Maafîu 21 - Bible

Zîsɛ è tɛ̀ Zerusâlɛŋ a yèe-tɛ̂ɛ-maa pere

¹ Tãi dí lɛ̀ɣɛ la Zerusâlɛŋ, dí pà Bɛfazi, Ŋulɔ-wuru-yeei ma. Nya Zîsɛ è ŋɔpôlu-ƃelai veerɛ tɛ̀ɛ dítuɛ pere,

² ǹyɛɛ diai, “Ka lí gbanâŋ lá kátuɛ-pere. Ka pâi wɛlɛ-sôo tɔnɔ kâai naa, gbulɔ̂ŋɔɔ, ǹóŋ kɛ́ ƃo gɔlɛ. Ka dífuloŋ ka pa a dia ḿbɔ.

³ Núu da à mɛni da ƃò kâa, ka m̀ó ma, ‘Kúnuu-namui a díwɛli kɛ̂i.’ Gɛ̀ ní, a pâi dítɛɛ̂i a maa felaa.”

⁴ Ǹyaŋ nyiŋi è kɛ̀ a gɛɛ m̀ɛnii Ɣâla ŋɔlóno-kɛ-nuui è mòi, ŋa-see é kɛ́, ǹyɛɛi,

⁵ “Ka mó Zãiyɔŋ ǹóŋ-nɛnii ma, Gáa, íkâloŋ káa pâi ípɔ. Ǹíi maa yeŋɔɔ, gɛ ƃo see ni wɛlɛ-sôo mɛi, da ŋwɛlɛ-sôoi ǹóŋ.”

⁶ Nya ƃe ŋɔpôlu-ƃelai dí lì dí gɛ nɔ yɛ̂ɛ berei Zîsɛ è mò la diai.

⁷ Dí pà a ŋwɛlɛ-sôoi da ǹóŋ, dí díseɣe-ŋai pɛ́lɛ dípôlu, Zîsɛ é sée dɔnɔ mɛi.

⁸ Gbɔŋ-su-ƃelai dámaa dí díseɣe-ŋai pɛ̀lɛ berei ma, da-ni dí tóu-laa tée dí dɔɔ berei ma.

⁹ Gbɔŋ-su-ƃelai kɛ̀ duɛ-perei da diai kɛ̀ bôlu-perei díkɛ̀ làɣi dîyɛɛ, “Osâna Deeƃé Ǹóŋ! Lûwa káa ǹúui ma pâi Kúnuu-namui láai sui! Osâna ɣelei-pere póŋ-póŋ!”

¹⁰ Tãi Zîsɛ è sèri la Zerusâlɛŋ, daai su-ƃelai dí kɛ̀ wúu-lee, dîyɛɛi, “Gbɛ̂ɛ ƃe ŋi?”

¹¹ Gbɔŋ-su-ƃelai dí mò, dîyɛɛi, “Ɣâla ŋɔlóno-kɛ-nuui Zîsɛ ká ŋí, nyii kùla Nâzarɛ Galalii-lɔii sui.”

Zîsɛ è lì Ŋ̀âla-pɛrɛ Kɛ́tɛi mu

¹² Nya ƃe Zîsɛ è lɔ̀ Ŋ̀âla-pɛrɛ Kɛ́tɛi mu é bɔni-tɔɔ-ƃelai kpɛ́ naa, é zɛŋ-kao maa-faleŋ-ƃelai díteƃele-ŋai pene é bɛ̀lɛ da dòloŋ kɔlɛ-ƃelai dísee-sɛŋ-ŋai.

¹³ È mò dîa, ǹyɛɛi, “Bɔ̃yɛɛ̂i, ‘Da pâi ŋápɛrɛi tólîi a Ɣâla-fɛli-pɛrɛ.’ Kɛ́lɛ, ka gɛ̀ a ŋuma-ƃela-kɛ̂i.”

¹⁴ Nya ƃe ŋɛi-pu-ƃelai da gɔɔ-pu-ƃelai dí pà bɔ Ŋ̀âla-pɛrɛ Kɛ́tɛi mu é díƃalo.

