Markə 16 - Bible

Zîsɛ è m̀u-siɣe saa-yêei

¹ Vii-tɔɔ-ɣelei tɛɛ̂i, Mere Madalini, Zĩi ǹee Mere da Salômi ní dí wúru-ya kúŋ nɛ̃ɛ yà a gɛ́ɛ dí lí la dí zia Zîsɛ pomai ma.

² Nya ƃe ǹɔ́ɔ kûui ŋɔɣele kûui duɛ-tuɛi ma, ŋ̀ele-wala pɛ-pɛi, volo-nɛnɛŋ kúlaâi, dí lì gɔni ƃoloŋ lá.

³ Dí kɛ̀ díkîe-ní marê kɛ̂i, dîyɛɛi, “Gbɛ̂ɛ ƃé pâi gɔnii kilînii è ziɣe kûɛ m̀olôŋ lái?”

⁴ Gɛ́ɛ̂i da díŋuŋ mu sìɣei, dí gàa a gɛ́ɛ núu da a gɔnii kiliŋ a gula naa. Gɔnii ŋí è kɛ̀ a kɔni kɛ́tɛ.

⁵ Nya ƃe dí lɔ̀ gɔni-ƃoloŋ su, dí ńyaŋkpa tɔnɔ káa seêni naa laa-mii-yee mɛi-pere, yokpo kole kɛ́ ƃò ma. Díkili ŋá è tɛ̀i.

⁶ È m̀o dîa ǹyɛɛi, “Kákili ŋá fé tɛ̀i. Kákaa Nâzarɛ Zisɛi kɔ̂rii, nyii dí gbàmo saa-wuru ma. Aâ m̀u sìɣe, vé ƃɛ́. Ka ƃɛ́i káa dí ǹaa naai.

⁷ Kɛ́lɛ, ka lí ká m̀ó ŋɔpôlu-ƃelai Pitɛ da m̀arâai dîa, a gɛ́ɛ a liî Galalii kátuɛ. Naa ƃé ka pâi gâai naa yɛ̂ɛ berei è m̀o la kâai.”

⁸ Dí kùla gɔni-ƃoloŋ su a kîrɛ, kpɛ́ni fêi, dípɛlɛ è pù, díkɛ kpɛ̃liŋ. Dífe m̀ó ní núu da kélee ma, kpɛ́ni fêi, dí kɛ̀ yaôi. [

Zîsɛ e kùla Mere Madalini ŋɛ́i

⁹ Zîsɛ kɛ́ɛ a m̀u siɣe saa yêei maa ɣele-wala pɛ-pɛi, ǹɔ́ɔ kûui ŋɔɣele kûui duɛ-tuɛi ma, è kùla Mere Madalini ŋɛ́i fúlɔi, nyii è nyînaŋ nyɔ́mɔɔ lɔ́ɔlu mɛi feerɛ kpɛ̀ bôlui.

¹⁰ È lì é m̀ó diai dîa kɛ̀ Zîsɛ mai, díkɛɛ niî maloŋ too maa pere su díkɛ wɔlɔi.

¹¹ Kɛ́lɛ, gɛ́ɛ da m̀ɛni a gɛ́ɛ Zîsɛ káa a vúlu Mere a gáai, dífe láa ní la.

Zîsɛ è kùla ŋɔpôlu-ƃelai veerɛ ŋɛ́i

¹² Nyíŋi pôlu ma, Zîsɛ è kùla ŋɔpôlu-ƃelai veerɛ ŋɛ́i díkɛɛ siâi berei ma, pere sîi da kpɛ́ni su.

¹³ Dí lì pôlu dí m̀ó díƃaâi gbeli-ŋai dîa, kɛ́lɛ, díaŋ dífe zìɣe ní a tɔ̃yâ.

Zîsɛ è kùla ŋɔpôlu-ƃelai buu kao tɔnɔ ŋɛ́i

¹⁴ Gbɛɛ ŋái, Zîsɛ è kùla ŋɔpôlu-ƃelai buu kao tɔnɔ ŋɛ́i díkɛɛ kɛ̀ dílaa miî. È lono dîa, kpɛ́ni fêi, dífe láa ní kɛ̀ a m̀aa mɛni. Díwolii è kɛ̀ a gbɔ̂lɔɔ. Díai ǹyaa Zîsɛ kàa m̀u-siɣe yêei pôlu ma dí m̀ó dîai dífe díwoo siɣe ní a tɔ̃yâ.

¹⁵ Nya ƃe è m̀o dîa ǹyɛɛ, “Ka lí ǹɔii gwaa kélee ma ká Duŋ Lɛ́lɛɛi ƃó núu kélee ma.

¹⁶ Ǹúui a lâa la dí ŋɔbatâi kɛ́i, a pâi ƃâloi. Kɛ́lɛ, ǹúui vé pâi lâai lai, Ɣâla a pâi tɔ̂ŋ pûi m̀aa nuui ma.

¹⁷ Diai da lâa lai, wála-wala laa pâi kɛ̂i díyêei ŋɛi-kɛ-maa-ŋa kɛ́ mɛni ma ńaai su. Wála-wala a pâi kɛ̂i díyêei nyînaŋ nyɔ́mɔɔ-ŋa kpɛ́ mɛni ma, sîi-woo da kpɛ́ni-ŋa ƃó táre kɛ́ ƃò díyêei.

¹⁸ Dà kali da sôŋ kpaa máŋ dí núu paa-sɛŋ da kpèle, vé pâi mɛni da kɛ̂i a dia. Dà díyee pɛ̀lɛ kɔlɔ-fela-ƃela dîa, m̀aa-ƃelai da pâi ƃâloi.”

Zîsɛ è tɛ̀ Ɣâla-taa

¹⁹ Kúnuu-namu Zîsɛ kɛ́ɛ a lóno dípɔi, è tɛ̀ Ɣâla-taa, é sée Ɣâla láa-mii-yee mɛi.

²⁰ Nya ƃe ŋɔpôlu-ƃelai dí kùla naa dí lí, dí Ɣâla-woo ƃó kwaa kélee ma. Kúnuu-namui kɛ́ díkɔlɛ, gɛ́ tɔɔ ŋ̀orɛ̂-wooi pôlu a ŋɛ́i-kɛ-maa-ŋa kɛ́ɛ. É kɛ́ ti.]