Maafîu 28 - Bible

Zîsɛ è mu-siɣe saa-yêei

¹ Ǹaa pôlu mâ lɔɔkuui kɔ́ɔ-pîlaŋ ɣele-wala-pɛpɛ, nyii kɛ̀ a Vii-tɔɔ-ɣelei pôlu-ma-ɣelei, Mere Madalini da Mere da kpɛ́nii dí pà a gɛɛ dí m̀olôŋ lá káa.

² Ǹɔii è kpɛ̃liŋ kpɔ́ a ŋánaa. Kpɛ́ni fêi, Kúnuu-namui ŋɔkélai dɔnɔ è kùla Ɣâla-taa é pá é gɔnii kílîŋ é gúla m̀olôŋ lá é see mɛi.

³ Ŋ̀ɛ́i è kɛ̀ fóloi yɛ̂ɛ ŋ̀ele-gbâna ŋɔmãla-mãla. Ŋɔseɣei kɛ́ kole yɛ̂ɛ yee fũa.

⁴ Gɔkuluƃa-ŋai dí yào ma díkɛ kpɛ̃liŋ. Dí nâa kɛ̀ nɔ́ yɛ̂ɛ saa-ƃela.

⁵ Nya ƃe Ŋ̀âla-taa-kelai è mò nɛyâai dîa, ǹyɛɛi, “Káfe yao. Kpɛ́ni fêi, ŋá gɔ́lɔŋ kákaa Zîsɛ kɔ́rîi nyii dí gbamo zaa-wurii mai.

⁶ Vé ƃɛ́. Aâ mu síɣe saa yêei, yɛ̂ɛ berei nɔ́ è mò lai. Ka pá ká ƃɛ́i káa è kɛ̀ laa ni naai.

⁷ Ka lí a maa félaa ká m̀ó ŋɔpôlu-ƃelai dîa a gɛɛ aâ mu siɣe saa yêei. A liî Galalii kátuɛ. Nàa ƃe ka pâi gáâi naa. Ǹyaŋ ŋa nâa m̀ó kâa.”

⁸ Nya ƃe dí kùla m̀olôŋ lá a maa félaa a yao da lii-nɛ̃ɛ kɛ́tɛ. Dí kîrɛ sìɣe dí li ŋɔpôlu-ƃelai pɔ naa a gɛɛ dí m̀o dîa.

⁹ Dí kɛ́ɛ liî Zîsɛ è kùla dîa, é ǹá tí dîa. Nya ƃe dí pà dí gɔ́ɔ sóŋ dí vɛ̀li.

¹⁰ Zîsɛ è mò dîa, ǹyɛɛi, “Káfe yao. Ka lí ká m̀ó ŋáwɛli-kɛ-maa-ƃelai dîa a gɛɛ dí lí Galalii. Nàa ƃe da pâi ŋ́gaâi naa.”

Gɔkuluƃa-ŋai dí díkoraŋ-mo

¹¹ Dí kɛ́ɛ liî, gɔkuluƃa-ŋai da-ni dí pà daai sú zâla láa soŋ-ƃela kpaya-kpayai pɔ naa dí mɛni-ŋai nyii-ŋai kɛ̀i kélee ƃó dîa.

¹² Tãi dí díŋa tɛ̀ la díkîe ma da nuu-pɔlɔ-ŋai, dí díŋuŋ ma pìlaŋ dí sɛŋ-kao támaa tɛ́ɛ gɔkuluƃa-ŋai pɔ́,

¹³ dîyɛɛ díai, “Ka m̀ó kâa, ‘Ŋɔpôlu-ƃelai dí pà a kpíni dí boma ŋúma tãi kú kɛ́ nyiî lai.’

¹⁴ Ǹyaŋ à kɛ̀ gɔmɛnɛ-nuu kɛ́tɛi à nyiŋi mɛ̀ni, gɛ̀ ní, kwa pâi ǹíi ŋá yeŋ-woo ƃôi, kú kákula m̀ɛnii su.”

¹⁵ Nya ƃe dí zɛŋ-kaoi sòŋ dí m̀o nɔ́ yɛ̂ɛ berei dí mò la dîa a gɛɛ dí mói. Ǹyaŋ m̀ɛnii ŋí duŋ è tàa-taa kpɔ́ Zûu-ŋai sama, gáa niî naa sâai ŋí sú.

Zîsɛ è gbîŋ lɛ̀ ŋɔpôlu-ƃelai dîa

¹⁶ Zîsɛ ŋɔpôlu-ƃela puu kao tɔnɔɔi dí lì Galalii, ǹyéei ma Zîsɛ è ǹaa lɛ̀ diai.

¹⁷ Tãi dí gàa lai, dí vɛ̀li. Kɛ́lɛ, díta-ni dífe laa ni la.

¹⁸ Nya ƃe Zîsɛ è pà dípɔ é lóno dípɔ, ǹyɛɛi, “Wála-wala-laa kélee tɛɛ̂i ḿbɔ Ɣâla-taa da ǹɔii ma.

¹⁹ Mɛni ma, ka lí ká ǹɔii kélee su-ƃela kɛ́ a m̀bôlu-ƃela, ká díbatâi kɛ́, Ǹâŋ láai sú, da Ǹóŋ láai sú da M̀ɔlêŋ Maa Waai láai sú.

²⁰ M̀ɛni-ŋai kélee ŋá mò kâai, ka ǹɛ̂ dîa dí dímɛi káa. Ka gáa, ŋ́gaa kápôlu a tãi kélee é tóo la ŋ̀éniɛi kpɛ̀ɛ ŋá ma.”