Mąątɛ̨nɛ̨ 126 - Bible

Ŋule-too nuui è Ɣâla marê kɛ̀ a gɛɛ é kpɔ́ŋ Eezuɛ ma

Ɣâla fɛli wule

¹ Tãi Yâwɛɛ è lène la a kûa pôlu Zerusâlɛŋ, è kɛ̀ nɔ́ yɛ̂ɛ nyiî pere.

² Kúkɛ̀ ɣɛlɛ̂i, kúkɛ wule tóo a koi-nɛ̃ɛ pere. Nya ƃe ǹɔii-ŋuŋ da kpɛ́ni-ŋai dí mò dîyɛɛi, “Yâwɛɛ aâ mɛni kpaya-kpaya lɛ́lɛɛ kɛ́ dîɛ.”

³ Tɔ̃yâ kpîŋ ma, è mɛni kpaya-kpaya lɛ́lɛɛ kɛ̀ kûɛ. Ǹyaŋ kúlii lâai dí mɛni ma.

⁴ Yâwɛɛ, gɛ́ kú ƃûu ƃó ŋɔ́nɔ, yɛ̂ɛ berei tuna a gɛ̀ la ya lêe é láa ǹâai.

⁵ Tɔ́ɔ diai da kɛ̂ dísi-sãai sîi díŋɛi-ya sui, dí m̀á kúla a koi-nɛ̃ɛ.

⁶ Diai kɛ̀ wɔ̂lɔi díkɛ lì a zí-sɛŋ kaoi zí mɛni mai, da pâi kɛ̂i pâi pôlu a koi-nɛ̃ɛ, a tãi da pâi kɛ̂i pâi la a dísi-sãai m̀ái.