Nehemi 3 - Bible

Dí Zerusâlɛŋ taa-leei ŋɔsiɣãŋ tɔ̀ɔ ŋɔ́nɔ pôlu

¹ Berei ŋí ƃé dí Zerusâlɛŋ taa-leei ŋɔsiɣãŋ-ŋai tɔ̀ɔ la pôlu. Zâla láa soŋ nuu kɛ́tɛi Iliasi da m̀arâa sala láa soŋ-ƃelai dí ziɣãŋ nyii da doli a M̀ála Siɣãŋ lái kpɛ̀tɛ. Dí gbɛ̀tɛ dí gbôŋ too dí ǹaa tɛɛ Ɣâla pɔ́ ŋɔtíi kɛ́ mɛni ma. Ǹaa pôlu ma, ziɣãŋ nyii kùla ǹyeŋkêŋ ma da dòli a Ǹyeŋkêŋ ŋuŋ Tɔnɔi (100), é lí ǹyeŋkêŋ ma da dòli a Ananɛi dí ǹaa kélee tɛ̀ɛ Ɣâla pɔ́.

² Zɛleko sinâai dí ziɣãŋ m̀éla tɔ̂nɔ tɔ̀ɔ ǹaa pôlu pere. M̀élai nyii kɛ̀ ǹaa pôlu perei, Iŋri ǹóŋ Zaku è dɔ̀ɔ pôlu.

³ Asanaa ŋɔkáa-yɔɔ-ŋai dí ziɣãŋ dòli a Nyɛ̃ɛ Siɣãŋ lá kpɛ̀tɛ ŋɔ́nɔ pôlu. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛtɛ.

⁴ Yuraya ǹóŋ-surɔŋ Meremɔ nyii kɛ̀ a Akɔ ǹóŋ-surɔŋ ŋɔlóŋ-surɔŋ è ziɣãŋ m̀éla nyii kɛ̀ ǹaa pôlu perei tɔ̂ɔ. Bɛrikaya ǹóŋ-surɔŋ Mɛsulaŋ nyii kɛ̀ a Mɛsizabɛ ǹóŋ-surɔŋ ŋɔlóŋ-surɔŋ è ziɣãŋ m̀élai kpéli tɔ̀ɔ pôlu nyii kɛ̀ ǹaa pôlu perei. Baana ǹóŋ-surɔŋ Zadɔ è ǹaa pôlu pere ƃelai tɔ̂ɔ pôlu.

⁵ Tekoa taai su sinaai dí ziɣãŋ pôlu pere ŋɔi tɔ̂ɔ. Kɛ́lɛ daai láa túɛ-ƃelai dífe fáa ní ma a gɛɛ dí díi bɛlɛ-pɛlɛɛi da kɛ́ nyii dí dɛ̀ɛ dípɔi.

⁶ Pasia ǹóŋ Zoiada da Bisodeya ǹóŋ Mɛsulaŋ dí Zesana siɣãŋ lá sɛŋ kpɛ̂tɛ pôlu. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ.

⁷ Milataya da Zadɔŋ ƃé ziɣãŋ ǹaa pôlu-pere wɔi tɔ̂ɔ. Milataya è kùla Gibiyɔŋ-taai su, Zadɔŋ é kúla Mɛronai-taai su. Gibiyɔŋ da Misipa sinâai ƃé kpɔŋ mâa tɛ̀ɛ dípɔ díi ŋí kɛ́ mɛni ma. Zinâai ŋí dí kɛ̀ Yufeletii Ya-leei ŋɔfólo liî pere lɔii kpiniŋ mɛi nuu kɛ́tɛi ŋɔpɛ́rɛi lá.

⁸ Uziɛ è ziɣãŋ m̀éla da tɔ̀ɔ pôlu. Uziɛ kpîŋ è kɛ̀ a gôo ɣale nuu. Ǹâŋ láa ƃé kɛ̀ a Araya. Anania ǹyaa máŋ è ziɣãŋ m̀éla da tɔ̀ɔ é seri la ƃɛ́i da ǹaa tòli a Ziɣãŋ M̀éla Kɛ́tɛi. Anania è kɛ̀ a wúru-ya kúŋ nɛ̃ɛ kpɛtɛ nuu.

