Mąątɛ̨nɛ̨ 78 - Bible

Berei Ɣâla è ŋɔnûai mɛi kâa lai

Asafa ŋɔwulei

¹ Ŋánûa, ka káwoli tɔ́ɔ ŋásɛŋ lɛ́ɛi ma. Ka káwoli tɔ́ɔ m̀ɛnii ma ŋa pâi môi kâai.

² M̀ɛni-ŋai da wɔ́lɔ kɛ́i, ŋa pâi môi kâa a táre woo-ŋa, ŋá m̀ɛni mĩli-mili-ŋai ŋáa lɛ́ kâa kɛ̀ tãi su kôya tɛɛ pôlu mai.

³ M̀ɛni-ŋai kú m̀ɛni kú gɔ́lɔŋ, kúnuu pɔlɔ-ŋai ƃé m̀o kûa.

⁴ Kúfe pâi ǹoôi kúnîa-pɛlɛɛi dîa. Kwa pâi môi dîa, diaŋ dí m̀ó díwɔ̂ lonii dîa. Kwa pâi Yâwɛɛ ŋɔwála-wala-laai da gɛ́-mɛni kpaya-kpayai maa mɛni ƃôi dîa, da mɛni maa pɔlɔ-pɔlɔ-ŋai a gɛ́i.

⁵ È tɔ̂ŋ-ŋa tɛ̀ɛ Eezuɛ-ŋai pɔ́, nyii-ŋai díkaa a Zeeka ŋɔsuui su-ƃelai. È m̀o dîa a gɛɛ dí dɔ̂ŋ-ŋai ŋí lɛ́ dílônii dîa

⁶ a gɛɛ dia máŋ dí maa kɔ́ri dí gɔ́lɔŋ, a gɛɛ dia máŋ da pɔ̂ri ǹɛ̂i díwɔ̂ lonii dîa.

⁷ A kɛ̀ tí, da pâi lâai a Ɣâla, gɛ́ mɛni-ŋai maa kíli kɛ́ ƃò díkili ŋá, díkɛ ŋɔtɔ̂ŋ-ŋai mɛi kâa,

⁸ a gɛɛ dífe kɛ̀ yɛ̂ɛ dínâŋ pɔlɔ-ŋai nyii-ŋai kɛ̀ a dítɔɔ Ɣâla mai. Dílaa-laai su fé kɛ́ ní a gbanaŋɔɔ Ɣâla mɛni ma. Kili-kɛ-zu fé kɛ́ ní díyêei m̀ɛni ma.

⁹ Ifiraŋ kɔ kɔ́-ƃelai kélee díkerâŋ-ŋa díkɛ díyêei da dítɔ̃a-ŋa. Kɛ́lɛ gɔ́i káa dîɛi, dí pù dí lène pôlu.

¹⁰ Gbanaŋ-wooi Ɣâla è gɛ̀ díyêei, dífe m̀ɛi káa ní. Dífe díwoli tɔ̀ɔ ní ŋɔtɔ̂ŋ ma.

¹¹ Dí nîa m̀ɛni-ŋai dîa è gɛ̀i, da ŋ̀ɛi kɛ́-maa-ŋai dí naa kàai.

¹² Dínâŋ pɔlɔ-ŋai dí ŋ̀ɛi kɛ́-maa-ŋai naa kàa Ɣâla è gɛ̀ Zoaŋ tiŋ-tiŋ su Ize lɔii sui.

¹³ È yúo ƃèla díperêi dí tɛ́ɛ zâmai. È ǹyái ƃèla é dɔ̀ɔ yɛ̂ɛ ya-gaaŋ-ŋa.

¹⁴ È gɛ̀ ɣele-kɔlɔŋ kole kɛ́ ƃò dítuɛ gɛ́ díteniŋ tɔ̀ɔ, ǹyaŋ ŋɔŋ lêŋ è kɛ̀ nɔ́ dítuɛ-pere a kpíni kélee.

¹⁵ È kɔni-ŋa su ƃèla vɛ̃ɛ-kpâlaŋ su yá é kúla naa yɛ̂ɛ a kùla ya lêe su.

¹⁶ È gɛ̀ yá é kúla kɔni su gɛ́ ɣîliŋ yɛ̂ɛ ya lêe.