¹⁵ Kɛ́lɛ, tãi zâla láa soŋ-ƃela kpaya-kpayai da gɔlɔ-pɔ̃yɛ-ƃelai dí mɛni maa pɔlɔ-pɔlɔ-ŋai ŋí kàa la é gɛ̀i, da ǹîa-pɛlɛɛi kɛ̀ laɣii Ŋ̀âla-pɛrɛ Kɛ́tɛi mu, dîyɛɛ, “Laa-maa-tɛ é tɛ́ Deeƃé Ǹóŋ pɔi,” dílii è ŋwàna.

¹⁶ Dí mò ma, dîyɛɛi, “Íkaa m̀ɛnii mɛnîi ǹûai ŋí da môi?” Zîsɛ è mò dîa, ǹyɛɛi, “Ooei. Káfe niî wɔ́lɔ ŋ̀óoi ŋí lono ni, ‘Nia-pɛlɛɛ da kɔatara-ŋa ƃe ya laa-maa-tɛ kpɛtɛ díla ímɛni ma?’ ”

¹⁷ Nya ƃe è dílɛ̀ɛ daai su é kúla naa é lí Bɛtɛni é nyíi naa.

Zîsɛ è fîi-wurii náɣâŋ làa

¹⁸ Tãi è kɛ̀ lenêi la pôlu daa-leei su a ŋele-wala pɛ-pɛi, púru è kɛ̀ gɛ̂i.

¹⁹ È fîi wuru tɔnɔ kàa berei kɔlɛ é lí naa, kɛ́lɛ, ve m̀á kaa ní ŋ̀á fɛ̂ɛ nɔ ǹáa. Nya ƃe è mò ma, ǹyɛɛi, “Ífa ŋɔnɔ wɔlɔ ƃà!” Nya ƃe fîi-wurii è kpàla nɔ́ ŋá ma.

²⁰ Tãi ŋɔpôlu-ƃelai dí nàa kàa lai, díla è kpàla dîa, dîyɛɛi, “Fîi-wurii ŋí è kpála-pere leŋ kpɔ́ ŋí a maa félaai?”

²¹ Nya ƃe Zîsɛ è díwoo su tòo, ǹyɛɛ diai, “Ŋa tɔ̃yâ ƃoi kâa, à kɛ̀ laa-la káa káyêei, káfa sîa tòo, káfe pâi nɔ m̀ɛnii kɛ̂i nyii kɛ̀ a fîi-wurii, kɛ́lɛ, à kɛ̀ máŋ kà mò ǹyéei ŋí ma, ‘Ímu siɣe í píli ǹyái su,’ a pâi kɛ̂i ti.

²² Ǹyaŋ sɛŋ kélee ka mare-kɛɛ kɛ̀ Ɣâla-fɛliɛɛ sui, à kɛ̀ laa-la káa káyêei, ka pâi zɔlɔ ƃôi.”

Dí Zîsɛ ŋɔwala-wala-laai maa-mare-kɛɛ kɛ̀

²³ Tãi è pà la Ŋ̀âla-pɛrɛ Kɛ́tɛi mui, zâla láa soŋ-ƃela kpaya-kpayai da ǹûai dínuu-pɔlɔ-ŋai dí pà bɔ́, tãi è kɛ̀ sɛŋ lɛ̂i la ǹûai diai, dí m̀ó ma, dîyɛɛi, “Le wala-wala-laa ƃe ya mɛni-ŋai ŋí kɛ̀ lai? Gbɛ̂ɛ ƃe ŋwála-wala-laai ŋí tɛ̀ɛ ípɔ?”

²⁴ Zîsɛ è díwoo su tòo, ǹyɛɛ diai, “Ńyãa máŋ ŋa pâi mare-kɛɛ tɔnɔ kɛ̂i kâa. Kà zu kùla, gɛ̀ ní, ńyaŋ ŋa pâi ŋwála-wala-laai lɛ̂i kàa ŋa mɛni-ŋai ŋí kɛ̀ lai.

