Nehemi 2 - Bible

Niɛmaya è lì Zerusâlɛŋ

¹ Ɣáloŋ náaŋ tɛɛ pôlu ma, Gâloŋ Atasɛra è kɛ̀ ǹáa miî a ɣele tɔ̂nɔ da. Ŋá lì a ŋɔŋwãai bɔ́ ŋ́ɛi yeŋɔɔ zu. Vé tá wɔ́lɔ ŋ́gaa ní ŋ́ɛi yeŋɔɔ zu a bere sîi ŋí.

² Nya ƃe gâloŋ è ḿarê kɛ̀ ǹyɛɛi, “Lé ƃé íŋɛi yeŋɔɔ̂i la zui, ǹyaŋ ífe kɔlɛi? Gáa yɛ̂ɛ nya ƃe mɛni da káa ílii toôi pôlu.” Nya ƃe ŋá yào.

³ Ŋá ŋ̀óo su tòo ńyɛɛi, “Ŋánuu-namui Gâloŋ, ífulu laai su é kôya! Malôŋ támaa tooɔ̂i ḿâ kpɛ́ni fêi, daa-lêei dí ŋánûa pɔlɔ-ŋai lòo zui, ǹaa su karâai, ŋɔsiɣãŋ lá-sãai kélee kéreŋɔɔ.”

⁴ Gâloŋ è ḿarê kɛ̀ ǹyɛɛi, “Lé ƃé ƃa ŋ̀wɛ̂lii ŋá gɛ́i?” Ŋá Ɣâla nyii gáa Ɣâla-taai fɛ̀li ńii su pere a maa félaa.

⁵ Nya ƃe ŋá mò gâloŋ ma, “Óo Gâloŋ, à kɛ̀ gáa a ílii láa mɛni, kpera yɛ̂, ńdɛɛ mî pôlu Zuda a gɛɛ ŋá daa-lêei tí tɔ́ɔ pôlu ƃɛ́i dí ŋánûa pɔlɔ-ŋai lòo naai.”

⁶ Gâloŋ ŋɔnɛnîi è kɛ̀ see ni gɔlɛ ma nyii ǹyée sèe ŋámarâ kɛ̂ɛ-wooi mui. Galoŋ è ḿarê kɛ̀ ǹyɛɛi, “Ya pâi pôlu a lé tãi?” Ŋá maa tãi lɛ̂ ma. Nya ƃe è fàa mà a gɛɛ ŋá lí.

⁷ È kɛ̀ tí, ŋá m̀arê kɛ̀ à kɛ̀ vâai ma, gɛ̀ ní é ǹyée ŋá kɔlɔ tɛ̀ɛ ḿbɔ a gɛɛ ŋa kɛ̀ tɛɛ̂i Yufeletii Ya-leei kɔlɛ ma vóloi liî pere lɔii kpiniŋ-ŋai su ŋ́gɛ lì Zuda, ŋuŋ ma ƃô kɛ́ ƃò ńyêei.

⁸ Ŋá gâloŋ marê kɛ̀ máŋ a gɛɛ é kɔlɔ tɛ́ɛ ḿbɔ ŋà lì ŋá dɛɛ Asafa pɔ́ wúru-ƃela mɛni ma. Asafa ƃé kɛ̀ a ǹɔii ŋɔwolâ kɛ́tɛi láa túɛ nuui. Ŋ̀úru ƃela-ŋai ŋí da-ŋa da pâi kɛ̂i Ŋ̀âla-pɛrɛ Kɛ́tɛi maa kóli konaŋ-ŋai kpɛtɛ mɛni ma, da-ŋa kɛ́ ƃò Zerusâlɛŋ taa-leei maa kóli gala-ŋai kpɛtɛ mɛni ma da bɛ́rɛi ŋa pâi kɛ̂i mui gbɛ̀tɛ mɛni. Gâloŋ è m̀ɛnii kélee kɛ̀ mî ŋá marê kɛ̀ dímɛni mai, kpɛ́ni fêi, Ɣâla è kɛ̀ ŋ́gɔlɛ.

⁹ Gâloŋ è kɔ kuluƃa-ŋa da soo sia-ƃela pìlaŋ ḿâ a gɛɛ kwa dîa-ni kú lí. Ǹyaŋ kú lì kú seri Ufeliti ya-leei ŋɔfólo liî pere lɔii kpiniŋ-ŋai su. Ŋá gɔlɔ-ŋai tɛ̂ɛ ǹɔii kpîniŋ-ŋai mɛi kâloŋ-ŋai pɔ́ nyii gâloŋ è dɛ̀ɛ ḿbɔi.

¹⁰ Kɛ́lɛ tãi Orɔŋ-taai su-nuui Saŋbala da Amɔŋ lɔii su-nuui Tobaya nyii-ŋai kɛ̀ a gɔmɛnɛ-ƃelai kpaya-kpayai dí m̀ɛnii ŋí mɛ̀ni lai, dílii è ŋwàna kpɔ́ a ŋána, kpɛ́ni fêi, dífe kɛ́ ní ŋ̀wɛ̂lii a gɛɛ núu da kélee é mɛni lɛ́lɛɛ kɛ́ Eezuɛ lonii mɛ̂ni ma.

¹¹ Tãi ŋá sèri la Zerusâlɛŋ taa-leei sui, ŋá gɛ̀ naa a fólo saaƃa.

