Mąątɛ̨nɛ̨ 41 - Bible

Kɔlɔ-fela nuu ŋɔɣâla fɛli wooi

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Lûwa káa diai dîa díkpaaŋɔɔ̂i gôlo-ƃelai mɛni mai. Da kɛ̀ mɛni kpɔ̂lu su, Yâwɛɛ a pâi dí kulâi zu.

² A pâi dímaa kɔ̃ɔ̂i gɛ́ dímɛi kâa, lii-see kɛ́ ƃò díyêei ǹɔii ma. Vé pâi ǹɛɛ̂i naa díkpɔara-ƃelai da é díyee mɛi ɣále.

³ Da kɛ̀ kɔlɛ̂i a pâi díƃâloi, é gɛ́ dítoo díkɔlɔi, díkponoi é kpanaŋ.

⁴ Ŋá m̀o ńyɛɛ, “Óo Yâwɛɛ, ŋa sɔnyɔ̂ŋ kɛ́ a yá, ḿaloŋ káa í ḿbalo!”

⁵ Ŋ́gbɔara-ƃelai díkili ŋa siâi nyɔ̂mɔɔi é pîlaŋ ḿâ. Da ŋ̀wɛ̂lii nɔ́ ŋá sáa nûa dí nia ńaa ma.

⁶ Da a pà ńaa kâai, ŋ̀óoi a m̀o ḿâi, gáa a dee ǹíi su pere ŋ̀ɔi ma. A lì pôlu gɛ ńaa ƃò a ǹyɔ́mɔɔ, gɛ́ lì a ńaa nyɔ́mɔɔ ƃɛ́i kélee a lî naai.

⁷ Ŋ́gbɔara-ƃelai da kɛ́ lônoi díkîe ni pɔ́ ninîŋ woo su é pîlaŋ ḿâ, díkɛ mɛni kpɛtɛɛ nyɔ́mɔɔ-ŋa kɛ̀ a gɛɛ dí gɛ́ ŋámɔ̃lɛ-laai su é kôya.

⁸ Da kɛ́ m̀ôi dîyɛɛi, “Gɔlɔ-felai tí mai gáa a kɔlɔ-fela kpanaŋ. Vé pâi kulâi zu.”

⁹ Ŋáwɛli kɛ́-maa-ƃelai kpîŋ ńâai a diai, kwa dîa ni kwa kâa kúlaa mii gîe mai, díkelee da tɔɔ ḿâ.

¹⁰ Óo Yâwɛɛ, ḿaloŋ káa í gɛ́ ŋá ŋɔ́nɔ tóo ŋ́gɔlɔi, ŋ́gbonoi é kpanaŋ, m̀ɛnii ŋ́gbɔara-ƃelai da gɛ́ a ńyãai, ŋá gba kula dîa.

¹¹ A kɛ̀ tí, ŋa pâi gɔ̂lɔnii a gɛɛ ílii lâai ḿɛni ma, ŋ́gbɔara-ƃelai yée fa pɔ̂ri tɛɛ̂i ḿâ.

¹² Ya pâi kɛ̂i ŋ́gɔlɛ a ɣele kélee íkɛ kpɔŋ ḿâ, kpɛ́ni fêi, ńdûa pere kélee sãâi.

¹³ Ka laa maa tɛ̂ tɛɛ Eezuɛ Ŋɔɣâlai Yâwɛɛ pɔ́! Ka laa maa tɛ̂ tɛɛ bɔ́ wɔ́lɔ-wɔlɔ da wɔ́lɔ-wɔlɔ. É kɛ́ tí! É kɛ́ tí!