⁹ Lefeya è ziɣãŋ m̀éla tɔ̂nɔ tɔ̀ɔ. Ǹâŋ láa ƃé kɛ̀ a Ɔɔ. Lefeya è kɛ̀ a Zerusâlɛŋ lɔii m̀éla tɔ̂nɔ mɛi nûu.

¹⁰ Zidaya è ziɣãŋ m̀élai dɔnɔ tɔ̀ɔ. Ǹâŋ láa ƃé kɛ̀ a Aruma. Ŋɔpɛ́rɛi è kɛ̀ ziɣãŋ m̀élai ŋí ma pere. Atusi è ziɣãŋ m̀éla tɔnɔ tɔ̀ɔ ǹaa pôlu ma. Atusi ǹâŋ láa ƃé kɛ̀ a Asania.

¹¹ Makiza da Asu dí ziɣãŋ m̀éla tɔ̂nɔ tɔ̀ɔ da ǹyeŋkêŋ da dòli a Gbólo-kpɛtɛ Yeŋkeŋ. Makiza ǹâŋ láa ƃé kɛ̀ a Ariŋ. Asu ǹâŋ láa ƃé kɛ̀ a Paa-moa.

¹² Saluŋ è ziɣãŋ m̀éla tɔ̂nɔ tɔ̀ɔ. Ǹônii-nɛyãai dí kpɔŋ mâa tɛ̀ɛ bɔ́ díi ŋí kɛ́ mɛni ma. Saluŋ è kɛ̀ Zerusâlɛŋ lɔii kpiniŋ m̀éla tɔ̂nɔ mɛi. Saluŋ ǹâŋ láa ƃé kɛ̀ a Aloɛ.

¹³ Nalôŋ da kɛ̂ ma Anuŋ é pɛ́lɛ Zanoa taa-leei su ƃelai dîa dí ziɣãŋ m̀éla tɔnɔ tɔ̀ɔ pôlu da dòli a Diŋ-tiŋ su Siɣãŋ. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ. Dí lɛ̀ɛ ziɣãŋ tɔɔ̂i é lɛ́ɛ la zu dí seri ziɣãŋ m̀ɛ́i ma da ǹaa tòli a Duluŋ-ŋa Siɣãŋ lái. Ŋɔkôya è kɛ̀ a kɔ́ɔ ƃɔ́rɔnii wála tɔnɔ pôlu ŋuŋ lɔ́ɔlu (1,500).

¹⁴ Makiza ƃé ziɣãŋ lá kpɛtɛ nyíi da dòli a Duluŋ-ŋa Siɣãŋ. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ. Makiza ǹâŋ láa ƃé kɛ̀ a Leka. Nya ƃe kɛ̀ Bɛyasɛrɛŋ lɔii kpiniŋ mɛi.

¹⁵ Saluŋ ƃé ziɣãŋ kpɛ̀tɛ da dòli a Ǹya Tôŋ ma Siɣãŋ, é vaâŋ kula ma. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ. Gwaa da ma káa naa da ǹaa tòli a Sila Poai. È ziɣãŋ ŋí tɔ̂ɔ kɔ́ɔ pìlaŋ naa é seri la gâloŋ pɛrɛi pôlu. È tɛ̀ɛ la naa é lí é seri berei ma nyii a tɛ̂ Gâloŋ Deeƃé ŋɔtaa-lêei sui. Saluŋ è kɛ̀ a Misipa lɔii kpiniŋ mɛi nûu. Saluŋ ǹâŋ láa ƃé kɛ̀ a Kowozɛ.

¹⁶ Abu ǹóŋ-surɔŋ Niɛmaya ƃé ziɣãŋ tɔ̂ɔ kɔ́ɔ pìlaŋ Saluŋ ŋɔi ma é lí la é seri Deeƃé ƃolôŋ ma, é seri bóai lá nyii ǹûai dí ǹáai, é tɛ́ɛ naa é seri gɔ-kuluƃa-ŋai díkolii su. Niɛmaya ŋí ƃé kɛ̀ a Bɛzua lɔii kpiniŋ mɛi nûu.

Liiva-ŋai ziɣãŋ da tɔɔi

¹⁷ Ǹaa pôlu ma, Liiva-ŋai ŋí dí ziɣãŋ gwaa da-ŋa ma tɔ̀ɔ: Bani ǹóŋ-surɔŋ Lewuŋ è da tɔ̀ɔ. Asabiya è da tɔɔ. Asabiya è kɛ̀ Keila lɔii kpiniŋ gbua tɔ̂nɔ mɛi. È díi ŋí kɛ̀ ŋɔlɔii kpîniŋ láai su.

