Markə 15 - Bible

Zîsɛ è kɛ̀ Pâle ŋɛi tuɛ

¹ Ɣele-wala kɛ́ɛi, zâla láa soŋ-ƃela kpaya-kpayai, ǹúu-pɔ̂lɔ-ŋai, Dɔ̂ŋ lɛ́-ƃelai da goyâŋ-su-ƃelai kélee dí díŋuŋ pìlaŋ. Dí Zîsɛ yée ɣìri gîe ma, dí lí la dí dɛɛ Pâle pɔ́.

² Pâle è m̀arê kɛ̀, ǹyɛɛ m̀ai, “Yá ƃa Zûu-ŋai Díkâloŋ?” È ŋ̀óo su tòo, ǹyɛɛ ma, “Yâa m̀ó.”

³ Zâla láa soŋ-ƃela kpaya-kpayai dí lɛ́ɛ mɛni támaa ƃò a Zîsɛ láa.

⁴ Pâle è ŋɔ́nɔ m̀arê kɛ̀, ǹyɛɛi, “Wóo da fé íla? M̀ɛni támaai ŋí mɛni da m̀ôi a ílaâi.”

⁵ Kɛ́lɛ, Zîsɛ fé ŋɔ́nɔ ŋ̀óo su tòo ní. M̀ɛnii ŋí è Pâle lá kpâla ma.

Dí Zîsɛ tɛ̀ɛ a gɛ́ɛ dí bàa

⁶ Kóraŋ kélee su Dɛɛ-mɛi kúui ŋ̀ele, Pâle a kâa tèe gbini-pɛrɛi nuui dɔnɔ ŋuŋ ma ƃò gúui tí su, nyíi ǹûai da vɛ̀li mài.

⁷ M̀aa tãi tí, nalôŋ tɔnɔ è kɛ̀ naa gbini-pɛrɛi mu. Ǹáa ƃé kɛ̀ a Barâƃa. È kɛ̀ naa diai sáma kɛ̀ kɔ̂i ǹúu láa túɛ-ƃelai pɔ́ dí nûa pàa maa námui sui.

⁸ Nya ƃe gbɔŋ è ŋ̀á tɛ̀ ma Pâle maa-lá. Dí m̀arê kɛ̀ a gɛ́ɛ é gɛ́-mɛni pɔ́lɔi da kɛ́ ŋɔ́nɔ dîɛ.

⁹ È dímarê kɛ̀, ǹyɛɛi, “Ka ŋ̀wɛ̂lii a gɛ́ɛ ŋá Zûu-ŋai Díkâloŋ ŋuŋ ma ƃó?”

¹⁰ È m̀are kɛ̂i ŋí kɛ̀ dîa, kpɛ́ni fêi, zâla láa soŋ-ƃela kpaya-kpayai dí pà a Zîsɛ bɔ́ kpɔ́ara pere su.

¹¹ Kɛ́lɛ, zâla láa soŋ-ƃela kpaya-kpayai dí lɔ̀ gbɔŋ ŋuŋ su a gɛ́ɛ dí m̀ó Pâle ma é tée Barâƃa ma Zîsɛ pɔ́ɔ ŋá.

¹² Pâle è ŋɔ́nɔ dímarê kɛ̀, ǹyɛɛi, “Gɛ̀ ní, lé ƃé ŋá gɛ́ a ǹalôŋ nyii ka kɛ̂ ma Zûu-ŋai díkâloŋ?”

¹³ Dí ŋɔ́nɔ làɣi, dîyɛɛ m̀ai, “Gɛ́ dí gbamo wúru su-tíyeŋɔɔ ma.”

¹⁴ Pâle ǹyɛɛ dîai, “Lé mɛni ma? Lé mɛni nyɔ́mɔɔ ƃé a gɛ́i?” Kɛ́lɛ, dí kɛ̀ lâɣii nɔ́ a zu kɛ́tɛ. “Gbamo wúru su-tíyeŋɔɔ ma.”

¹⁵ Pâle è Barâƃa ŋuŋ ƃò, kpɛ́ni fêi, è kɛ̀ ŋ̀wɛ̂lii é gbɔŋ líi laa. Nya ƃe e Zîsɛ lòkwa, é dɛɛ dípɔ a gɛ́ɛ dí gbamo wúru su-tíyeŋɔɔ ma.

Gɔkuluƃa-ŋai dí ɣɛ́lɛ maa kùla Zîsɛ kponôi

¹⁶ Gɔkuluƃa-ŋai dí lì a Zîsɛ gâloŋ-pɛrɛ kɛ́tɛi mu (da kɛ̂ ma pelatôliɔŋ) Dí díƃarâai kélee tòli da dia ní dí ŋá tɛ̀ ma naa.