²⁵ Zɔ̂ŋ ŋɔbatâi-kɛɛi è kùla mi? È kùla Ɣâla-taa kpaa è kùla nuu-kpune yêei?” Nya ƃe dí bili-pili díkîe-ni loai, dîyɛɛi, “Kwà kɛ̀ mà, ‘È kùla Ɣala-taa,’ gɛ̀ ní a pâi môi kûa, ‘Le ŋaŋ ƃe káfe laa ni lai?’

²⁶ Kɛ́lɛ, kwà kɛ̀ mà, ‘È kùla núu-kpune yêei,’ kúkaa yáôi gbɔŋ-su-ƃelai dîa. Kpɛ́ni fêi, ǹûai kélee da Zɔ̂ŋ siɣe a Ɣâla ŋɔlóno-kɛ-nuu.”

²⁷ Nya ƃe dí Zîsɛ wóo su tòo, díyɛɛ mai, “Kúfe gɔlɔŋ.” Ǹyaa máŋ è mò dîa, ǹyɛɛi, “Ńyãa máŋ fa ŋwála-wala-laai lɛ̀ kâa ŋa mɛni-ŋai ŋí kɛ̀ lai.

Zîsɛ è sáŋ sɔ̂ɔ é pîlaŋ ǹóŋ-surɔŋ feerɛi mâ

²⁸ “Kákili-ŋa-siai káa leŋ? Lóŋ-surɔŋ feerɛ dí kɛ̀ nalôŋ tɔnɔ yêei. Nya ƃe è pà maa-ŋuŋ pɔ-naa, ǹyɛɛ mai, ‘Lí í tíi kɛ́ gbɔmɔ-kpalaŋ ŋá sâa.’

²⁹ Kɛ́lɛ, è ŋ̀óo su tòo ǹyɛɛi, ‘Fé gɛ̂i.’ Kɛ́lɛ, nàa pôlu ma è ǹíi pène é li.

³⁰ Nya ƃe è lì ǹóŋ veerɛ-ɣelei pɔ-naa é mɛni tɔnɔi ƃó mà. È ŋ̀óo su tòo, ǹyɛɛ mai, ‘Ooei, Ńâŋ.’ Kɛ́lɛ, ve li ni.

³¹ Ǹúu feerɛi ŋí, nênɛ ƃe ǹâŋ ǹîa-mɛni kɛ̀i?” Dí mò mà dîyɛɛi, “Duɛ-tuɛi.” Nya ƃe Zîsɛ è mò dîa, ǹyɛɛi, “Ŋa tɔ̃yâ ƃoi kâa a gɛɛ ŋuŋ-fela-fei kula-ƃelai da ŋ̀ulu-wulu-nɛyaai da pâi liî Ɣâla ŋɔkâloŋ-laai sú kátuɛ.

³² Kpɛ́ni fêi, Zɔ̂ŋ è pà kápɔ a tɔ̃yâ-laa ŋɔpere, ǹyaŋ káfe laa ni la, kɛ́lɛ, ŋuŋ-fela-fei kula-ƃelai da ŋ̀ulu-wulu-nɛyaai dí làa la. Tãi ka m̀ɛnii ŋí kâa lai, káfe kálii pene ni nàa pôlu ma ká láa la.

Zîsɛ è sáŋ sɔ̂ɔ é pîlaŋ gbɔmɔ-kpalaŋ ma da díi-kɛ-ƃelai dia

³³ “Ka káwoli tɔ́ɔ záŋ da kpɛni ma. Pɛ́rɛ-namu tɔnɔ è kɛ̀ naa, nyii ƃá-kpɔmɔ-kpalaŋ kɛ̀ é kóraŋ tínaŋ mà é lóa tee naa gbɔmɔ-ƃai táŋ mɛni ma. È yeŋkêŋ tɔ̀ɔ naa. È nɛ̀ɛ díi-kɛ-ƃelai yêei é lí lɔii da kpɛni su.

