Maafîu 20 - Bible

Díi-kɛ-ƃelai díkaa gbɔmɔ-kpalaŋ ŋá

¹ “Ǹyaŋ Ŋ̀âla-taa kâloŋ-laai káa yɛ̂ɛ kpâlaŋ-namu tɔnɔ nyii kùla kpɔ́ a ɣele-wala pɛpɛ é lí tíi-kɛ-ƃela kɔ́rîi ŋɔkpɔmɔ-kpalaŋ ŋá mɛni mai.

² Tãi díi-kɛ-ƃelai dí nâa fàa la ma a gɛɛ é dífela fé a sêleŋ tɔnɔ fólo mai, è dítɛ̀ɛ ŋɔkpâlaŋ ŋá.

³ Nya ƃe è ŋɔnɔ lì volo-nɛnɛŋ ḿâ é núu da-ŋa kaa tɔɔ ni ǹɔ́ɔ-kpalaŋ ŋá, tíi fé díyêei.

⁴ Nya ƃe è mò dîa ǹyɛɛ, ‘Káa máŋ ka lí gbâlaŋ ŋá. Ŋa pâi káfela fêi a ǹɛ́lɛɛ.’ Nya ƃe dí lì.

⁵ E lì ŋɔnɔ a volo-tɛɛ-ŋuŋ mai da volo-maa-laai é m̀ɛni tɔnɔi tí kɛ́.

⁶ E ŋɔnɔ lì a ŋele-wulii-foloi é núu da-ŋa kaa tɔɔ ni kpɛni-kpɛni. È mò dîa, ǹyɛɛi, ‘Le ƃe kákaa sâa gɛ̂i tɔɔ ni ƃɛ kpɛ́ni-kpɛnii?’

⁷ Dí mò ma, dîyɛɛi, ‘Kpɛ́ni fêi, núu da fé niî kúsiɣe ni.’ Nya ƃe è mò dîa, ǹyɛɛi, ‘Káa máŋ ka lí gbâlaŋ ŋá.’

⁸ Tãi ɣele-wulii è kɛ̀ lai, gbâlaŋ-namui è mò gbâlaŋ mɛi-kaa-nuui ma ǹyɛɛ, ‘Díi-kɛ-ƃelai tóli í dífela fé é siɣe ǹúui gbɛɛ ŋái ma é tóo duɛ-tuɛi ma.’

⁹ Tãi diai pà a ŋele-wulii-foloi, dí pà lai, díkelee dí sêleŋ-seleŋ sɔlɔ ƃô.

¹⁰ Kɛ́lɛ, tãi ǹúui maa-ŋuŋ-ŋai dí pà lai, dí kɛ̀ gáâi dífela-fei a pâi kɛ̂i a gɛ́tɛ é tɛ́ɛ ǹɛɛ-pôlu-ƃelai díwɔ̂i ma. Kɛ́lɛ, dia máŋ dí sêleŋ-seleŋ sɔlɔ ƃô nɔ.

¹¹ Dífela-fei sɔlɔ ƃóɔ dîɛi, díkɛ̀ díŋuŋ su-woo sàai,

¹² dîyɛɛi, ‘Ǹûai ŋí dí tíi kɛ̀ nɔ́ a aƃa tɔnɔ, nya ka ya kúkɛ kwa dîa-ni kwa pɔ̂ri, kúai kwâa sâa tûa voloi kpelêi a lɛɛ la zu ɣele-wulii a kɛ́i.’

¹³ Nya ƃe è ǹúui dɔnɔ wóo su tòo ǹyɛɛ, ‘Ŋ̀wɛ́lii, fé mɛni nyɔ́mɔɔ kɛ́ ní a yá. Kwa yá kúfe sêleŋ tɔnɔ mɛni ƃo ni?

¹⁴ Ísɛŋ-kaoi síɣe í lí. Ŋa pâi ǹɛɛ-polu-ƃelai fela fêi nɔ yɛ̂ɛ yá.

¹⁵ Ve a sɛŋ a gɛɛ ŋá ńîa kɛ́ a ḿbɔɔ? Kpaa, íkaa tólo kulâi ŋásɔŋ-lɛlɛɛi mɛni ma?’

¹⁶ Mɛni ma gbɛɛ-ŋá-ƃelai da pâi kɛ̂i a maa-ŋuŋ. Diai a maa-ŋuŋ díkɛ a gbɛɛ ŋá.”

Zîsɛ è ŋɔsaai maa-mɛni ƃò a tãi zaaƃa ɣelei

¹⁷ Zîsɛ kɛ́ɛ pâi liî Zerusâlɛŋ, è lì a ŋɔpôlu-ƃela puu kao feerɛi dítee-tee kwaa ma, é m̀ó dîa berei ma, ǹyɛɛi,

¹⁸ “Ka káwoli tɔ́ɔ, kúkaa liî Zerusâlɛŋ, ǹyaŋ da pâi Nuu-kpune Ǹóŋ tɛɛ̂i zâla láa soŋ-ƃela kpaya-kpayai pɔ da gɔlɔ-pɔ̃yɛ-ƃelai. Da pâi tɔ̂ŋ pûi ma a gɛɛ dí bàa.

