Malasi 1 - Bible

¹ Ŋ̀orɛ̂-wooi ká ŋí Yâwɛɛ è dɛ̀ɛ Malakai pɔ́ a gɛɛ é m̀ó Eezuɛ-ŋai dîai.

Yâwɛɛ ŋɔwɛli kɛ́-maai Eezuɛ mɛni mai

² Yâwɛɛ è mò ŋɔnûai dîa ǹyɛɛi, “Ŋá káwɛlini a tãi kélee.” Kɛ́lɛ dí zu tòo dîyɛɛi, “Ya íwɛli kɛ́ maa lɛ́ léŋ kûa?” Yâwɛɛ è zu tòo ǹyɛɛi “Isɔɔ da Zeeka dí kɛ̀ a lee-kaa tɔnɔ, kɛ́lɛ ŋá Zeeka wɛ́lini da ŋɔkáayɔɔ-ŋai

³ ǹyaŋ ŋá Isɔɔ kpɔ̀ara da ŋɔkáayɔɔ-ŋai. Ŋá ŋɔkɔni-yee lɔii su kàra ŋá dɛɛ lɔɔ sûa-ŋa pɔ́.”

⁴ À kɛ̀ Isɔɔ ŋɔnûai Idɔŋ-ŋai da mò dîyɛɛ, “Da kútaa-ŋai wólo kɛ́lɛ kwa pâi dɔɔ̂i ŋɔ́nɔ pôlu,” gɛ̀ ní Yâwɛɛ a pâi zu toôi ǹyɛɛ, “Tɔɔ dí dɔɔ pôlu, ŋa pâi díwôloi ŋɔ́nɔ. Nûa da pâi dílɔii tôlii a ŋwana-lɔɔ lɔii, maa lɔii tí su-ƃelai ƃé Yâwɛɛ líi ŋwânaai dîa wɔ́lɔ-wɔlɔ da wɔ́lɔ-wɔlɔ.”

⁵ Eezuɛ-ƃelai da pâi nyíŋi kâai a díkpîŋ ŋɛi-gao, ǹyaŋ da pâi môi, “Yâwɛɛ wála-wâlaai Eezuɛ lɔii su da ǹɔii da kpɛ́ni-ŋai.”

Yâwɛɛ líi è ŋwàna zâla láa-soŋ-ƃelai dîa

⁶ Ŋ̀wála-wâla kélee Yâwɛɛ è mò zâla láa-soŋ-ƃelai dîa ǹyɛɛi, “Lóŋ-surɔŋ a ŋumɛ-mâa tɛ̀ɛ ǹâŋ pɔ́, yée-mu-nuu kɛ́ ŋumɛ-mâa tɛ̀ɛ ŋɔmɛi-nuui pɔ́. Ńyãa ƃa kánâŋ. Lé mɛni ƃé káfa ŋumɛ-mâa tɛ̀ɛ la ḿbɔi? Ńyãa ƃa a kámɛi-nûui, lé mɛni ƃé káfa ƃaa-kɛ-maa tɛ̂ɛ ḿbɔi? Ka ká-ŋɛi nàŋiŋ ḿɛi ǹyaŋ ká mò kâa, ‘Kwa kú ŋɛi naŋîŋ-pere kɛ̂i léŋ ímɛi?’

⁷ Berei ká ŋí ká káŋɛi naŋînii la ḿɛi. Ka sâla-sɛŋ nyɔ́mɔɔ pù ŋátêƃelei ma. Ǹyaŋ ka marê-kɛ̂ɛ kɛ̂i, ‘Kwaa fɛɣɛ-pere kɛ́ léŋ a ŋumɛ-mâa tɛɛ́ ípɔ?’ Ŋa m̀ôi kâa, kpɛ́ni fêi, káfe ŋumɛ-mâa tɛɛ̂i ŋátêƃelei pɔ́.

⁸ À kɛ̀ kà pà a taa-sûa ŋɛ́i púɔɔ, gɛ́ kɔ̀lɛ kpaa máŋ gɔ́ɔ púɔɔ a gɛɛ ká sâla kula la ḿî, ka gɔ́lɔŋ a gɛɛ nyíti fé a mɛni nyɔ́mɔɔ? Ka kɔ́ ká sua kɛ́ɛ tí tɛ́ɛ gɔmɛnɛ-nuu kɛ́tɛi pɔ́! Ká gɔ́lɔŋ ǹíi a pâi nɛ̃ɛ̂i kámɛni ma kpaa máŋ é mɛni lɛ́lɛɛ da kɛ́ kâa?”

⁹ Káai a zâla-laa soŋ-ƃelai, ka Ɣâla marê kɛ́ a gɛɛ é mɛni lɛ́lɛɛ kɛ́ kûɛ. Vé pâi káɣâla fɛlii-wooi su toôi ǹyaŋ a pâi kulâi kásɔŋ su.

¹⁰ Ŋ̀wála-wâla kélee Yâwɛɛ ǹyɛɛi, “Eî kɛ̀ núu da káa kásama a gɛɛ é Ŋ̀âla-pɛrɛ Kɛ́tɛi ŋɔkpôŋ-ŋai kélee láa tɛ́ a gɛɛ kafa lâa ŋɔŋ kpɛ́ni-kpɛni too la ŋátêƃelei ŋa. Ńii fé láa ní káyêei. Fé pâi ńyee seêi zama sã̂ai mu ka pâ la ḿbɔi.

¹¹ Nûa da sála-sɛŋ kúŋ nɛ̃ɛ kèreŋ ḿî ǹɔii gwaa kélee, díkɛ sâla lɛ́lɛɛ kùla ḿî nyii a ńii laai. Díkelee da ŋumɛ-mâa tɛ̀ɛ ḿbɔ!

¹² Kɛ́lɛ káfa ƃâa kɛ̀ ḿâ à kɛ̀ kà mò kâa ŋátêƃelei káa kpɛ́ni-kpɛni, ǹyaŋ káa kɛ́ mii-sɛ̂ŋ pù ŋá nyii káfe ŋ̀wɛli níi.

¹³ Ka mò kâa, ‘Kúfii kpɛɛ̂i nâa m̀ɛni-ŋai ŋí kélee mɛni ma!’ À kɛ̀ tí ká kásĩ̂a mìi a ńyãa. Zama sɛŋ ka pâ la ḿbɔi, gáa a ŋúma taa-sua, gɔ́ɔ púɔɔ, kpaa máŋ gɛ́ kɔ̀lɛ. Ká gɔ́lɔŋ ŋa pâi ńyee seêi nyíti mu káyêei?

¹⁴ Náɣaŋ káa fili-nuu ma nyii sâla kula ḿâ a taa-sûa nyɔ́mɔɔ, ǹyaŋ a góno tee a taa-sûa lɛ́lɛɛ ŋɔtaa-sûai sáma a gɛɛ é sâla kula la ḿâ. Kpɛ́ni fêi, ŋ́gaa a kâloŋ kɛ́tɛ, ǹyaŋ ǹɔii-ŋûŋ-ŋai kélee da yao ḿâ.”