¹⁸ Bavai è ziɣãŋ da tɔ̀ɔ. Ǹâŋ láa ƃé kɛ̀ a Inada. Bavai è kɛ̀ Keila lɔii kpiniŋ gbua kpéli mɛi.

¹⁹ Izɛ ǹyaa máŋ è ziɣãŋ da tɔ̀ɔ. Ǹâŋ láa ƃé kɛ̀ a Zasua. Izɛ è kɛ̀ Misipa lɔii kpiniŋ mɛi. È ziɣãŋ m̀élai dɔnɔ tɔ̂ɔ kɔ́ɔ pìlaŋ díkɔ kɔ-sãai pûi kɛ́-pɛrɛi ŋɛ́i-tuɛ, é lɛ́ɛ la zu é seri ƃɛ́i ma ziɣãŋ è kɛ̀ a ŋ̀áleɣɛɛ naa ŋ̀ái.

²⁰ Baru è ziɣãŋ da tɔ̀ɔ. Ǹâŋ láa ƃé kɛ̀ a Zaƃai. Baru è ziɣãŋ tɔ̀ɔ é seri la Zâla láa soŋ nuu kɛ́tɛi Iliasi ŋɔpɛ́rɛi lá.

²¹ Meremɔ è ziɣãŋ da tɔ̀ɔ. È ziɣãŋ tɔ̂ɔ kɔ́ɔ pìlaŋ Zâla láa soŋ nuu kɛ́tɛi Iliasi ŋɔpɛ́rɛi lá é lí la ǹaa pôlu pere. Meremɔ ǹâŋ láa ƃé kɛ̀ a Yuraya. Meremɔ ǹâŋ ŋɔnàŋ láa ƃé kɛ̀ a Akɔ.

Zâla láa soŋ ƃelai ziɣãŋ da tɔɔi

²² Ǹaa pôlu ma, zâla láa soŋ ƃelai kɛ̀ Zerusâlɛŋ da ǹaa kɔlɛ ma kpiniŋ-ŋai sui, dí ziɣãŋ m̀éla kpéli tɔ̀ɔ pôlu. Maa sâla láa soŋ ƃelai láa káa ŋí:

²³ Bɛŋsima da Asu dí ziɣãŋ m̀élai tɔ̀ɔ pôlu kɛ̀ dípɛrɛ-ŋai ŋɛ́i-tuɛi. Azaria è ziɣãŋ m̀élai tɔ̀ɔ pôlu kɛ̀ ŋɔpɛ́rɛi ŋɛ́i-tuɛi. Azaria ǹâŋ láa ƃé kɛ̀ a Maaseia. Ǹâŋ ŋɔnàŋ láa ƃé kɛ̀ a Ananaya.

²⁴ Binui è ziɣãŋ tɔ̂ɔ kɔ́ɔ pìlaŋ ƃɛ́i Azaria è kòyaŋ naai é lí la ƃɛ́i ziɣãŋ è kɛ̀ a ŋ̀áleɛɛ ŋá naai. Binui ǹâŋ láa ƃé kɛ̀ a Inada.

²⁵ Pala è ziɣãŋ tɔ̂ɔ kɔ́ɔ pîlaŋ ƃɛ́i è kɛ̀ a ŋ̀áleɛɛ naa ŋái, é lí la ǹaa mɛi pere gâloŋ pɛrɛi ŋɛ́i-tuɛ, ƃɛ́i bɛ́rɛi mɛi káa-ƃelai da kâa sèe naai. Pala ǹâŋ láa ƃé kɛ̀ a Uzai. Naa pôlu ma, Palɔ ǹóŋ-surɔŋ Pedaya

²⁶ da Ŋ̀âla-pɛrɛi mu tii kɛ́-ƃelai nyii-ŋai dí séɛɛ è kɛ̀ Ofɛɛ-yeei mai, dí ziɣãŋ da tɔ̀ɔ. Dí dɔɔ́ kɔ́ɔ pîlaŋ ƃɛ́i Pala è kòyaŋ naai. Dí lì la vóloi ƃêlai pere é lɛ́ɛ la zu dí seri Ǹya Siɣãŋ ma ƃɛ́i Ŋ̀âla-pɛrɛi mɛi káa ƃelai díyeŋkêŋ è kɛ̀ naai.

