Maafîu 7 - Bible

Núu da kpɛ́ni ŋɔmɛni-ŋa-teɛɛ

¹ “Káfe káƃarâŋ-nuu ŋɔmɛni ŋá tèe. Dífa lâ káwɔ̂ mɛnii ŋá tée la.

² Kpɛ́ni fêi, berei ka káƃarâŋ-nuu ŋɔmɛni ŋá tèe lai, bere nɔ́ ƃe da pâi káwɔ̂i ŋá teêi la. Berei ka sɛŋ gɔ̀ɔŋ la ka dɛ̀ɛ núu pɔi, bere nɔ́ ƃe da pâi gɔɔnîi la dí dɛ̀ɛ la kápɔ.

³ Le ƃe kɛ̀ ya ŋ̀úru-kalaŋ pɛlɛ-pɛlɛɛi kɔ̀ri la íƃarâŋ-nuui ŋ́ɛi-gao ma, kɛ́lɛ, ífa ŋ̀úru-kponoi kàa yá kpîŋ íŋɛi-gao mai?

⁴ Kpaa máŋ ya pɔ̂ri m̀ôi leŋ íƃarâŋ-nuui ma, ‘Tɔɔ ŋá ŋ̀úru-kalaŋ pɛlɛ-pɛlɛɛi kúla íŋɛi-gao ma,’ à kɛ̀ ífa ŋ̀úru-kponoi kâa íwɔ̂ ŋɛi-gao mai?

⁵ Kíri-nuu, ŋ̀úru-kponoi kúla íŋɛi fulɔi, gɛ̀ ní, ya pâi kwaa kâai a zu ponoɔ a gɛɛ í ŋ̀úru-kalaŋ pɛlɛ-pɛlɛɛi kula íƃarâŋ-nuui ŋ́ɛi.

⁶ “Zɛŋ nyii maa waai káfe dɛ̀ɛ ŋ̀îla-ŋai pɔ́, kpaa máŋ káfe kɔyɛ̂ŋ sɔ̃ɔ kpanaŋɔɔ-ŋa pili m̀oi-ŋai ŋ́ɛi-tuɛ. Kà gɛ̀ tí, gɛ̀ ní, da pâi dítânii dí tínaŋ dí kányiŋ.

Ka sã̂a mare kɛ̂ɛ kɛ́, ká gɔ́ri, ká gbôŋ túa

⁷ “Ka sãa maa mare-kɛɛ kɛ́, da pâi dɛɛ̂i kápɔ. Ka sãa kɔ́ri, ka pâi zɔlɔ ƃôi. Ka gbôŋ túa, da pâi ǹá ƃôi kâa.

⁸ Kpɛ́ni fêi, ǹúui kélee a sɛŋ fɛ̂lii, a pâi zɔlɔ ƃôi. Ǹúui a sɛŋ kɔ̂rii, a pâi gáâi. Ǹúui a gbôŋ tuai, da pâi ǹá ƃôi mì.

⁹ Ǹyaŋ gbɛ̂ɛ ƃe kásama ǹóŋ a vɛ̀li kpólo ḿâ, a kɔni tɛ́ɛ bɔi?

¹⁰ Kpaa máŋ a vɛ̀li nyɛ̃ɛ ḿâ, a kali tɛ́ɛ bɔi?

¹¹ À kɛ̀ káai kákaa a sɔnyɔ̂ŋ-ƃelai ka sama-sãa lɛ́lɛɛ-ŋa tɛɛ-pere kɔ́lɔŋ kálônii pɔ́, Káɣâla-taa-Naŋ fa pɔ̂ri sama-sãa lɛ́lɛɛ-ŋa tɛɛ̂i diai vɛ̀lii dípɔ é tɛ́ɛ nyíti ma?

¹² Mɛni ma nyii kélee ka ŋ̀wɛ̂lii nûa dí gɛ a káai, ka gɛ tí máŋ a dia, kpɛ́ni fêi, bere ƃe Dɔ̂ŋ da Ɣâla ŋɔlóno-kɛ-ƃelai da nɛ̀ la.

Góraŋ lá kuro-teɛ̂i

¹³ “Ka lɔ́ góraŋ lá kuro-têi naa-pere, kpɛ́ni fêi, góraŋ lá kɛ́tɛi da bere su kɛ́tɛi da lî a núu su-kara-taa, núu támaa da tɛ́ɛ la.