¹⁷ Dí yokpo kpɔlu mu tɛɣiɛ tòo Zîsɛ mà, dí ɣalêŋ ƃɔrɔ pala dí zee ŋ̀ûa.

¹⁸ Díkɛ ɣɛ́lɛ maa kulâi gbonôi dîyɛɛi, “Ée Zîsɛ, Zûu-ŋai Díkâloŋ!”

¹⁹ Dí ŋ̀uŋ lòkwa a kpalo dí díla-ya pu ma dí pɛlɛ díŋumɛ ŋá ŋ̀ɛ́i túɛ.

²⁰ Gɛ́ɛ da kpɛ̀ɛ a ɣɛ́lɛ-maa kula gbonôi, dí ǹyokpo kpɔlu mu tɛɣiɛi kùla ma, dí gbɔɔ̂i seɣei too ma. Dí nàa lì la a gɛ́ɛ dí gbamo wuru ma.

Dí Zîsɛ kpàmo ŋ̀úru su-tíyeŋɔɔ̂i ma

²¹ Sailini naloŋ Samaŋ è kɛ̀ kùla kpâlaŋ ŋá gɛ́ tɛ̀ɛ naa pere. Samaŋ è kɛ̀ a Alezaŋda da Lûfɔ dínâŋ. Gɔkuluƃa-ŋai dí gɛ̀ é Zîsɛ ŋɔsaa-wurii síɣe.

²² Dí lì a Zîsɛ kwaa da ma, da kɛ̀ ma Gâagɛta (nyíi zu kulâi ƃa ŋuŋ-konoŋ-kwaai ma Ibulu-wooi sui).

²³ Dí kɔ́ a gɛ́ɛ dí ŋwã́ai sumoɔɔ a sále nyɔ́mɔɔ sîi da tɛ̂ɛ Zîsɛ pɔ́. Zále sîi ŋí láa ƃa mâa. Kɛ́lɛ vé pɔ̂ri ní kɛ̀ gbelêi.

²⁴ Nya ƃe dí gbàmo ŋ̀úru su-tíyeŋɔɔ̂i ma. Dí ŋɔseɣei kɔ̀ a kpɛɛŋ díkîe-ní loai a gɛ́ɛ dí gɔ́lɔŋ gbɛ̂ɛ ƃé maa nɛ̃ɛ̂i é lɛ́ɛ ǹyêei.

²⁵ Dí Zîsɛ kpàmo ma a aƃai ǹɔ́ɔlu mɛi náaŋ a ɣele-wala.

²⁶ M̀ɛnii dí mò a ǹáai dí bɔ̃̀yɛ m̀ɛi, ŋ̀óo ká ŋí, “Zûu-ŋai Díkâloŋ.”

²⁷ Dí ŋúma-ƃela feerɛ kpàmo máŋ ŋ̀úru su-tíyeŋɔɔ-ŋa ma gɔlɛ. Dɔnɔ è kɛ̀ ǹáa-mii-yee mɛi-pere, gbeli kɛ́ ƃò gɔɔ-yee mɛi-pere. [

²⁸ Nya ƃe Ŋ̀âla-kɔlɔi ŋ̀óo ŋ̀aa-see è kɛ̀ yɛ̂ɛ berei bɔ̃yɛɛ̂i lai, “Dí gɔni tòo dɔ̂ŋ kara-ƃelai díwɔ̂i ma.”]

²⁹ Diai tɛ̀ɛ naai dí ǹaraŋ dí díŋuŋ kpɛ́mɛŋ, dîyɛɛ mai, “Aá! Yái ya Ŋ̀âla-pɛrɛ Kɛ́tɛi wòlo í dɔɔ ɣele kûu saaƃa yee mui,

³⁰ íkpîŋ ƃálo wɛ̂, í kúla ŋ̀úru su-tíyeŋɔɔ̂i ma í pîlaŋ!”

³¹ Zâla láa soŋ-ƃela kpaya-kpayai da Dɔ̂ŋ lɛ́-ƃelai máŋ dí ɣɛlɛ-maa kula gbonôi díkîe-ní loai bere tɔnɔi tí su, dîyɛɛi, “È núu da kpɛ́ni-ŋa ƃàlo, kɛ́lɛ, va pɔ̂ri gbîŋ ƃâloi.

³² Tɔɔ Eezuɛ Ŋɔkâloŋ, Kôrai, é kúla ŋ̀úru su-tíyeŋɔɔ̂i ma é pîlaŋ lónii ma, a gɛ́ɛ kú naa káa kú láa la.” Diai dí díkpàmo Zîsɛ kɔlɛi, dia máŋ dí kɛ̀ ǹarânii.

