Mąątɛ̨nɛ̨ 74 - Bible

Ɣâla fɛliɛɛ ǹɔii ŋûŋ ŋ̀uŋ maa ƃó mɛni ma

Asafa ŋɔwulei

¹ Óo Ɣâla, ya íyee kulâi kúmu a gɛɛ ŋí lé mɛni ma? Ya pâi kɛ̂i nɔ́ a ílii ŋwánaa íkpɔɔi-ƃelai dîa?

² Ínûai í dísìɣe zu tãi su kôyaa tɛɛ pôlu mai, dímaa mɛ̂ni kíli é lɛ́ɛ íkili ŋá. Í díkùla luɛ-laa su í dí kɛ́ a íkpɔɔi nua. Zãiyɔŋ Yeei íseêi è wɔ́lɔ kɛ̀ naai, maa mɛ̂ni kíli é lɛ́ɛ íkili ŋá.

³ Pá í ƃɛ́i káa da nàa su kàrai. Kúkpɔara-ƃelai da zãâi kélee su-kara kɛ̀ Ípɛrɛ Kɛ́tɛi mui.

⁴ Íkpɔara-ƃelai daâ í kwaa maa waai naa sìɣe. Da ƃenâ-ŋa tɔɔ naa a yee mɛi ɣâle maa ŋɛi-kɛ-maa sãa. Díkaa naa dí kɛ́ làɣi ɣelêi pere.

⁵ Díkaa yɛ̂ɛ wolâ pɔŋ kpakolo-ŋa ƃé wúru pɔnîi a díyuɔ̂-ŋai.

⁶ Da ípɛrɛ maa-waai mu wuru saa-ŋai su tée-tee a díyuɔ̂-ŋai da díkpɔkpɔ-ŋai.

⁷ Dâa Ípɛrɛ Kɛ́tɛi maa tĩa kara, da ƃɛ́i kwa kâa ílaa maa tɛ̂ naai kéreŋ.

⁸ Dí kɛ̀ ŋ̀wɛ̂lii dí kúkelee kúsu kara kpúŋ. Dí ŋ̀âla fɛli kwaa-ŋai kélee ma kéreŋ kúlɔii su.

⁹ Kúfe ŋɔ́nɔ zãâ maa waa-ŋai da maa ŋɛi kɛ́ maai da kâai. Ɣâla ŋɔlóno kɛ́-ƃelai da fé ŋɔ́nɔ naa. Núu da fé gɔ́lɔŋ lé tãi ƃé m̀ɛnii ŋí ŋáa a pâi yenîi lai.

¹⁰ Óo Ɣâla, tãi ɣɛɛlu ƃé kúkpɔara-ƃelai da pâi kɛ̂i ɣɛ́lɛ-maa kulâi la kúkponoi? Da pâi wɔ́lɔ kɛ̂i nɔ́ woo yɔ̂ŋ pilîi yâ wɔ́lɔ-wɔlɔ da wɔ́lɔ-wɔlɔ?

¹¹ Ífe ŋ̀wɛ̂lii í kpɔ́ŋ kûa lé mɛni ma? Lé ƃé ya m̀aa kpɛ́nîi í lɛ́ɛ pâi dí kula maa kɛ̂i?

¹² Óo Ɣâla, yá nɔ́ ƃa kúkâloŋ é kúla gɔ́ɔ pîlaŋ tãi ma. Ya kúŋuŋ maa ƃó tãi támaa yée mu.

¹³ Í yúo ŋáa kɔ̀lɛ a íwala-wala-laai. Í ǹyúo zere-kalii kɔŋ ɣâle,

¹⁴ í ŋ̀uŋ wólo, í dɛ́ɛ vɛ̃ɛ-kpâlaŋ su fɛnɛ-sãai pɔ́ a díkɔnɔ̃ŋ.

¹⁵ Í ǹyá-ɣɛli pɛlɛ-pɛlɛɛi kɛ̀ dí fɛ́ɛ, í gɛ́ ǹyá-lee-ŋai dí kpála.

¹⁶ Yá ƃé ŋ̀ele-ƃɔɔi da gbínii kpɛ̀tɛ, í vóloi da ŋáloŋ tɔ́ɔ dítɔɔ̂i.

¹⁷ Í ǹɔii kɔ́yɛŋ làa, í vólo lá-ƃoɔɔi da zama yâi loai láa.

¹⁸ Óo Yâwɛɛ, gáa berei íkpɔara-ƃelai da ɣɛ́lɛ maa kulâi la íkponôi. Dífe a Ɣâla-ƃela. Dífe íkɔlɔŋ. Da díyee kulâi ímu.

¹⁹ Ínûa fíi kpɛɛ-ŋai kúla díkpɔara-ƃelai yêei. Ífe íyee kùla ínûai mu.

²⁰ Gbanaŋ-wooi í gɛ̀ díyêei, ífe ǹia m̀ɛni ma. Núu nyɔ́mɔɔ-ŋa díkaa ǹɔii m̀éla kélee ma.

²¹ Ífe nɛ̀ɛ naa ínûai díkpɔara-ƃelai dí ƃâa kula dîa. Gɛ́ gôlo-ƃelai da diai pɔ̂ri mâa fé dîɛi, dí ílaa ma tɛ́.

²² Óo Ɣâla, ímu-siɣe í lóno é pîlaŋ íkpîŋ ma. Gɔ́lɔŋ a gɛɛ diai ímaa mɛ̂ni gbáaŋ fé dîai, da ɣɛ́lɛ maa kulâi íkponôi.

²³ Íkpɔara-ƃelai da lâɣii ɣelêi pere a lii ŋwâna pere. Dílaɣi-woo káa nɔ́ tɛ̂i ɣelêi va kpêra.