Mąątɛ̨nɛ̨ 28 - Bible

Ɣâla fɛliɛɛ kpɔŋ mâa mɛni ma

Deeƃé ŋɔwulei

¹ Óo Yâwɛɛ, yá ƃa ḿaa kɔ̃ɔ nuui. Ŋa ítôlii, íwoli tɔ́ɔ ŋ́wɔlɔ-wooi ma. Ƃà wàla ŋ́oo su too, ŋa pâi kɛ̂i yɛ̂ɛ diai da saa, díkɛ ƃò m̀olôŋ sui díta.

² Íwoli tɔ́ɔ ŋ́vɛli-wooi ma kpɔŋ-maa mɛni ma, ŋa ńyee tɛ̀ ɣelêi ípɛrɛ maa waai naa pere.

³ Ífe ŋámɛnii ŋá tèe yɛ̂ɛ berei ƃa ŋ̀wana-lɔ̂ɔ-ƃelai dímɛnii ŋá tèe lai, m̀ɛni nyɔ́mɔɔ kɛ́-ƃelai, diai dílono-woo lɛ̂lɛɛi díla, kɛ́lɛ dílii su pere nyɔ́mɔɔ nûa da kpɛ́ni-ŋa mɛni mai.

⁴ Díkula maa kɛ́ m̀ɛni-ŋai da gɛ́i m̀ɛni ma. Díkula maa kɛ́ m̀ɛni nyɔ́mɔɔ-ŋai da gɛ́i m̀ɛni ma. Díkula maa kɛ́ dítua-pere nyɔ̂ŋ-ŋai kélee mɛni ma. M̀ɛni-ŋai kélee da gɛ̂i, dífela fé m̀ɛni ma.

⁵ Yâwɛɛ, gɛ́ tí, kpɛ́ni fêi, dífe íkɛ mɛni-ŋai kɔ́lɔŋ, kpaa máŋ íkpɛtɛ sãai. M̀ɛni ma, ya pâi díkula maa kɛ̂i, í dísu kara wɔ́lɔ-wɔlɔ da wɔ́lɔ-wɔlɔ.

⁶ Laa maa tɛ̂ tɛɛ Yâwɛɛ pɔ́, kpɛ́ni fêi, ŋ̀ɔ́lɔi ŋa gɛ̂i m̀a kpɔŋ mâa mɛni mai, a maa wôoi mɛni.

⁷ Yâwɛɛ ƃa ŋákponoi kpânaŋ da ŋáƃoa-sɔkpɔ ŋá-ɣale kɔli-kalaŋ. Ǹyaa ƃé ńâai là. A kpɔŋ mâa tɛ̀ɛ ḿbɔ gɛ́ gɛ̀ ŋ́gɛ lii-nɛ̃ɛ kùla. M̀ɛni ma, ŋa pâi laa ma tɛ̂ wule lɛ́lɛɛ-ŋa toôi a ǹáa.

⁸ Yâwɛɛ a ŋɔnûai maa kɔ̃ɔ gɛ́ kɔ̀ dímɛni ma. Ǹúui è zìɣe zu a kâloŋ, a kɔ̀ m̀ɛni ma gɛ́ ŋ̀uŋ ma ƃò.

⁹ Ínûai ŋuŋ ma ƃó, Ɣâla Yâwɛɛ. Lûwa láa diai dîa díkaa a ínûai. Kɛ́ yɛ̂ɛ ƃála mɛi káa nûu, íkɛ dímɛi kâa wɔ́lɔ-wɔlɔ da wɔlɔ-wɔlɔ.