Mąątɛ̨nɛ̨ 143 - Bible

Kpera-fei Ɣâla fɛli-woo

Deeƃé ŋɔwulei

¹ Óo Yâwɛɛ, ŋá Ɣâla-fɛli wooi mɛ́ni. Íwoli tɔ́ɔ ŋá pɛ̀lɛ a gɔ́ɔ wooi mâ kpɛ́ni fêi íkaa a tɔ̃yâ da teniŋ ƃô Ɣâla.

² Ífe lì a íyee-mu-nuui mɛni sâa ƃóɔɔ su, kpɛ́ni-fei núu da maa fé waa ní íŋɛi.

³ Ŋ́gbɔara-ƃelai da ŋ́gbɛ̂i, daâ gbâa ńyee mɛi ɣále. Da ńzêei kula kpíni maa pɔlɔ-pɔlɔɔ su, ŋ́gɛ ƃò nɔ́ yɛ̂ɛ núu ƃa saa a tãi su kôyaa.

⁴ Kili-kɛ-zu da fé ŋɔ́nɔ ńyêei. Ńii toɔ̂ɔi kpɔ́ pôlu a ŋánaa.

⁵ Ŋ̀ele-ŋai da tɛ̀ɛi díkili a too ŋá. Ŋa ŋ́gili-ŋa sìa é pîlaŋ m̀ɛni-ŋai dîa ya gɛ̂i, ítûa-pere-ŋai kíli a tôo ŋá.

⁶ Ŋà ńyee tɛ̀ ɣelêi ŋá Ɣâla fɛli. Íwɛli a ŋ́gɛ̂i yɛ̂ɛ lɔii kpâla a kɛ̀ yá wɛ̂lii.

⁷ Óo Yâwɛɛ, ye ŋ́oo su too a maa félaa. Kili-kɛ-zu fé ŋɔ́nɔ ńyeêi. Ífe íŋɛi lòo ḿâ, à wàla kɛ́ tí, ŋa pâi liî saa táa.

⁸ Íwɔɔ-wɔlɔ wɛli-kɛ-maai kíli tóo ŋá a ɣele-wala kélee, kpɛ́ni fêi, ŋ́gili tɔɔ̂i yâ. Ŋa ífɛlii, ye ítûa-perei lɛ́ ḿâ a gɛɛ ŋá sía la.

⁹ Óo Yâwɛɛ, ŋá pà a gɛɛ ímaa kɔ̃ɔ. Ŋ́gula ŋ́gbɔara-ƃelai yêei.

¹⁰ Yá ƃé íkaa a Ŋáɣâlai, ítûa-pere lɛ́ ḿâ a gɛɛ ŋá sía la. Ye ḿɛi káa a ǹɛ́lɛɛ í ḿbîlaŋ pere lɛ́lɛɛ ma.

¹¹ Óo Yâwɛɛ, ye ŋ́uŋ ma ƃó mî yɛ̂ɛ berei í íkono tèe lai, ye ŋ́gula ŋámɛni kpɔ̂lui su a ítûa-pere lɛ́lɛɛi.

¹² Ŋ́gbɔara-ƃelai páa kpɛ́ni fêi ŋ́wɛli káa yâ. Diai da mɛni kpɔ̂lu làa ḿâi, dísu kara, kpɛ́ni fêi, ŋ́gaa a íyee-mu nuu.