Mąątɛ̨nɛ̨ 86 - Bible

Ŋ̀ule-too nuui è Ɣâla fɛ̀li a gɛɛ Ɣâla é kpɔŋ mâa tɛɛ bɔ́

Deeƃé ŋɔɣâla fɛli wooi

¹ Óo Yâwɛɛ, íwoli tɔ́ɔ ḿâ í ŋ́oo su too, kpɛ́ni fêi, pɔ̂ri mâa fé mî.

² Ŋ́gula mî saa yêei, kpɛ́ni fêi ŋa ƃaa-kɛ maa tɛ̂ɛ í pɔ́. Ḿalo mî kpɛ́ni fêi, ŋ́gaa a íyee-mu nuu, ńaa a yá.

³ Óo Ǹuu-namui, Ŋáɣâlai, ŋ́ɛi-maloŋ káa mî, kpɛ̂ni fêi, ŋa ífɛ̀li a ɣele kélee.

⁴ Óo Ǹuu-namui, ye íyee-mu nuui líi-laa, kpɛ́ni fêi, ŋáɣâla-fɛli wooi a seri yâ.

⁵ Í sɔŋ lɛ̂lɛɛi, íkɛ kúsɔnyɔ̂ŋ su mɛni lɛ̀ɛ. Íwɛ̂li-kɛ-maai káa naa diai da ífɛ̀lii, dí mɛni ma.

⁶ Óo Yâwɛɛ, íwoli tɔ́ɔ ŋáɣâla fɛli-wooi ma. Íwoli tɔ́ɔ ŋákpera-fêi wɔlɔ-wooi ma.

⁷ Tãi ŋá kɛ̀ la mɛni kpɔ̂lu sui, ŋá ítòli, kpɛ́ni fêi, yá ƃé yà ŋ́oo su tòo.

⁸ Óo Ǹuu-namui, ɣâla da fé náa nyii m̀oloŋɔ̂ɔi yâ, díta fé naa nyii a pɔ̂ri ípɔɔ kɔ̂ɔnii.

⁹ Óo Ǹuu-namui, yá ƃé ǹɔii-ŋûŋ-ŋai kélee kpɛ̀tɛ. Da pâi díŋuŋ maa pîlanii dí ífɛli. Da pâi íwala-wala-laa kɛ́tɛi maa tɛ̂i.

¹⁰ Íwala-walaai, íkɛ mɛni kpaya-kpaya ŋa kɛ̀. Ya tɔnɔ kpéŋ ƃa Ɣâla.

¹¹ Óo Yâwɛɛ, zɛŋ lɛ́ ḿâ nyii ya ŋ̀wɛ̂lii ŋá gɛi, gɛ̀ ní ŋa pâi íwoo mɛnîi a teniŋ ƃô pere. Ǹɛɛ naa ŋá ƃâa kɛ́ yâ, ŋá tíi kɛ́ yɛ̂ɛ a ńii kélee.

¹² Óo Ǹuu-namui Ɣâla, ŋa pâi kɛ̂i nɔ́ ílaa maa tɛ̂i a ńii kélee, ŋa pâi íkɛtɛ laai maa tûŋ toôi wɔ́lɔ-wɔlɔ.

¹³ Kpɛ́ni fêi, íwɔlɔ-wɔlɔ wɛli-kɛ-maai káa naa ḿaa mɛ̂ni ma. Ya ŋ́gula m̀olôŋ su.

¹⁴ Óo Ɣâla, ŋɛi-tɛ̂-ƃela da tɔɔ ḿâ. Ŋwana lɔ̂ɔ-nuu kpulu a ŋ̀wɛ̂lii é ḿbaa, ǹûai nyii-ŋai dífe díwoli tɔ̂ɔi yâi.

¹⁵ Óo Ǹuu-namui, íkaa a ŋɛi-maloŋ kâa da wɛli-kɛ-maa Ɣâla. Ílii kpelêɛi, íkɛ ƃò a wɛli-kɛ-maa nuu teniŋ ƃôɔɔ.

¹⁶ Tínaŋ ḿbɔ naa pere í malôŋ káa, í ŋ́gbonôi kpanaŋ, íŋuŋ ḿâ ƃò, kpɛ́ni fêi, ŋa tíi kɛ́ yɛ̂ɛ, yɛ̂ɛ berei ńee è wɔ́lɔ gɛ̀ lai.

¹⁷ Óo Yâwɛɛ, ímɛni lɛ́lɛɛi maa ŋɛi-kɛ-maai lɛ́ ḿâ, a gɛ̂ɛ diai ḿɛlɛ kpɛɛ̂i díkoi díŋumɛ, tãi da gàa la a gɛɛ ya ŋánɛnɛ, yɛ̂ kpɔŋ mâa tɛɛ ḿbɔi.