¹⁴ Kɛ́lɛ, góraŋ la kuro-teɛ̂i da bere su-kuro-teɛ̂i da lî a núu fulu-laa su, mɛni ma, núu tɛi-tɛi nɔ ƃa tɛ̂ɛ là.

Da wúru kɔ̀lɔŋ m̀á ma

¹⁵ “Ka kámɛi káa a Ɣâla-maa-wôya lono-kɛ-ƃela. Da pâ kápɔ ƃála-kɔlɔ su, kɛ́lɛ, díkponôi kɛ́ ƃo a kɔ́li lii-ŋwanaa-ŋa.

¹⁶ Ka pâi díkɔlɔnîi díƃa ma. Da tãyaŋ kpɔ̂lu kùla ŋalêŋ-wuru ma, kpaa máŋ dí fîi wuru-ƃa kula ŋalêŋ-wuru ma?

¹⁷ Berei máŋ gáa la tí, wúru lɛ́lɛɛ kélee a ƃâ a m̀á lɛ́lɛɛ, wúru nyɔ́mɔɔ kɛ́ ƃà a m̀á nyɔ́mɔɔ.

¹⁸ Wúru lɛ́lɛɛ fa pɔ̂ri ƃâi à m̀á nyɔ́mɔɔ. Ǹyaŋ wúru nyɔ́mɔɔ fa pɔ̂ri ƃâi a m̀á lɛ́lɛɛ.

¹⁹ Ŋúrii nyii kélee m̀á fa kɛ̂ a ǹɛ́lɛɛi, da dèe dí bili ŋɔŋ ŋá.

²⁰ Mɛni ma, ka pâi díkɔlɔnîi díƃa ma.

Fé kákɔlɔŋ

²¹ “Diai kélee da kɛ́ mâ, ‘Kúnuu-namui, Kúnuu-namui,’ díkelee dífe pâi liî Ŋ̀âla-taa kâloŋ-laai su, fɛ̂ɛ ǹúui a Ńâŋ nîa-mɛni kɛ̀ nyii gáa Ɣâla-taai.

²² Maa-ɣelei tí, núu támaa da pâi môi mâ, ‘Kúnuu-namui, Kúnuu-namui, kúfe kɛ́ ní Ɣâla wòo ƃôi ílaâi su? Kúfe kɛ́ ní nyînaŋ nyɔ́mɔɔ-ŋa kpɛ̂i ílaâi su? Kúfe kɛ́ ní mɛni kpaya-kpaya támaa kɛ̂i ílaâi su?’

²³ Nya ƃe ŋa pâi m̀ôi dîa, ‘Fe kákɔlɔŋ. Ka siɣe ŋ́ɛi, kákaa a ŋwana-lɔ̂ɔ ƃela.’

Bɛ́rɛ pîlaŋɔɔ feerɛi

²⁴ “Mɛni ma, ǹúui kélee a ŋ́oo-ŋai ŋí mɛni é díkɛ̂i, móloŋɔɔ̂i táre-nuu ma, nyii ŋɔpɛ́rɛi tɔ̀ɔ kɔni ŋái.

²⁵ Tãi dunai è pù lai, nya-fɛɛ̂i da vãai dí pà dí sɔ́ɔ bɛ́rɛi ma, vé wólo ní, kpɛ́ni fêi, dí dɔ̀ɔ gɔnii ŋá.

²⁶ Ǹyaŋ ǹúui kélee a ŋ́oo-ŋai ŋí mɛ̀ni, va díkɛ̂i, móloŋɔɔ̂i ƃoo-nuu ma, nyii ŋɔpɛ́rɛi tɔ̀ɔ ŋɛyãai sui.

²⁷ Tãi dunai è pù lai, ǹya-fɛɛi da vãai dí pà dí sɔ́ɔ bɛ́rɛi ma, é wólo, ǹyaŋ zu è kara a gɛ́tɛ.”

Zîsɛ ŋɔwála-wâla-laai

²⁸ Tãi Zîsɛ è kpɛ̀ɛ la a ŋ̀óo-ŋai ŋí ƃóɔi, gbɔŋ lá è kpàla ma a ŋɔsɛŋ-lɛɛi.

²⁹ Kpɛ́ni fêi, è sɛŋ lɛ̀ dîa yɛ̂ɛ ǹúui wala-wala-laa káa ǹyéei, vé gɛ ní yɛ̂ɛ díkɔlɔ-pɔ̃yɛ-ƃelai.