¹⁷ Kɛ́lɛ m̀ɛni-ŋai ŋí kɛ́ɛ su Eezuɛ-ŋai dí kɛ̀ nɔ́ sɔnyɔ̂ŋ kɛ̂i a Ɣâla. Dí tɔ̀ɔ Ŋ̀âla Kɛ́tɛi ma vɛ̃ɛ-kpâlaŋ su.

¹⁸ Dí gìri kpɔ́ dí Ɣâla su kɔ̂ɔŋ. Dí Ɣâla marê kɛ̀ m̀ii-sɛŋ mɛ̂ni ma dí kɛ̀ ŋ̀wɛ̂lii a wála-wala-laa.

¹⁹ Dí lòno a ǹyɔ́mɔɔ é pîlaŋ Ɣâla ma dîyɛɛi, “A pɔ̂ri mii-sɛŋ tɛɛ̂i kúpɔ vɛ̃ɛ-kpâlaŋ ŋí su?

²⁰ Gáa a tɔ̃yâ è gɛ̀ yá é kúla gɔnii su é gɛ́ ya-lêe é láa vɛ̃ɛ-kpâlaŋ su. Kɛ́lɛ a pɔ̂ri kpólo tɛɛ̂i da fɛnɛ-sɛŋ ŋɔnûai mɛni ma?”

²¹ Yâwɛɛ kɛ́ɛ a díwoo-ŋai ŋí mɛ́nii, è ǹíi ŋwàna kpɔ́ a ŋánaa Zeeka ǹônii nyii gáa a Eezuɛ-ŋai dîa, é ŋɔŋ píli dîa é díkereŋ. È ǹíi ŋwàna dîa a zu kɛ̂tɛ,

²² kpɛ́ni fêi, kili kɛ-zu da laa-laa fé kɛ́ ní díyêei a gɛɛ a pɔ̂ri díŋuŋ maa ƃôi.

²³ Kɛ́lɛ berei máŋ è kɛ̀ tí lai, è lòno ŋ̀elei pɔ́, ŋ̀ele-kɔlɔŋ lá é ƃó.

²⁴ È mana kùla ŋ̀ele su é dɛ́ɛ dípɔ a gɛɛ dí mìi. È gbóloi ŋí kùla ŋ̀ele kɔ̂lɔŋ su é dɛɛ dípɔ.

²⁵ M̀ɛni ma Eezuɛ-ŋai dí ŋ̀âla-taa kela-ŋai láa mii-sɛŋ da mìi. Ǹyaŋ m̀ii-sãai kélee díkɛ wɛ̂lii lai, Ɣâla è dɛ̀ɛ dípɔ.

²⁶ Nya ƃe Ɣâla è gɛ̀ fãa su kpánaŋɔɔ é kúla vóloi kulâi pere. Ŋɔwála-wala-laai su, è gɛ̀ fãa é kúla máŋ séɣai perei.

²⁷ Vãai ŋí è pà a ŋɔni támaa. Dí kɛ̀ kpɔ́ a dítamaa yɛ̂ɛ yúo su ŋãya.

²⁸ Ŋ̀ɔni-ŋai ŋí dí pù m̀ûui sâmai dí naa lá fɛ́ɛ.

²⁹ Nya ƃe ǹûai dí dímii kpɔ́ dílii é láa. M̀ii-sɛŋ ŋí ƃé díkɛ̀ ŋ̀wɛ̂lii Ɣâla è dɛɛ dípɔ.

³⁰ Dí kɛ̀ kpɔ́ nɔ́ m̀ii-sãai ŋí miî vé kpɛ̀ɛ ní díla.

³¹ Ɣâla é ǹíi ŋwàna dîa a zu kɛ́tɛ é zinâa wála-walai páa, da Eezuɛ nyaŋkpa sɔŋ lɛ́lɛɛ-ŋai dámaa.

³² Nyíŋi-ŋai kélee kɛ́ɛ su, dí kɛ̀ nɔ́ sɔnyɔ̂ŋ kɛ̂i. Dífe láa ní kɛ̀ a Ɣâla berei máŋ è ŋɛi kɛ́-maa támaa kɛ̀ la díŋɛi-tuɛi.

³³ Nya ƃe è gɛ̀ mɛni kpɔ̂lu ŋánaa é láa dîa dífulu-laai su, é gɛ́ dífulu-laai su é kpua.

³⁴ Kɛ́lɛ tãi nɔ́ a kâa da-ŋa pàa lai, gbéli-ŋai da lɛ̂ɣɛ la. Da dílii pène dí Ɣâla fɛli kpɔ́ a gbanaŋɔɔ.

