Mąątɛ̨nɛ̨ 101 - Bible

Gâloŋ ŋɔkono-teei

Deeƃé ŋɔwulei

¹ Óo Yâwɛɛ, ŋa pâi wule toôi yâ. Ŋa pâi wule toôi yâ é pîlaŋ tɔɔ pôlu da tɔ̃yâ-laa mɛni ma.

² Yâwɛɛ, kpɔŋ ḿâ ŋá tɔ̃yâ mɛni kɛ́-pere kɔ́lɔŋ. Lé tãi ƃé ya pâi pâi la ḿbɔ naai? À kɛ̀ tí, ŋa pâi kɛ̂i tɔ̃yâ da teniŋ ƃô mɛni-ŋa kɛ̂i ŋápɛrɛi mu.

³ Fé pâi ŋɔ́nɔ ńyee pilîi mɛni nyɔ́mɔɔ da kɛ́ mɛni su, kpaa máŋ wôya mɛni da. Diai dí tɔɔ̂i Ɣâla mai, da ƃɛlɛ fé pâi kɛ̂i ŋ́goi. Fé pâi wɔ́lɔ lɛɛ̂i da pôlu.

⁴ Ŋa pâi kɛ̂i tûai a teniŋ ƃô-pere. Ŋa pâi ńyee kulâi mɛni nyɔ́mɔɔ-ŋa kɛ́ mɛni su.

⁵ Ǹúui kélee a gɔlɛ maa-nuu láa kàrai, ŋa pâi maa-nuui su karâi. Fé pâi ńyee seêi yoŋka-nuu da su-mɛni kɛ̂tɛ-nuu da kélee mu.

⁶ Diai dí teniŋ ƃôɔɔi Ɣâla mɛni mai, ŋa pâi ńyee seêi dímu kwa dîa ni kú ƃò kwaa tɔ̂nɔ ma. Diai dífe fili níi, ŋa pâi ńyee seêi dímu a ŋátii kɛ́-ƃela.

⁷ Kíri nuu da fé pâi kɛ̂i a ŋákâloŋ-pɛrɛi mu-ƃelai da. Lɛ́ɛ-nuu da fé pâi wɔ́lɔ pâi ŋ́ɛi-tuɛ.

⁸ Ŋa pâi ŋ̀wana-lɔ̂ɔ-ƃelai ŋáa yenîi a kpíni da ɣele kélee ǹɔii ma. Ŋa pâi díkulâi Ɣâla Yâwɛɛ ŋɔtaa-leei su kpóŋ-kpoŋ.