Mąątɛ̨nɛ̨ 18 - Bible

Deeƃé ŋɔŋuŋ ma ƃô wulei

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai. Tãi Yâwɛɛ è Deeƃé ŋuŋ mâ ƃò la é gula Gâloŋ Sɔɔ yêei da ŋɔkpɔara-ƃela kpéli-ŋai kéleei, Deeƃé è Yâwɛɛ láa maa tɛ̀ wule-wôo su.

¹ Óo Yâwɛɛ, yá ƃa kponoi kpânaŋ tɛ̀ɛ ḿbɔ, ŋá íwɛlini.

² Yâwɛɛ ƃé gáa a ḿaa kɔ̃ɔ-nuu yɛ̂ɛ kɔni. Ǹyaa ƃé gáa a ŋ́uŋ maa ƃó-nuu. Ŋáɣâlai ƃé gáa a ḿaa kɔ̃ɔ-nuu yɛ̂ɛ kɔni. Ŋà kɛ̀ gɔ̀lɛ ŋa kɛ̂ a ŋ́uŋ ma ƃóɔɔ. A ḿaa kɔ̃ɔ yɛ̂ɛ kɔkuluƃa maa kɔ̃ɔ kɔli-kalaŋ. A ḿaa kɔ̃ɔ é ŋ́uŋ maa ƃó.

³ Ŋá Yâwɛɛ tòli é ŋ́uŋ ma ƃó ŋ́gbɔara-ƃelai yêei. Laa-maa tɛ̂ é tɛ́ɛ Yâwɛɛ pɔ́.

⁴ Saa ɣɛli è kɛ̀ a dínaŋɔɔ mâ, su-kara ɣilîŋ é ḿɛi pɛ́lɛ yɛ̂ɛ ya-fɛ̂ɛ.

⁵ Saa ɣɛli è kɛ̀ dínaŋɔɔ ḿâ, ƃolôŋ è ƃáre tɛ̀ ḿberêi.

⁶ Tãi ŋá kɛ̀ la mɛni-kpɔ̂lu sui, ŋá Yâwɛɛ tòli. Ŋá Ŋáɣâlai tôli a gɛɛ é kpɔ́ŋ mâ. È ŋ̀óli tɔ̀ɔ ŋ́wɔlɔ-woo mà é kpɔ́ŋ ḿâ. A lɛ̂ɛ ŋɔpɛ́rɛi mu é ŋ́oo mɛ́ni. A ŋ̀óli tɔ̀ɔ ḿvɛli-wooi ma é kpɔ́ŋ ḿâ.

⁷ Ǹɔii è kpɛ̃liŋ é túmo-tumo. Ǹyée-ŋai dia máŋ da kpɛ̃liŋ dí wólo-wolo dí pú zu, kpɛ́ni fêi, Yâwɛɛ è kɛ̀ a ǹíi ŋwánaa.

⁸ Luri è kùla zũai, ŋɔŋ-leŋ da ŋɔŋ têɣã dí kúla ǹá.

⁹ È ŋ̀ele-kɔlɔŋ ƃêla, é yéŋ ɣele-kɔlɔŋ su kpíniɛɛ kɛ́ ƃò gɔ́ɔ mu.

¹⁰ È kɛ̀ seêni ŋ̀âla-taa kooŋ sɛŋ mɛi, ŋ̀âla-taa kooŋ sɛŋ é kòoŋ la vãai su a maa félaa.

¹¹ È gbîŋ mɛi pɛ̂lɛ a tuna yâ kpini kpɛ́ɛ pôlu ma su, ɣele-kɔlɔŋ su kpíniɛɛ su ǹáa fɛ́ɛ a yá, dínaŋɔɔ m̀a.

¹² Ŋ̀elei su a kɛ̀ lôkwai, sãɔɔ kɛ́ kùla ŋ̀elei su gɛ́ tòo, ŋ̀elei su kɛ́ kɛ̀ mãla-mãla, ŋ̀ele-gbâna kɛ́ fàa ŋ̀ɛ́i-tuɛ, ŋ̀ele-kɔlɔŋ su kpíniɛɛi su.

¹³ Yâwɛɛ a gɛ̀ ŋ̀elei su kɛ́ lòkwa, ǹyaŋ Ŋ̀âla Kɛ́tɛi wóo è tɛ̀ ŋ̀elei su. Sãɔɔ è kɛ́ toôi, ŋ̀elei su kɛ́ nɛ́ŋ pìli.