Ziɣãŋ tɔɔ ƃelai da-ŋa

²⁷ Gbakolo-ŋai kùla Tekoai, dí ziɣãŋ naa pôlu ŋɔi tɔ̂ɔ. Ziɣãŋ m̀éla veerɛ ɣelei dí dɔ̀ɔi ǹya ká ŋí: Dí gɔ́ɔ pîlaŋ ǹyeŋkêŋ kɛ́tɛi kɔlɛ ma nyii kɛ̀ Ŋ̀âla-pɛrɛ Kɛ́tɛi mɛi káa mɛni mai, dí lì la dí seri ziɣãŋ m̀ɛ́i kɛ̀ Ofɛɛ-yeei kɔlɛ ma Zerusâlɛŋ taa-leei sui.

²⁸ Zâla láa soŋ ƃelai da kpɛ́ni-ŋa dí ziɣãŋ da tɔ̀ɔ pôlu. Dí gɔ́ɔ pîlaŋ ƃɛ́i da naa tòli a Zòo Siɣãŋ lá, dí lí la ǹɔii ŋûa pere. Dí ziɣãŋ-ŋai tɔ̀ɔ nyíi-ŋai kɛ dípɛrɛ-ŋai ŋɛ́i-tuɛ a tɛɛ ŋai.

²⁹ Ima ǹóŋ Zadɔ è ziɣãŋ da tɔ̀ɔ máŋ. Ziɣãŋ è dɔ̀ɔ pôlui ǹya ƃa nyii kɛ̀ ŋɔpɛ́rɛi ŋɛ́i-tuɛi. Simaya ǹyaa máŋ è ziɣãŋ da tɔ̀ɔ. Nya ƃe kɛ̀ ziɣãŋ lá mɛi kâai da dòli a Vóloi kulâi-pere siɣãŋ lai. Simaya ǹâŋ láa ƃé kɛ̀ a Sakania.

³⁰ Anania da Anuŋ dí ziɣãŋ da tɔ̀ɔ. Dí tãi veerɛ ɣelei ká ŋí kɛ̀ ziɣãŋ da tɔ̂ɔ mɛni ma pôlu. Anania ǹâŋ láa ƃé kɛ̀ a Selemaya. Anuŋ è kɛ̀ a Zâla ǹóŋ ǹɔ́ɔlu mɛi da ɣelei. Nyíŋi pôlu ma, Mɛsulaŋ è ziɣãŋ tɔ̂ɔ pôlu nyii kɛ̀ ŋɔpɛ́rɛi ŋɛ́i-tuɛi. Mɛsulaŋ ǹâŋ láa ƃé kɛ̀ a Bɛrikaya.

³¹ Gôo ɣale nûui, Makiza è ziɣãŋ da tɔ̀ɔ. È gɔ́ɔ pîlaŋ ƃɛ́i Mɛsulaŋ è kòyaŋ naa é lɛ́ɛ la zu é seri Ŋ̀âla-pɛrɛi ŋɔtíi kɛ́ ƃelai da bɔni tɔɔ ƃelai díkolii su. Gwaa ŋí ma è kɛ̀ ziɣãŋ m̀ɛ́i ma da naa tòli a Ŋ̀ãa-tɛ̀ gîe-ma siɣãŋ lá. È ziɣãŋ tɔ̂ɔ é seri la loŋpoi kɔlɛ nyii kɛ̀ ziɣãŋ mɛi pere ǹɔii ŋûa pere vóloi kulâi pere soŋoi su.

³² Gôo ɣale-ƃelai da bɔni tɔɔ-ƃelai ƃé ziɣãŋ kpéli kpɛɛ̂i ƃelai tɔ̂ɔ pôlu. Dí gɔ́ɔ pîlaŋ loŋpoi kɔlɛ nyii kɛ̀ ziɣãŋ mɛi pere ǹɔii ŋûa-pere, vóloi kulâi-pere sònoŋ su, é lɛ́ɛ la zu dí seri ziɣãŋ m̀ɛ́i ma da ǹaa tòli a M̀ála siɣãŋ lai.