³⁴ Tãi gbɔmɔ-ƃai kpɔ̂lu-tãi è sèri lai, è ǹyée-mu-ƃelai tɛ́ɛ díi-kɛ-ƃelai pɔ-naa a gɛɛ dí ŋɔkpɔmɔ-ƃai tɛɛ.

³⁵ Kɛ́lɛ, díi-kɛ-ƃelai dí ǹyee-mu-ƃelai sòŋ. Dí dɔnɔ lòkwa. Dí dɔnɔ paa. Dí dɔnɔ sɔɔ a kɔni.

³⁶ E ŋɔ́nɔ ǹyée-mu-ƃelai dámaa tɛ́ɛ é tɛ́ɛ maa-ŋuŋ-ŋai dîa. Dí dûa tɔnɔi kɛ̀ a dia.

³⁷ Kɛ́lɛ, è gbîŋ-loŋ tɛ̂ɛ nàa pôlu ma, ǹyɛɛi, ‘Da pâi ŋumɛ-maa tɛɛ̂i ńoŋ pɔ.’

³⁸ Kɛ́lɛ, tãi díi-kɛ-ƃelai dí bɛ́rɛ-namui ǹóŋ kâa lai, dí mò díkîe-ni loai, dîyɛɛi, ‘Bɔɔ-sɛŋ-namu ká ŋí. Ka pá kú bàa, ku ŋɔpɔɔ-sɛŋ kúla ǹyêei.’

³⁹ Nya ƃe dí zòŋ dí gula gbâlaŋ ŋá dí bàa.

⁴⁰ À kɛ̀ tí, gɛ̀ ní, tãi gbâlaŋ-namui à pá lai, a pâi kɛ̂i le díi-kɛ-ƃelai dîa?”

⁴¹ Nya ƃe dí ŋ̀óo su tòo, dîyɛɛ mai, “A pâi ŋ̀wana-lɔ̂ɔ-ƃelai tí su karâi kpɔ́ é ŋɔkpɔmɔ-ƃa-kpalaŋ tɛ́ɛ tíi-kɛ-ƃela da kpɛni-ŋa pɔ, nyii-ŋai pâi ŋɔkpɔmɔ-ƃai tɛɛ̂i bɔ a gbɔmɔ-ƃai kpɔ̂lu-tãi.”

⁴² Zîsɛ è mò dîa, ǹyɛɛi, “Káfe niî ǹóno ní Ŋ̀âla-kɔlɔi su? ‘Gɔnii nyii bɛ́rɛ tɔɔ-ƃelai dí díŋɛi nàɣiŋ mɛi, a nâa kɛ́ a bɛ́rɛi sonôŋ su-kɔnii gbîŋ-kpiŋ. Ǹúu-namui ƃé m̀ɛnii ŋí kɛ̀. Gáa kúŋɛi a mɛni mĩli-miliɛɛ.’ ”

⁴³ M̀ɛni ma ŋá m̀ó kâa, “Ɣâla ŋɔkâloŋ-laai a pâi kulâi káyêei é tɛ́ɛ lɔii da kpɛni pɔ, nyii zu-ƃelai da pâi m̀á lɛ̂i. [

⁴⁴ Ǹúui a tôo gɔnii tí ŋái, a pâi wólôi. Ǹyaŋ, tãi gɔnii tí a tôo la núu da mai, a pâi maa-nuui fũa-fũâi yɛ̂ɛ muluŋ.”]

⁴⁵ Tãi zâla láa soŋ-ƃela kpaya-kpayai da Faresii-ŋai dí ŋɔsáŋ-woo-ŋai mɛni lai, dí gɔ̀lɔŋ a gɛɛ Zîsɛ è kɛ̀ lônoi gɛ pìlaŋ dîa.

⁴⁶ Nya ƃe dí kɛ̀ pere kɔ́rîi a gɛɛ dí zoŋ. Kɛ́lɛ, dí kɛ̀ yaôi gbɔŋ ma. Kpɛ́ni fêi, gbɔŋ-su-ƃelai dí gàa a Ɣâla ŋɔlóno-kɛ-nuu.