Mąątɛ̨nɛ̨ 24 - Bible

Yâwɛɛ ƃa gâloŋ kɛ́tɛi

Deeƃé ŋɔwulei

¹ Ŋ̀éniɛi káa a Yâwɛɛ pɔ́ɔ da zu sãa kélee é pɛ́lɛ núu-kpune ma.

² È gbɛ́tɛɛ kɔ́ɔ pìlaŋ ǹya-lee-ŋai dîa, é seri la yúo kpóŋ ma.

³ Gbɛ̂ɛ ƃa pɔ̂ri tɛ̂i Yâwɛɛ ŋɔyéei mai? Gbɛ̂ɛ ƃa pɔ̂ri tɔɔ̂i ŋɔkwaa maa waai mai?

⁴ Dia ƃa diai dílii su waâi, diai dífa díkpîŋ ɣala kpɛtɛi, diai da kono têe kɛ̀ dí ŋ̀aa see kɛ́i.

⁵ Yâwɛɛ a pâi ǹyée seêi dímu é lûwa láa dîa. Díŋuŋ ma ƃó-nuui Ɣâla a pâi môi a gɛɛ dísɔŋ fé dîa,

⁶ kpɛ́ni fêi, da pâ Zeeka Ŋɔɣâlai pɔ́, dí vɛli, dí kɛ́ tíi kɛ̀ mì.

⁷ Ka ziɣãŋ-ŋai lá ƃó. Ka ŋ̀wɔ́lɔ-wɔlɔ kpoŋ-ŋai lá ƃó vólo-laa kaloŋ kɛ́tɛi perêi a gɛɛ é lɔ́.

⁸ Gbɛ̂ɛ ƃa Gâloŋ Kɛ́tɛi ŋí? Ǹyaa ƃa Yâwɛɛ. Gbonôi kpanaŋɔ̂ɔi wála-wâla-laa kɛ́ ƃò ǹyêei. Kɔ-kûluƃa da fa pɔ̂ri ǹyée mɛi ɣâlei.

⁹ Ka ziɣãŋ-ŋai lá ƃó. Ka ŋ̀wɔ́lɔ-wɔlɔ kpoŋ-ŋai lá ƃó vólo-laa Kaloŋ Kɛ́tɛi perêi a gɛɛ é lɔ́.

¹⁰ Gbɛ̂ɛ ƃa Gâloŋ Kɛ́tɛi ŋí? Ǹyaa ƃa Ŋ̀wála-wâla kélee Yâwɛɛ. Ǹyaa ƃa vólo-laa Kaloŋ Kɛ́tɛi!