Nehemi 1 - Bible

¹ M̀ɛni-ŋai ká ŋí Ɛkelia ǹóŋ Niɛmaya è dí kɛi. Ńyãa Niɛmaya ŋá kɛ̀ Susa nyii gáa a Pɛsia lɔii ŋɔtaa-lee kɛ́tɛi a ŋ̀áloŋ da dòli a Kisilɛ Ibulu wooi sui. Maa tãi tí è kɛ̀ a Pɛsia kaloŋ Atasɛra ŋɔkâloŋ laa koraŋ buu feerɛi su.

Niɛmaya kpáaŋɔ̂ɔi Zerusâlɛŋ mɛni ma

² Ńêɣe sinaai dɔnɔ, Anani da sinâa kpulu tɔnɔ dí kùla Zuda dí pá kúpɔ naa. Ŋá ǹúu kpului ŋí su-ƃelai marê kɛ̀ é pîlaŋ kúƃarâa Zuda-ŋai díkpului maa-ŋuŋ ma nyii-ŋai kúla Babelɔŋ gɔ-soŋ laai su dí lene pôlu Zudai. Ŋá dímarê kɛ̀ máŋ é pîlaŋ Zerusâlɛŋ taa-leei mɛni ma.

³ Dí mò ḿâ dîyɛɛi, “Diai lène pôlu dí kúla gɔ-soŋ laai su dí pá pôlu Zudai, dí káa mɛni kpɔ̂lu támaa sɔlɔ ƃôi. Ƃaa kula maa támaa sɛ̂lɛŋɔɔi dîa. Zerusâlɛŋ taa-leei ŋɔsiɣãŋ kélee wôloɔi, ŋɔsiɣãŋ lá sãai kélee kéreŋɔɔ.”

⁴ Tãi dí mɛ̀nii ŋí ƃò la ḿâi, ŋá sèe ŋá wɔ́lɔ. Ŋá sèe a malôŋ pere yɛ̂ɛ nya ƃé saa a too ḿâ. Malôŋ è too ḿâ kpɔ́ a ŋ̀ánaa fé mii-sɛŋ da mii ní a ɣele kûu kpɛ́-kpɛɛ. Ŋá Ɣâla nyii gáa Ɣâla-taai fɛ̂li é pîlaŋ m̀ɛnii ŋí ma.

⁵ Ŋá mò ńyɛɛi, “Óo Yâwɛɛ Ɣâla, yái íkaa Ɣâla-taai, yá ƃa ŋ̀wála-wala kélee Ɣalai. Ǹyaŋ fɛ̂ɛ núu kélee dí ƃaa kɛ́ maa tɛ́ɛ ípɔ. Ƃa íkono têei ŋàa sèe kɛ̀ ǹúui kélee yêei í ŋwɛ́li ní gɛ́ íwoo mɛni, gɛ́ í tɔ̂ŋ-ŋai mɛi kâai.

⁶ M̀ɛni ma, íwoli tɔ́ɔ ḿâ. Ŋa í fɛlîi ítii kɛ́-ƃelai Eezuɛ-ŋai mɛni ma a fólo da kpíni. Ŋa m̀ôi yâ a gɛɛ kúai a Eezuɛ-ŋai kwa mɛni nyɔ́mɔɔ kɛ́ a yá. Ńyãa kpîŋ kwa ŋásuui su-ƃelai kélee kwa ímaa tĩa kara.

⁷ Kwa sɔnyɔ̂ŋ kɛ́ a yá kpɛ́ni fêi, dɔ̂ŋ í dɛ̀ɛ kúpɔ ítii kɛ́ ǹúui Mose sârai, kú fé kúyee see ní mu.

⁸ Gono têei í gɛ̀ Mose yêei, gíli é lɛ́ɛ í ŋá. Í mò mà yɛ̂ɛi, ‘À kɛ̀ káai a Eezuɛ-ŋai, laa la a wàla kɛ́ káyêei ḿɛni ma, gɛ̀ ní ŋa pâi ká táa-tâai lɔii ŋuŋ da kpɛ́ni-ŋa su.

⁹ Kɛ́lɛ kà tìnaŋ ŋɔ́nɔ ḿbɔ naa pêre, ká kɛ́ ŋá tɔ̂ŋ mɛi kâa, ŋa pâi pâi a káa pôlu ƃɛ́i ŋá ǹaa sìɣe a gɛɛ ká kɛ́ ḿvɛ̀li naai. À nɛ̃ɛ ma kpîŋ ká kɛ́ a kátaa tâa lɔii ŋuŋ da kpɛ́ni-ŋa su.’

¹⁰ “Kúnuu-namui, íkpɔɔi nuai Eezuɛ-ŋai ká ŋí. Í dí kùla luɛ laa su díkpɔara-ƃelai yêei a íwala-wala laa kɛ́tɛi.

¹¹ Kpera yɛ̂, ḿvɛli wooi ŋí su too mî kwa ítii kɛ́-ƃelai kpéli-ŋai nyii-ŋai da ƃâa kɛ̀ ílaai ma a lii nɛ̃ɛ perei. Ŋà sâa gâloŋ ŋɔkpele sɛŋ tɛ̀ɛ bɔ́, gɛ́ ǹíi é láa ḿɛni ma, í gɛ́ é m̀ɛnii kɛ́ mî ŋa pâi m̀arê kɛ̂i m̀ɛni mai.” Ńyãa ƃa kâa gâloŋ ŋɔŋwãai tɛ̀ɛ bɔ́.