Mise 1 - Bible

¹ Ŋ̀óo-ŋai ká ŋí Yâwɛɛ è mò Maka mai. Maka è kɛ̀ a Morɛsɛ taai su nuu. Ŋ̀orɛ̂-wooi ŋí è kɛ̀ a bîlaŋɔɔ Sameria da Zerusâlɛŋ dîa. Yâwɛɛ è ŋ̀orɛ̂-wooi ŋí tɛ̀ɛ a tãi Zotaŋ, Eeɣa da Ɛsekaya dí kɛ̀ la a kâloŋ-ŋa Zuda lɔii su a tɛɛ-ŋai.

Maka wɔ́lɔ-wooi Sameria da Zerusâlɛŋ mɛi

² Ká kélee ka m̀ɛnii mɛ́ni ŋa môi kâai. Káai kélee ɣele ma ǹɔii mai, ka káwoli tɔ́ɔ! Ŋ̀âla Kɛ́tɛi Yâwɛɛ nyii gáa ŋɔpɛ́rɛ maa waai mu Ɣâla-taai, a pâi ká-sɔnyɔ̂ŋ-ŋai lɛ̂i kâa.

³ Yâwɛɛ a pâi kulâi ŋɔkwaa maa waai ma é pîlaŋ é sía ǹyée-ŋai tôŋ su.

⁴ Ǹyée-ŋai da pâi séɣenîi gɔ́ɔ mu yɛ̂ɛ ƃɔ́ɔ a kɛ̀ ŋɔŋ kɔlɛ, díkɛ yèŋ gbotolo-ŋai su yɛ̂ɛ yá a kɛ̀ yenîi yée kwára.

⁵ M̀ɛni-ŋai ŋí kélee a pâi kɛ̂i Eezuɛ ŋɔtɔ̂ŋ-karaai da Eezuɛ-ŋai dísɔnyɔ̂ŋ mɛni ma. Lé ƃé Eezuɛ kɛ̀ gɛ́ dɔ̂ŋ karaai? Lé ƃé Zuda kɛ̀ gɛ́ sɔnyɔŋ kɛ̂i? Vé a ŋ̀ala-pɔkɔŋ-ŋai díkaa Zerusâlɛŋ?

⁶ Maa mɛ̂ni ma Yâwɛɛ è mò ǹyɛɛi, “Mɛni ma ŋa pâi Sameria taa-leei wôloi. Nàa a pâi kɛ̂i nɔ́ yɛ̂ɛ taa pîleŋ ƃɛ́i núu a pɔ̂ri ƃakpɔmɔ-kpalaŋ kɛ̂i naai, ŋá dísiɣaŋ wólo, ŋá gula daai ma ŋa doo gbotoloi su. Ŋa pâi daa-lêei wôloi, bɛ́rɛ-kaŋ-ŋai nɔ́ ƃé pâi lɛɛ̂i tɔɔ̂ni.

⁷ Ŋa pâi díɣâla-pɔkɔɔŋ-ŋai kélee su karâi. Zãâi dí zɔlɔ ƃô Ŋ̀âla-pɛrɛi mɛni ma díwulu-wulu kɛ́ɛi sârai, ŋa pâi gérenîi a ŋɔŋ. Ŋa pâi díɣâla-pɔkɔɔŋ-ŋai wôloi. Zãâi è zɔlɔ ƃô ŋɔwulu-wulu kɛ́ɛi sârai, ŋɔkpɔara-ƃelai da pâi liî dí gɔlɛ wulu kɛ́ɛ pôlu kwaa da kpɛ́ni ma.”

⁸ Maka è mò ǹyɛɛi, “Nyíŋi mɛni ma, ŋa pâi wɔ̂lɔi a zu kɛ́tɛ, ŋá seɣe kúla ḿâ ŋ́gɛ tɛ̀ɛ a ŋ́gɔɔ-ŋa folo, ŋ́gɛ ƃò a ŋ́gaŋ, ŋá láɣi yɛ̂ɛ lɔɔ-ɣîla, ŋá wɔ́lɔ yɛ̂ɛ soo-kɔnɔŋ, ŋ́gɛ ŋá maloŋ too mai lɛ̂.

⁹ Sameria ŋɔmɛni-sôlii fa kpɛ̂ɛ ǹyaŋ m̀ɛni-soli tɔnɔi ŋí a nâa seri Zuda lɔii su, a seri máŋ ŋánûai dîa Zerusâlɛŋ getii lá.”

Zerusâlɛŋ kpɔara-ƃelai da lɛɣɛ la

¹⁰ Káfe kúyee mɛi ɣále mɛni ƃò Gaa-ƃelai dîa. Káfe wɔ̀lɔ káai Bɛlafera-taai sui, ká tóo muluŋ su ká kiliŋ.

¹¹ Káai a Safii-ƃelai, kákpɔara-ƃelai da pâi liî a káa lɔii da kpɛ́ni su ká kɛ́ ƃò a ká kaŋ a ŋumɛ pere. Zaanaŋ-ƃelai da yaôi a gɛɛ dí kúla dítaai su. Ká pâi wɔ́lɔ-woo mɛniiî gɛ́ kùla Bɛtɛzɛ-taai su nyii a nɛ̀ a gɛɛ dí mɛi kaa sɛŋ fé ŋɔ́nɔ ma.

¹² Maro-ƃelai díkaa maa kpɛ̂ŋ kɛ̂i ŋuŋ-ma ƃô mɛni ma, kpɛ́ni fêi, mɛni kpɔ̂lu a kula Yâwɛɛ yêei, gáa nâa Zerusâlɛŋ getii lá.

¹³ Káai a Laki-ƃelai, ká kásoo-ŋai kpulɔ̂ŋ dísia keleŋ-ŋai dîa ká pú. Káa ƃé gɛ̀ Zerusâlɛŋ-ƃelai dí sɔnyɔ̂ŋ kɛ́, kpɛ́ni fêi, ká káyee pù Eezuɛ-ŋai dísɔnyɔ̂ŋ su.

¹⁴ Zuda-ƃelai, ka yee-kɛ-maa-sɛŋ tɛɛ Morɛsɛ-Gaa-ƃelai pɔ́. Eezuɛ kaloŋ-ŋai dífe pâi kpɔŋ-maa sɔlɔ ƃôi ŋɔ́nɔ Aizi-taai yêei.

¹⁵ Káai a Marɛsa-ƃelai, Yâwɛɛ a pâi kákpɔara-ƃela tɛɛ̂i dí kátaai síɣe. Ǹúu-ŋuŋ tuɛ-ƃelai Eezuɛ lɔii sui, da pâi pûi dí lí Adulaŋ taai su dí díloo naa gɔni-woloi su.

¹⁶ Zuda-ƃela, ka káŋuŋ kálaŋ ma ká wɔ́lɔ káwɛli-kɛ-maa lonii mɛni ma. Ka káŋuŋ kálaŋ ma yɛ̂ɛ kpúlaŋ a tòo núu ŋûa kpɛ́ni fêi, da pâi liî a kálônii kélee luɛ-laa su.