¹⁹ Da pâi dɛɛ̂i Zɛ̃tai-ŋai pɔ́ dí ɣɛlɛ-ma kula gbonôi dí ǹokwa dí gbamo saa-wuru ma. A pâi mu siɣêi a ŋele-kuui zaaƃa-ɣelei.”

Zĩi da Zɔ̂ŋ dílee è Zîsɛ marê kɛ̀ mɛni da ma

²⁰ Nya ƃe Zɛƃɛdi ŋɔnɛnii da ǹônii sinaa feerɛi dí pà Zîsɛ pɔ. È Zîsɛ marê kɛ̀ ǹônii mɛni ma.

²¹ Nya ƃe è marê kɛ̀, ǹyɛɛ mai, “Le ƃe ya ŋ̀wɛ̂lii?” Ǹɛnîi ǹyɛɛ mai, “M̀ó a gɛɛ ńônii-sinâa feerɛi ŋí dɔnɔ é sée ílaa-mii-yee mɛi gbélii é sée íkɔɔ-yee mɛi a tãi yâ kɛ́ la íkâloŋ-laai su.”

²² Kɛ́lɛ, Zîsɛ è ŋ̀óo su tòo, ǹyɛɛ mai, “Káfe mɛnii kɔ́lɔŋ ká maa mare-kɛɛ kɛ̀i. Ka pɔ̂ri kákpelêi gbele-kɔɛi su nyii ŋa kɛ́ pâi ŋ́gbelêi zui?” Dí mò ma, dîyɛɛi, “Kwa pɔ̂ri.”

²³ È díwoo su tòo ǹyɛɛ diai, “Tɔ̃yâ ma, ka pâi kákpelêi ŋákpele-kɔɛi su. Kɛ́lɛ, ve a ŋámɛni a gɛɛ ŋa faa mu ká sée ńaa-mii-yee mɛi da ŋ́gɔɔ-yee mɛi. Kɛ́lɛ, gáa diai mɛni ḿâ Ńâŋ è nàa kpɛ̀tɛ dîɛi.”

²⁴ Tãi ŋɔpôlu-ƃela puui dí mɛ̀ni lai, Dí dílii ŋwàna Zĩi da Zɔ̂ŋ dîa.

²⁵ Kɛ́lɛ, Zîsɛ è dítòli é m̀ó dîa, ǹyɛɛi, “Ka gɔ́lɔŋ a gɛɛ Zɛ̃tai-ŋai díkâloŋ-ŋai díkaa dínûai láa-tuɛ. Ǹyaŋ wala-wala-laa káa dínuu kpaya-kpayai yêei dímɛi.

²⁶ Ve pâi kɛ̂i tí kásama. Kɛ́lɛ, ǹúui ŋ̀wɛ̂lii a gɛɛ é kɛ́ a núu kɛ̂tɛ kásamâi, fɛ̂ɛ é kɛ́ a káyee-mu-nuu.

²⁷ Ǹyaŋ ǹúui ŋ̀wɛ̂lii é kɛ́ a ǹúui maa-ŋuŋ kásamâi, fɛ̂ɛ é kɛ́ a káyee-mu-nuu.

²⁸ Núu-kpune Ǹóŋ fé pá ní la a gɛɛ dí tíi kɛ́ mì, kɛ́lɛ, è pà a gɛɛ é tíi kɛ́ núu-kpune mì, é ŋɔfúlu-laai tɛ́ɛ a núu támaa maa-tee-sɛŋ.”

Zîsɛ è ŋɛi-pu-ƃela feerɛ ŋɛ́i-fuloŋ

²⁹ Tãi dí kùla la Zɛlekoi, núu támaa dí lɛ̀ɛ bôlu.

³⁰ Ŋɛi-pu-ƃela feerɛ dí kɛ̀ see ni berei kɔlɛ. Tãi dí mɛ̀ni la a gɛɛ Zîsɛ è kɛ̀ tɛɛ̂i a naa-perei tíi, dí làɣi dîyɛɛi, “Deeƃé Ǹóŋ, Kúnuu-namui, kúmalôŋ káa!”

³¹ Gbɔŋ-su-ƃelai dí lòno dîa a gɛɛ dí dímɛi saa. Kɛ́lɛ, dí kɛ̀ nɔ lâɣii, dîyɛɛ, “Deeƃé Ǹóŋ, Kúnuu-namui, kúmalôŋ káa!”

³² Nya ƃe Zîsɛ è kpèra é dítoli, ǹyɛɛ diai, “Le ƃe ka ŋ̀wɛ̂lii ŋá gɛ́ kâai?”

³³ Dí mò ma dîyɛɛi, “Kúnuu-namui, gɛ kúŋɛi lá é ƃo.”

³⁴ Zîsɛ è dímalôŋ kàa é ǹyée pɛ́lɛ díŋɛi ma, dí kwaa káa kpɔ́ nɔ́ ŋá ma, dí nâa lɛ̀ɛ bôlu.