Mąątɛ̨nɛ̨ 39 - Bible

Kɔlɔ-fela nuu ŋɔsɔnyɔ̂ŋ ƃó-wooi

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui Zedutɔŋ pɔ́ naai

¹ Ŋa m̀o ńyɛ̂ɛi, “Ŋa pâi ḿɛi kâai. Fé pâi ǹɛɛ̂i naa ńɛŋ é gɛ́ ŋá píli sɔnyɔ̂ŋ su. Ŋa pâi ḿɛi saâi ŋwana-lɔ̂ɔ-nuu da a kɛ̀ ŋ́gɔlɛ.”

² Ŋá ŋ́gbîŋ kɛ́ a mûgbɛ nuu. Ŋa ńii kpéle ŋa fɛ́ɣɛ. Ŋámɔ̃lɛ-laai su a kɛ̂tɛi kpɔ́ nɔ́ gɔ́yɛ̃ŋ fé ma.

³ Ńii a sɛ̂lɛnii a ŋánaa. Berei nɔ́ ŋà kɛ́ ŋ́gili ŋá siâi la a ŋ̀ánaai, bere nɔ́ ƃé ŋálii sɛ̂lɛŋ su a kɛ́ kɛ̂tɛi la. Nya ƃe ŋá mare kɛ̂ɛ kɛ̀ ńyɛ̂ɛi,

⁴ “Yâwɛɛ, ɣele ɣɛɛlu ƃé a lɛɛ ńyêei ǹɔii ma ƃɛ́i? Lé tãi ƃé ŋa pâi saâi lai? Ńzaa tãi lɛ́ ḿâ.”

⁵ Gáa berei yâ ŋáfulu-laai su kpua lai! Ŋáfulu-laai maa mɛ̂ni fé íŋɛi a sɛŋ da. Núu-kpune ŋɔfúlu-laai káa nɔ́ yɛ̂ɛ fãa lâɣi.

⁶ Núu-kpune káa nɔ́ yɛ̂ɛ ninîŋ. Gɛ́ mɛni kélee káa nɔ́ kpɛ́ni-kpɛni. A tɔɔ-sãa sɔlɔ ƃô kɛ́lɛ vé gɔ́lɔŋ gbɛ̂ɛ ƃé a lɛ̂ɛ ǹyêei.

⁷ Ǹuu-namui, gbɛ̂ɛ ŋaŋ ƃé ŋa pɔ̂ri ŋ́gili tɔɔ̂i mai? Yá nɔ́ ƃé ŋ́gili tɔɔ̂i yâ.

⁸ Ŋ́gula ŋásɔnyɔ̂ŋ-ŋai kélee su. Ífe ǹɛɛ naa ƃoo-nuu da é ɣɛ́lɛ maa kúla ŋ́gbonôi.

⁹ Ŋa pâi ńa tɛ̂i, fé pâi mɛni da kélee ƃôi. Yá ƃé gɛ̂i ŋ́gɛ m̀ɛni sôlii ŋí sɔlɔ ƃô a dáre kɛ́ɛ ŋí.

¹⁰ Ífe ŋɔ́nɔ ŋ́gula maa kɛ̀. Ya ńdûa kpɔ́ a ŋ̀ánaa ŋa kɛ́ saâi.

¹¹ Ya kúkula maa kɛ́ zɔnyɔ̂ŋ-ŋai kwa gɛ̂i m̀ɛni ma. Ya kúnîa mɛni-ŋai su kara yɛ̂ɛ fili a wúru mìi. É máŋ kɛ́ tí, fãa kpîŋ maa nɛ̃ɛ̂i é tɛ́ɛ kûa.

¹² Yâwɛɛ, ŋáfɛli-wooi mɛni, í íwoli tɔ́ɔ ŋ́ɔlɔ-wooi ma. Ŋa kɛ̀ wɔ̂lɔi, pá í kpɔ́ŋ ḿâ. Ŋ́gaa nɔ́ yɛ̂ɛ ŋánûa pɔlɔ-ŋai. Ŋ́gaa nɔ́ a ímaa ŋɔ̃ya tãi kpua yée mu.

¹³ Ye tée ḿâ a gɛɛ ŋá lii-nɛ̃ɛ kula a da loŋ, ŋá lɛ́ɛ pâi saâi.