Mąątɛ̨nɛ̨ 61 - Bible

Ɣâla fɛliɛɛ maa kɔ̃ɔ mɛni ma

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ díkɛ dòo a ɣale-sãai

¹ Óo Ɣâla, ŋ́wɔlɔ-wooi mɛ́ni, í íwoli tɔ́ɔ ŋáfɛli-wooi ma.

² Pɔ̂ri mâa fé ŋɔ́nɔ mî. Ŋ́gaa kwaa kôya ma ŋ́gɛ ítòli kpɔŋ mâa mɛni ma. Ńziɣe í ŋ́uŋ ma ƃó,

³ kpɛ́ni fêi, ya ƃa ŋ́uŋ ma ƃó nuui. Ya ƃa ḿaa kɔ̃ɔ ŋ́gbɔara-ƃelai yêei.

⁴ Ǹɛɛ naa ŋ́gɛ ƃò ípɛrɛ maa waai mu ŋáɣeniɛi su. Tɔɔ ŋá kɛ́ íkoôŋ mu.

⁵ Í ŋákono tee-woo-ŋai kɔ́lɔŋ, óo Ɣâla. Diai da ífɛ̀lii, ya díkɔ̃liŋ tɛɛ ḿbɔ.

⁶ Gâloŋ ŋɔkóraŋ da pú ma. Tɔɔ é kɛ́ ɣele ma wɔ́lɔ-wɔlɔ da wɔ́lɔ-wɔlɔ.

⁷ Ǹɛɛ naa é ŋɔnûai téniŋ tɔ́ɔ wɔ́lɔ-wɔlɔ da wɔ́lɔ-wɔlɔ, óo Ɣâla. M̀aa kɔ̃ɔ a íwɛli kɛ́ maa kpanaŋ da teniŋ ƃô-laai.

⁸ M̀ɛni ma, ŋa pâi kɛ̂i laa maa tɛ̂ wule-ŋa toôi ya, ŋ́gɛ ŋákono tee-ŋai ŋ̀aa-see kɛ̀ íyêei a ɣele kélee.