³⁵ Ɣâla maa mɛ̂ni kíli a tôo díkili ŋá dí gɔ́lɔŋ ǹyaa ƃa dímaa kɔ̃ɔ-nuui. È wɔ́lɔ pà díwɔlɔ-wooi ma.

³⁶ Díwoo kélee è kɛ̀ nɔ́ a lɛ́ɛ tee-tee. Teniŋ ƃô-laa fé kɛ́ ní díkɛ mɛni da su.

³⁷ Dífe kɛ́ ní a díteniŋ ƃóɔɔ ǹyêei. Dífe díkono têe-ŋai ŋ̀aa-see kɛ́ ní.

³⁸ Kɛ́lɛ Ɣâla káa a maloŋ kâa Ɣala. È dísu mɛni lɛ̀ɛ zɔnyɔ̂ŋ-ŋai dí gɛ̀i m̀ɛni ma. Vé dísu kara ní. È ǹîi ŋwàna dîa a tãi támaa, kɛ́lɛ ǹíi ŋwânai fé tɛ̀ɛ ní ǹíi pôlu.

³⁹ È gɔ̀lɔŋ a gɛɛ díkaa nɔ́ a núu-kpune-ŋa. Díkaa nɔ́ yɛ̂ɛ fãa nyii a tɛ̀ɛ va ŋɔ́nɔ lène pôlui.

⁴⁰ Díkɛɛ vɛ̃ɛ-kpâlaŋ sui, dí tɔ̀ɔ Ɣâla ma a tãi támaa. Dí gɛ̀ ǹíi é tóo pôlu a tãi támaa!

⁴¹ Dí zu kɔ̀ɔŋ a tãi támaa. Dí gɛ̀ Eezuɛ Ŋɔɣâla Maa Waai líi su é kara-kara dímɛni ma.

⁴² Dí nìa ŋɔwála-wala-laai ma. Dí nìa ŋ̀elei ma è díkùla la díkpɔara-ƃelai yêei.

⁴³ È mɛni kpaya-kpaya-ŋa kɛ̀ da ŋɛi kɛ́-maa sii támaa Zoaŋ tiŋ-tiŋ su Ize lɔii su.

⁴⁴ È Ize yá-lee-ŋai pêne a ŋãa. Yá lɛ́lɛɛ fé ŋɔ́nɔ kɛ́ ní naa gbele mɛ̂ni ma dîɛ.

⁴⁵ È lilî-ŋa tɛ̀ɛ dí pú dîa dí mɛni ŋánaa kɛ́ a dia. È lofo-ŋa tɛ̀ɛ dílɔii su dí naa kara.

⁴⁶ È gotó-ŋa tɛ̀ɛ a gɛɛ dí dísi-sãai míi, dí díkpâlaŋ-ŋai ŋá kara.

⁴⁷ È dísi-sãai da ŋ̀úru-ŋai kélee su kara a sãɔɔ da ya-fɛ̂ɛ.

⁴⁸ È díniŋa-ŋai su-kara a sãɔɔ é díƃála-ŋai da díƃoli-ŋai su kara a ŋ̀ele-gbâna ŋɔŋ.

⁴⁹ È mɛni kpɔ̂lu támaa làa dîa. È ǹíi ŋwàna kpɔ́ dîa é núu paa ɣâla-taa kela-ŋa too dísama.

⁵⁰ Vé ǹíi ma soŋ ní, é dímaloŋ káa, kɛ́lɛ é kɔlɔ-fela nyɔ́mɔɔ pìli dîa dí sáa.

⁵¹ È Ize sii-ŋai dílônii sinaai maa-ŋuŋ-ŋai kélee pàa, nyii-ŋai kɛ̀ a díkili tɔ̂ɔ maai.

⁵² Nya ƃe è tɔ̀ɔ ŋɔnûai túɛ yɛ̂ɛ ƃála mɛi káa nuu, é tɛ́ɛ a dia vɛ̃ɛ-kpâlaŋ su.

⁵³ È tɛ̀ɛ a dia nɛ́ŋkpɛlɛɛ, yao da fé kɛ́ ní díkɔlɔi. Kɛ́lɛ dítɛ̀ɛi, yúo è tèe é sía díkpɔara-ƃelai mɛi.

