Mąątɛ̨nɛ̨ 76 - Bible

Ɣâla ƃa ǹyee mɛi ɣâle nuui

Asafa ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ dí kɛ́ dòo a kɔnîŋ

¹ Zuda-ƃelai dí Ɣâla kɔ́lɔŋ. Eezuɛ-ƃelai da ƃaa kɛ́-maa tɛ̂ɛ Ɣâla pɔ́.

² Ɣâla pɔ́-taai ƃa Zerusâlɛŋ. Zeɛ́ɛ káa Zãiyɔŋ Yeei ma.

³ Naa ƃé è ŋɔkpɔara-ƃelai dítɔ̃a-ŋai su-kara naa, díkpala ŋá ɣále kɔli-ŋai, díƃoa-sɔkpɔ-ŋai da díkɔ kɔ́-sãa gbéli-ŋai.

⁴ Óo Ɣâla, ífolo-laai kpanaŋɔɔ̂i é tɛ́ɛ ǹyée-ŋai dîa nyii-ŋai díkaa naa wɔ́lɔ-wɔlɔi.

⁵ Zãâi díkɔ-kuluƃa líi kpeleɛɛ-ŋai dí zìɣei, í gélee kùla dí yêei. Ǹyaŋ díkaa nâa lâani a dípoma, dífa ŋɔ́nɔ pɔ̀ri mɛni da kɛ̂i.

⁶ Óo Zeeka Ŋɔɣâlai, tãi í dímaa yâo lai, dísoo-ŋai da zia-ƃela dí tòo, dí sáa.

⁷ Kɛ́lɛ yá Yâwɛɛ, núu-kpune kélee da yâo yâ. Ya ílii ŋwàna, núu da fa pɔ̂ri tɔɔ̂i íŋɛi-tuɛ.

⁸ Í lɛ̀ɛ Ɣâla-taa í mɛni ŋá tée ǹɔii ma. Diai kélee ǹɔii mai dí yâo dí dímɛi sáa,

⁹ tãi í ímu-siɣe la a gɛɛ í ǹûai dí mɛnii ŋá têei í diai ŋuŋ ma ƃó pɔ̂ri mâa fé dîɛi.

¹⁰ Ya gɛ̀ núu à kɛ̀ a ǹíi ŋwánaa, é ílaa maa tɛ́. Diai dífa sâa ílii ŋwânai sui, da íɣele kûu maa waa-ŋai mɛi kâa.

¹¹ Zãâi í íkono tèe la Íɣâlai Yâwɛɛ yêei, dɛɛ bɔ́. Káai kélee a ǹɔii-ŋûŋ-ŋai su-ƃelai, ka ká sama-sãai tɛ́ɛ bɔ́. Gáa a Ɣâla ǹyaŋ fɛ̂ɛ kú yao ma.

¹² Ɣâla a ǹúu láa-tuɛ-ƃela su-mɛni kɛ́tɛɛ-ŋai ŋáa yèŋ, é gɛ́ ǹɔii ŋuŋ-ŋai mɛi kâloŋ-ŋai dí yao m̀a.