Mąątɛ̨nɛ̨ 140 - Bible

Ɣâla fɛliɛɛ kpɔŋ mâ mɛni ma

Deeƃé ŋɔwulei è bɔ̃yɛ ŋ̀ule-too-ƃelai láa túɛ-nuui mɛni mai

¹ Óo Yâwɛɛ, ŋ́uŋ ma ƃó í ŋ́gula ŋ̀wana-lɔ̂ɔ-ƃelai yêei. Ŋ́uŋ ma ƃó í ŋ́gula ŋɛi-maa-nɛ̃ɛ-ƃelai yêei.

² Díkaa nɔ́ mɛni nyɔ́mɔɔ-ŋa kpɛtɛ̂i dílii su é pîlaŋ ḿâ, díkaa nɔ́ wɔ́lɔ sóoŋ teêi a ɣele kélee.

³ Dí nɛ́ŋ ŋá liɛ̂ɛi yɛ̂ɛ kali nyɔ́mɔɔ ńɛŋ, díwoo káa nɔ́ yɛ̂ɛ wurûŋ ŋwána.

⁴ Óo Yâwɛɛ, ye ŋ́gula mî ŋ̀wana-lɔ̂ɔ-ƃelai yêei, Ŋ́uŋ ma ƃó í ŋ́gula ŋɛi-maa-nɛ̃ɛ-ƃelai yêei, nyii-ŋai da gbɛtɛ a gɛɛ dí gɛ́ ŋá tóoi.

⁵ Su-mɛni kɛ̂tɛ-ƃela da ƃáre ŋá tɛ́ ḿberêi. Da díƃare-ŋai ŋá tɛ́ da daa-tâa ḿberêi. Da ƃáre ŋá tɛ́ bere-ŋai su a gɛɛ ŋá kɔ́ a dìa.

⁶ Ŋá m̀o Yâwɛɛ ma ǹyɛɛi, “Yá ƃé íkaa a Ŋáɣâlai.” Óo Yâwɛɛ, ŋá kpɔŋ mâa Ɣala fɛli wooi mɛ́ni.

⁷ Óo Ŋ̀wála-wâla kélee Yâwɛɛi, yá ƃa ḿaa kɔ̃ɔ nûu wála-walaai. Ya ḿaa kɔ̃ɔ kɔ́ su.

⁸ Óo Yâwɛɛ, ífe ǹɛɛ naa ŋ̀wana-lɔ̂ɔ-ƃelai dí dínîa sɛŋ sɔlɔ ƃó. Ífe nɛ̀ɛ naa díŋwana-lɔ̂ɔ mɛni-ŋai ŋàa sèe é kɛ́.

⁹ Ífe nɛ̀ɛ naa ŋ́gbɔara-ƃelai yée é tɛ́ɛ ḿâ. Ǹɛɛ naa díŋwana-lɔ̂ɔ mɛni kpɛtɛɛ-ŋai dí pú díŋua.

¹⁰ Tɔ́ɔ ŋɔŋ-teɣa gɛɛ-yɔɔ é pú díŋua. Tɔ́ɔ dí dípili ŋɔŋ su. Tɔ́ɔ dí dípili lóa kpóŋ kôyaa su, dífa pɔ̂ri kulâi.

¹¹ Tɔ́ɔ diai da lɛ́ɛ mɛni pɛ̀lɛ núu da mai, dí mɛni kpɛ́tɛɛi ŋàa sèe fé kɛ̀. Tɔ́ɔ mɛni kpɔ̂lu é láa ŋɛi-maa-nɛ̃ɛ-ƃelai dîa í dísu kara.

¹² Yâwɛɛ, ŋá gɔ́lɔŋ a gɛɛ ya tɔ̂ɔ gôlo-ƃelai pôlu, íkɛ ǹúu doo-mu-ŋai maa kɔ̃̂ɔ.

¹³ Deniŋ ƃô-ƃelai da pâi ílaa maa tɛ̂i a ŋánaa. Da pâi díkɛ ɣéniɛi kɛ̂i íŋɛi-tuɛ.