⁵⁴ È pà a dia ŋɔlɔii maa waai ma ǹyée-ŋai dîa nyii ǹyaa kpîŋ è naa sòŋ.

⁵⁵ È kɛ̀ dítuɛ pere gɛ́ lɔii ŋuŋ-ŋa kpɛ̀ díperêi díkɛ lì. È lɔii-ŋuŋ-ŋa su-ƃela dílɔii kûla díyêei, é ŋáa kɔ́lɛ Eezuɛ sii-ŋai dîa.

⁵⁶ Kɛ́lɛ dí tɔ̀ɔ Ŋ̀âla Kɛ́tɛi ma dí zu kɔ̂ɔŋ. Dífe díyee see ní ŋɔtɔ̂ŋ mu.

⁵⁷ Kɛ́lɛ teniŋ ƃô fé kɛ́ ní díyêei. Dí tùa nɔ́ yɛ̂ɛ dínâŋ pɔlɔ-ŋai. Wôya ŋánaa è díkpĩniŋ yɛ̂ɛ kerâŋ wuru.

⁵⁸ Dí díkpîŋ ɣala-ŋa fɛli kwaa-ŋa ma kpɛ̀tɛ, díkɛ díkpîŋ kpɛtɛ ɣâla-ŋai fɛli naa.

⁵⁹ M̀ɛnii ŋí è ŋwàna Ɣâla ma tãi è ǹaa kàa lai. Nya ƃe è ǹyée kùla kpɔ́ dímɛni su kpúŋ-kpuŋ.

⁶⁰ È kùla ŋɔƃûui su Silo taa-leei su ƃɛ́i zeɛ́ɛ è kɛ̀ naa díkɛ vɛlii.

⁶¹ È gɛ̀ díkpɔara-ƃelai dí díyee mɛi ɣále, dí Gbanaŋ-woo kɛ́ɛ maa gãlai sóŋ nyii gáa a ŋɔwála-wala-laai da ŋɔfólo-laai.

⁶² È ǹíi ŋwàna ŋɔnûai dîa, é gɛ́ díkpɔara-ƃelai dí dípaa a ƃóa sɔkpɔ-ŋa.

⁶³ Dí ǹyaŋkpa-ŋai pàa, dínɛyâai dílɛɛ a pɔɔ-nɛyaa.

⁶⁴ Dí dísâla láa soŋ-ƃelai pàa a ŋwana-lɔ̂ɔ pere. Pɔ̂ri mâa fé kɛ́ ní dínɛyâai dîɛ a gɛɛ dí maloŋ see ƃó dímɛni ma.

⁶⁵ Gbɛɛ ŋái, Ǹuu-namui è mù sìɣe yɛ̂ɛ núu ƃé a kùla nyiî. È kɛ̀ yɛ̂ɛ kpakolo wála-walaa ƃé a ŋwã̂ai támaa kpéle.

⁶⁶ Ɣâla è gbɔara-ƃelai tàa-taa é ƃaa kúla maa kpɛ́ɛ pôlu sɛ̂lɛŋ dîa wɔ́lɔ-wɔlɔ da wɔ́lɔ-wɔlɔ.

⁶⁷ Kɛ́lɛ è ǹyée kùla Zosɛ ŋɔsuui su-ƃelai mu Ifiraŋ lɔii-kpiniŋ su.

⁶⁸ È Zuda ŋɔsîi sìɣe zu da Zãiyɔŋ Yeei ma ƃɛ́i è naa wɛ́lini a ŋ̀ánaai.

⁶⁹ Naa ƃé è ŋɔpɛ́rɛ kɛ́tɛi tɔ̀ɔ naa naa kɛ́ ƃò yɛ̂ɛ bɔ́-taai ɣâla-taa da ǹɔii ma nyii è naa kpɛ̀tɛ wɔ́lɔ-wɔlɔ da wɔlɔ-wɔlɔ mɛni mai. Núu a kɛ̀ naa ŋuŋ ma ƃô káa ǹyêei.

⁷⁰ È Deeƃé sìɣe zu é gula m̀ála-ŋai mɛi káa kwaai ma

⁷¹ ƃɛ́i è kɛ̀ m̀ála-ŋai mɛi kâai naai, é gɛ́ a kâloŋ Eezuɛ-ŋai mɛi a gɛɛ gɛ́ dímɛi kâa.

⁷² Deeƃé è ǹûai ŋí mɛi kâa a teniŋ ƃô da táre pere.