔ́ kúyee ŋá a tãi kélee.