Zîsɛ è sàa

³³ Aƃai ǹɔ́ɔlu mɛi dai seriɛɛi, ǹɔii gwaa kélee è kpìni, é lɛ́ɛ la zu aƃai ǹɔ́ɔlu mɛi náaŋ é seri.

³⁴ Aƃai ǹɔ́ɔɔlu mɛi náaŋ ma, Zîsɛ e làɣi a zu kɛ́tɛ, ǹyɛɛi, “Yɛ̂loi, Yɛ̂loi, lama saƃɛ́tâni?” Zu-kulâi ƃa, “Ŋáɣâlai, Ŋáɣâlai, ya íyee kulâi ḿû, lé mɛni ma?”

³⁵ Diai kɛ̀ tɔɔ̂ni naai, díta-ní dí m̀ɛni dí m̀ó, dîyɛɛi, “Ka gáa. Gáa Ilaza tólîi.”

³⁶ Núu tɔnɔ è lì a kîrɛ é fɛ̀ɛ-waa láa fɛ́ɛ a ŋwã́ai kpona é ǹɔ́ kpalo ŋá e dɛɛ Zîsɛ pɔ́ a gɛ́ɛ e gbele, ǹyɛɛi, “Ka tɔɔ kú gáa à kɛ̀ Ilaza a pâi pâi é gula ma é bîlaŋ.”

³⁷ Kɛ́lɛ, Zîsɛ e làɣi é Ǹɛ̃wo gbɛɛ ŋái tóo.

³⁸ Ŋ̀âla-pɛrɛ Kɛ́tɛi mu seɣei su è ƃèla gîei feerɛ é síɣe ŋ̀uŋ tuɛ é yéŋ gwara.

³⁹ Gɔkuluƃa-ŋai mɛi-nuui è kɛ̀ tɔɔ̂ni ŋ̀ɛi tinaŋɔɔ Zîsɛ pɔ́ naa pere. Gɛ́ɛ a Ǹɛ̃wo gbɛɛ ŋái too pêre káai, è m̀o ǹyɛɛ, “Tɔ̃yâ ma, ǹalôŋ ŋí è kɛ̀ a Ɣâla Ǹóŋ.”

⁴⁰ Nɛyâa da-ŋa dí kɛ̀ tɔɔ̂ni kwaa kôya ma díkɛ naa kàa. Mere Madalini è kɛ̀ dísama, da Mere nyii kɛ̀ a Zĩi-loŋ da Zosɛ díleei. Nɛnî da kpɛ́ni è kɛ̀ dísama máŋ. Ǹáa ƃé kɛ̀ a Salômi.

⁴¹ Ǹɛyâai ŋí dí kɛ̀ Zîsɛ pôlu díkɛ tíi kɛ̀ mì gɛ́ɛ kɛ̀ Galalii. É kúla ǹɛyâai ŋí pôlu, nɛnî da kpɛ́ni-ŋa, dí kɛ̀ naa nyíi da Zîsɛ-ní dí pà Zerusâlɛŋ.

Dí Zîsɛ lòo

^42-43 Zosɛ Alimatîa è pà naa a ɣele-wulii. Ǹalôŋ goyâŋ su nuui dɔnɔ nyíi ƃaa kɛ́-maa kɛ́tɛ è kɛ̀ mài. Ǹyaa máŋ è kɛ̀ Ɣâla ŋɔkâloŋ-laai perei kâai a zu kôyaa. È ǹíi kpèle é lí Pâle pɔ́ é m̀arê kɛ́ Zîsɛ pomai mɛni ma. Ǹyaŋ è kɛ̀ a Vii-tɔɔ-ɣelei maa-tua ɣelei, nyii kɛ̀ a maa sãai kpɛtɛ-ɣelei.

⁴⁴ Pâle è kɛ̀ ŋ̀wɛ̂lii e gɔ́lɔŋ à kɛ̀ Zîsɛ a saa a tɔ̃yâ. Nya ƃe è ǹɔii maa kpɛ́-ƃelai mɛi-nuui tòli é m̀arê kɛ́ a gɛ́ɛ é kili ŋa pono tɛɛ bɔ́.

⁴⁵ Gɔkuluƃa-ŋai mɛi-nuui kɛ́ɛ a m̀ó m̀a a gɛ́ɛ a saai, è tèe bomai ma, Zosɛ é lí la.

⁴⁶ Nya ƃe Zosɛ è seɣe kole yà, é bomai kúla ŋúrii ma é m̀aa kpiniŋ la, é ǹáa ƃolôŋ su, nyii dí dèe kɔni kɛ́tɛ sui, é kɔni kíliŋ é dɔɔ gɔni-ƃoloŋ lá.

⁴⁷ Mere Madalini da Zosɛ ǹee Mere, dí ƃɛ́i kàa dí Zîsɛ lòo naai.