¹⁴ È ŋɔsɔa-ŋai pîli ŋɔkpɔara-ƃelai dí táa-tàa, é ŋ̀ele-gbâna tòo dí sâma dí yao díŋ ma dí pú.

¹⁵ Yâwɛɛ lɛ̂wo è kùla zũâi é yúo káo ma lɛ́, ǹɔii é lɛ́ɛ lâani a vólo, tãi è làɣi la ŋɔkpɔara-ƃelai dîa a lii-ŋwana perei.

¹⁶ Yâwɛɛ è ǹyée sãa é ŋ́zoŋ. È ǹyée sãa é ŋ́gula ǹyá siŋɔɔi su.

¹⁷ È ŋ́gùla ŋ́gbɔara-ƃela wála-walai yêei, da diai dí tɔɔ̂i ḿâi. Díwala-walai tɛɛ̂i ŋ́ɔi ma.

¹⁸ Ŋ̀a kɛ̀ mɛni kpɔ̂lu, su maa tãi ƃé da pɛ̀lɛ la ḿâ, kɛ́lɛ Yâwɛɛ a ŋ́uŋ ma ƃò dí yêei.

¹⁹ A kpɔ̂ŋ ḿâ é ŋ́gula mɛni kpɔ̂lu su. A ŋ́uŋ ma ƃò, kpɛ́ni fêi, ǹíi lâai ńyêei.

²⁰ Yâwɛɛ è ḿvela fè ŋáteniŋ ƃo-laai mɛni ma, gɛ́ lûwa làa ḿâ, kpɛ́ni fêi, mɛni-ŋai nûa da m̀o a ńaai ńzɔŋ fé da su.

²¹ Ŋa Yâwɛɛ ŋɔtɔ̂ŋ-ŋai mɛi kâa. Fé tá ḿbôlu tɔ̀ɔ ní Ŋáɣâlai ma.

²² Ŋa ŋɔtɔ̂ŋ-ŋai kélee mɛi kâa. Fé tá ḿbôlu tɔ̀ɔ ní da ma.

²³ Sɔnyɔ̂ŋ fé ḿâ ŋ̀ɛ́i-tuɛ. Ńyee fé mɛni nyɔ́mɔɔ-sii kélee da kɛ́ mɛni su.

²⁴ M̀ɛni ma, a ḿvela fè ŋátɔ̃yâ-laai da ŋámaa-waa-laai mɛni ma, kpɛ́ni fêi, è gɔ́lɔŋ a gɛɛ m̀ɛni-ŋai nûa da m̀ôi a ńaai, ńzɔŋ fé da su.

²⁵ Óo Yâwɛɛ, ya íteniŋ ƃô laai lɛ́ diai díteniŋ ƃoɔɔ̂i dísarâi. Ya ísɔŋ lɛ̂lɛ laai lɛ diai dísɔŋ lɛ̂lɛɛi dísârai.

²⁶ Diai dílii su waâi sârai ƃé ya ílii su wâai lɛ́ naa. Kɛ́lɛ ítɔɔ̂i diai dîa dífe teniŋ ƃô nii.

²⁷ Ya diai ŋuŋ ma ƃò da tûa a maa yêŋ perei, í kɛ́ zu-mɛni kɛ́tɛ-ƃelai maa yêŋ.

²⁸ Óo Yâwɛɛ, Ŋáɣâlai, yá ƃa kwaa ponoɔɔ tɛ̀ɛ ḿbɔ. Íkwaa ponoɔɔi a ḿaa pôno.

²⁹ Ya wála-wala-laa tɛ̀ɛ ḿbɔ a gɛɛ ŋá ŋ́gbɔara-ƃelai yée mɛi ɣále, ŋá dítaa-lee-ŋai sóŋ.

³⁰ Ɣâla ŋí tûa pere kélee sãai! Ŋ̀óo káa a tɔ̃yâ. Diai kélee da pâ bɔ́ kpɔŋ mâa mɛni mai, a dímaa kɔ̃ɔ yɛ̂ɛ kɔ-kuluƃa maa kɔ̃ɔ kɔli-kalaŋ.

³¹ Yâwɛɛ ǹyaa tɔ̂nɔ nɔ́ ƃa Ɣâla. Ǹyaa tɔ̂nɔ nɔ́ ƃa kúmaa kɔ̃ɔ yɛ̂ɛ kɔni.

³² Ɣâla a ŋ́gbônoi kpanáŋ. A ńzia pêrei maa kpɛ̂.

³³ A gɛ̀ ŋ́gɔɔ su a kpanáŋ yɛ̂ɛ pîlaŋ sua, ŋ́uŋ ma ƃóɔɔ yée tôŋ su.