¹² Ḿve m̀ɛnii ŋí ƃó ní núu da kélee ma nyii Ɣâla è nɛ̀ ḿâ a gɛɛ ŋá gɛ́ Zerusâlɛŋ taa-leei mɛni mai. Vólo saaƃai ŋí kpɛɛ ŋa kpinii sáma, ŋá mu sìɣe kwa ḿƃarâi da-ni kú lí. Ŋ̀wɛlɛ sooi nyii ŋá kɛ̀ see ni bôlui, nya nɔ́ ƃé kú lì la.

¹³ È kɛ̀ niî a kpíni tãi ŋá kùla la daa-leei su ŋá tɛ́ɛ a ziɣãŋ lá pere nyii da kɛ̂ ma Diŋ-tiŋ sui kwára pere vóloi liî pere. Ŋá lì a ǹɔii kwára pere, ŋá tɛ́ɛ ǹyá tôŋ ma nyii da kɛ̂ ma Ǹyao Maa Kalii, ŋá lí ziɣãŋ lá nyii da kɛ̂ ma Dúluŋ ŋá. Tãi ŋá kɛ̀ liî lai, ŋá kɛ̀ daa-lêei ŋɔsiɣãŋ wóloɔɔ-ŋai maa kpɛɛ̂i a ǹɛ́lɛɛ da ziɣãŋ lá sãa kéreŋɔɔ-ŋai.

¹⁴ Tãi ŋá sèri la daa-lêei ŋɔfólo kulâi perei, ŋá lì a ǹɔii ŋûa pere siɣãŋ lá nyii da kɛ̂ ma Ǹya Tôŋ Mai da Gâloŋ Ŋɔpóai, kɛ́lɛ berei su è kɛ̀ a guro te. Wɛlɛ-soo fa pɔ̂ri tɛɛ̂i naa.

¹⁵ È kɛ̀ tí ŋá lì a Kidɔŋ Tiŋ-tiŋ su pere, ŋá daa-lêei ŋɔsiɣãŋ maa kpɛ́ɛ a ǹɛ́lɛɛ ǹaa pere. Naa pôlu ma, ŋá lène pôlu daa-lêei su a gbíni tɔnɔi tí a ziɣãŋ lá pere nyii da kɛ̂ ma Diŋ-tiŋ su siɣãŋ lai.

¹⁶ Daa-lêei láa túɛ-ƃelai dɔnɔ kpîŋ fé kɛ́ ní a ƃɛ́i kɔ́lɔŋɔɔ ŋá lì naa kpaa máŋ m̀ɛnii ŋá kɛ̀ gɛ̂i. Ḿve tela mɛni da ƃó ní ḿarâa Zuda-ŋai da ma kpaa máŋ zâla láa soŋ ƃelai, ǹûai láa túɛ-ƃelai kpaa máŋ diai kɛ̀ pâi díi kɛ̂i.

¹⁷ Tãi kwa dîa ni kú kòyaŋ lai, ŋá mò dîa ńyɛ̂ɛi, “Tɔ̃yâ ma Zerusâlɛŋ taa-leei su karâai! Ziɣãŋ lá sãai kélee wôloɔɔi, dí kéreŋɔɔ, zãâi kélee su kara kâraai. Fɛ̂ɛ nɔ́ kú daa-leei ŋɔsiɣãŋ tɔ́ɔ pôlu a gɛɛ ƃaa kula maa fé ŋɔ́nɔ sɛ̀lɛŋ kûa.”

¹⁸ È kɛ̀ tí, ŋá mò dîa berei Ɣâla è kpɔŋ la ḿâ da m̀ɛnii gâloŋ è mòi. Dí ŋ́oo su tòo dîyɛɛi, “Kwaa pɛ́lɛ daai tɔɔ̂i pôlu lonii ma!” Dí díkpîŋ kpɛ̀tɛ díi kɛ́ mɛni ma.

¹⁹ Tãi Ɔnɛ-nuui Saŋbala, Amɔŋ-nuui Tobaya da Arebi nuui Gɛsɛŋ ni dí kú mɛni kpɛtɛɛ-ŋai ŋí maa mɛ̂ni mɛ̀ni lai, dí pɛ̀lɛ ɣɛ́lɛ maa kulâi kúkponôi, díkɛ kúwoo nyɔ̂ŋ fè dîyɛɛi, “Lé ƃé ká lâai la ka pɔ̂ri gɛ̂i? Ká káa mɛni kpɛtɛɛ kɛ̂i a gɛɛ ká Zerusâlɛŋ taa-leei ŋɔsiɣãŋ-ŋai tɔ́ɔ pôlu ká tɔ́ɔ ǹɔii kâloŋ ma?”

²⁰ Ŋá díwoo su tòo ńyɛ̂ɛi, “Ŋ̀wála-wâla kélee Ɣalai nyii gáa Ɣâla-taai, ŋɔtíi kɛ́-ƃela ƃa kúa. Mɛni ma, kwa pâi Zerusâlɛŋ taa-leei tɔɔ̂i pôlu. Ǹyaŋ a pâi gɛ̂i kú kútii kɛ́ kú ŋuŋ lá kúla a ǹɛ́lɛɛ. Kɛ́lɛ ká fé a ǹɔii ŋí ǹônii da. Ká mɛni da fé lɔii maa mɛ̂ni su kúkwaa maa waa-ŋai mɛni su Zerusâlɛŋ.”