³⁴ A ŋ́aa kɔ̀ŋ a gɛɛ ŋ́gɛ ƃò a kɔ́kɔ-nuu. A gɛ́ ńyee a pɔ̂ri ƃara keraŋ pilîi.

³⁵ Yaâ ŋuŋ ma ƃô kɔli-kalaŋ tɛ́ɛ ḿbɔ. Ya ŋ́gɛ a núu kɛ́tɛ a íwala-wala laai. Ŋa ŋuŋ ma ƃo sɔlɔ ƃó íwala-walai sârai.

³⁶ Ya ńzia perei su pono, fé pâi wɔ́lɔ toôi.

³⁷ Ŋa ŋ́gbɔara-ƃelai kpɛ́, ŋa dísoŋ, ŋa dísu-kara. Ŋa lɛɛ díkpɛ̂i ŋá dísoŋ, ŋa dísu-kara.

³⁸ Da too ŋ́gɔɔ mu ŋá dísu-kara, dífa ŋɔ́nɔ pɔ̀ri dímu siɣêi.

³⁹ Ya ŋ́gbonôi kpanáŋ kɔ́kɔ mɛni ma, ŋá ŋ́gɔara-ƃelai yée mɛi ɣále.

⁴⁰ Ya gɛ̀ ŋ́gbɔara-ƃelai da pú ńyêei, diai da ŋ́gbɔarai, ŋá díyee mɛi ɣále.

⁴¹ Dí wɔ̀lɔ kpɔŋ mâa mɛni ma, kɛ́lɛ núu da fé kɛ́ ní naa é díŋuŋ ma ƃó. Dí Yâwɛɛ tòli, kɛ́lɛ vé díwoo su tòo ní.

⁴² Ŋá dífũa díkɛ yɛ̂ɛ muluŋ nyii gáa ǹɔii mai, fãa a nòkwa nɔ́ é tɛ́ɛ lai, ŋá dítaŋ yɛ̂ɛ pere-lêe ma para.

⁴³ Í ḿaa kɔ̃ɔ diai yêei dítɔɔ̂i ḿâi. Ya ŋ́gɛ a lɔii-ŋuŋ-ŋa su-ƃela láa tûɛ-nuu. Diai fé kɛ́ ní a díkɔlɔŋɔɔi ya ŋ́gɛ a dílaa túɛ-nuu.

⁴⁴ Lɔii da kpɛ́ni-ŋa su-ƃela dí kɛ̀ tɔarâi dí kɛ́ pà a tãi dí ḿaa tûŋ m̀ɛni lai. Dí pà dí pîlaŋ díŋume ŋá dí ƃaa-kɛ́-maa tɛ́ɛ ḿbɔ.

⁴⁵ Díkili ŋá è pù, dí maa kɛ́ kpɛ̃liŋ dí kɛ̀ kùla dítaa-lee wála-wala-ŋai su dí pá ḿbɔ.

⁴⁶ Yá ƃa gɛ̀ ɣele ma Yâwɛɛi, ǹyaŋ ŋa pâi ílaa maa tɛ̂i. Yái íkaa a ḿaa kɔ̃ɔ Ɣâlai, ŋá ŋuŋ ma ƃô kɔnii, ŋa pâi lûwa toôi ya.

⁴⁷ Ɣâla, yá ƃé ya ŋákpai kûla. Í kɛ́ ŋ́gbɔara-ƃelai pù ŋ́gɔɔ mù.

⁴⁸ Ya ŋ́gula ŋ́gbɔara-ƃelai yêei. Yá ƃa gɛ̀ ŋ́gɛ ŋ́gbɔara-ƃelai yée mɛi ɣàle, í ḿaa kɔ̃ɔ ŋ̀wana lɔ̂ɔ-ƃela yêei.

⁴⁹ M̀ɛni ma, Yâwɛɛ, ŋa pâi ílaa maa tɛ̂i ǹɔii ŋuŋ-ŋai su. Ŋa pâi laa maa tɛ̂ wule-ŋa toôi a ílaa.

⁵⁰ A gɛ́ ŋɔkâloŋ a ŋɔkpɔara-ƃelai yée mɛi ɣále. Ŋɔwɔ́lɔ-wɔlɔ wɛli-kɛ maai káa naa gâloŋ mɛni ma nyii è zìɣe zui, gɛ́ ƃò naa máŋ Deeƃé da ŋɔsuui mɛni ma wɔ́lɔ-wɔlɔ da wɔlɔ-wɔlɔ.