Maafîu 19 - Bible

Zîsɛ è sɛŋ-lɛ́ é pîlaŋ táa-laa ma

¹ Nyiŋi pôlu ma, tãi Zîsɛ è kpɛ̀ɛ la a ŋ̀óo-ŋai ŋí ƃóɔi, è kùla Galalii é lí Zuda-kpiniŋ su, Zɔdiŋ Yai pôlu.

² Kpɔŋ kɛ́tɛ è lɛ̀ɛ bôlu, é díƃalo naa.

³ Nya ƃe Faresii-ŋai dí pà bɔ dí díyee laa ma, dîyɛɛ mai, “Gáa dɔ̂ŋ lá-woo ma a gɛɛ núu é ŋɔnɛnî lɛɛ sâpo da kélee mɛni ma?”

⁴ Nya ƃe è díwoo su tòo, ǹyɛɛi, “Káfe ǹono ní a gɛɛ Zɛŋ-kélee-kpɛtɛ-Ɣalai è núu kpɛ̀tɛ a surɔ̂ŋ da nɛnî é siɣe ŋ̀éniɛi kɔ́ɔ pîlanii ma.

⁵ Nya ƃe è mò, ǹyɛɛi, ‘Nyiŋi mɛni ma surɔ̂ŋ a pâi ǹâŋ lɛɛ̂i da ǹee é kánaŋ ŋɔnɛnîi ma, dífeerɛŋɔɔ da pâi kɛ̂i a kpono tɔnɔ.’

⁶ Dífa ŋɔnɔ kɛ̀ a kpono feerɛ, kɛ́lɛ, díkaa a kpono tɔnɔ. Mɛni ma, sɛŋ Ɣâla a bú gîe mai, núu fé gula gîe ma.”

⁷ Dí mò ma, dîyɛɛi, “Gɛ̀ ní, lé-mɛni ŋaŋ ƃé Mose è mò la a gɛɛ núu é táa-laa-kɔlɔ tɛɛ ŋɔnɛnîi pɔ́ é nɛɛi?”

⁸ È mò dîa, ǹyɛɛi, “Káwoli-kpɔlɔ̂i ƃé Mose è fàa la mu a gɛɛ ká kánɛyâai lɛ́ɛ, kɛ́lɛ, vé kɛ́ ní tí a maa-ŋuŋ.

⁹ Kɛ́lɛ, ŋá m̀ôi kâa, ǹúui a ŋɔnɛnîi lɛ̀ɛ mɛni da kpɛ́ni mâ é kúla wulu-wulu kɛ̂ɛ pôlu m̀ai, é nɛnî da kpɛni kúlai, maa-nuui tí káa a wulu-wulu kɛ-nuu. Ǹyaŋ ǹúui kélee a nɛnî kùla nyii ŋɔsurɔ̂ŋ a wɔlɔ ǹɛɛi, maa-nuui tí a wulu-wulu kɛ́.”

¹⁰ Ŋɔpôlu-ƃelai dí mò ma, dîyɛɛi, “À kɛ̀ bere ƃé surɔ̂ŋ da ŋɔnɛnî díloai mɛ̂ni káa la, gɛ̀ ní, maa fé nɛ̃ɛ ní a gɛɛ surɔ̂ŋ é nɛnî káa.”

¹¹ Kɛ́lɛ, è mò dîa, ǹyɛɛi, “Ŋ̀óoi ŋí fé tɛɛ ni núu kélee pɔ, fɛ̂ɛ diai Ɣâla è díɣɛ̀ɛ zu mɛni mai.

¹² Kpɛ́ni fêi, núu da-ni díkaa naa dílee è dímaa sɔlɔ ƃò nɛyaa káa pɔ̂ri fé diɛ. Da-ni díkaa naa nûa dí gɛ̀ nɛyaa káa pɔ̂ri fé diɛ. Da-ni díkaa naa dí díkpîŋ kpera nɛyaa káa mɛni mâ, Ŋ̀âla-taa kâloŋ-laai mɛni ma. Ǹúui pɔ̂ri káa mì a gɛɛ é ǹyée see zɛŋ-lɛɛi ŋí mui, tɔɔ é ǹyée see m̀u.”

Zîsɛ è lûwa tòo nîa-pɛlɛɛ dîa

¹³ Nya ƃe dí pà bɔ a nîa-pɛlɛɛ a gɛɛ é ǹyée pɛlɛ dîa é Ɣâla fɛli dímaa mɛ̂ni m̀a, kɛ́lɛ, ŋɔpôlu-ƃelai dí ǹûai pá a ǹîa-pɛlɛɛi kpera.

¹⁴ Nya ƃe Zîsɛ è mò, ǹyɛɛi, “Ka ǹîa-pɛlɛɛi lɛ́ɛ naa, káfe díkpera a gɛɛ dí pa ḿbɔ. Núu kɛ̂ɛ-ŋai ŋí ƃe Ŋ̀âla-taa kâloŋ-laai káa dímɛni ma.”

¹⁵ Nya ƃe è ǹyée pɛ̀lɛ dîa é kúla naa é li.

Ǹyáŋkpa tɔɔi

¹⁶ Tãi tɔnɔ da, núu tɔnɔ è pà Zîsɛ pɔ́, ǹyɛɛ mai, “Kaamɔ̂ɔ, le-mɛni lɛ́lɛɛ ƃe ŋa pɔ̂ri gɛ̂i a gɛɛ ŋá wɔ́lɔ-wɔlɔ fulu-laa sɔlɔ ƃoi?”

¹⁷ Nya ƃe Zîsɛ è mò ma, ǹyɛɛi, “Íkaa ḿarê kɛ̂i mɛni lɛ́lɛɛ mɛni ma le-mɛni ma? Ɣâla nɔ́ ƃe ǹɛ́lɛɛ̂i. Kɛ́lɛ, à kɛ̀ ya ŋ̀wɛ̂lii í wɔ́lɔ-wɔlɔ fulu-laa sɔlɔ ƃô, gɛ̀ ní dɔ̂ŋ-ŋai mɛi káa.”

¹⁸ È mò ma ǹyɛɛi, “Nênɛ?” Nya ƃe Zîsɛ è mò ǹyɛɛi, “Ífe núu pàa. Ífe wulu-wulu kɛ̀. Ífe ŋúma kɛ̀. Ífe wôya-sere-faa kɛ̀.

¹⁹ Ƃâa kɛ́ ínâŋ ma da ílee. Í íƃarâŋ-nuui wɛli yɛ̂ɛ ya kpîŋ.”

²⁰ Ǹyaŋkpâi è mò ma, ǹyɛɛi, “Ŋa nyii-ŋai ŋí kélee mɛi káa. Lé ƃa lɛɛ a gɛɛ ŋá gɛ́?”

²¹ Zîsɛ è mò, ǹyɛɛi, “À kɛ̀ ya ŋ̀wɛ̂lii ílaa é fɛ̂ɛ a wɛli-kɛ-maa, lí í íkɔ̃liŋ kɔlɛ í zɔ̃ɔ tɛ́ɛ gôlo-ƃelai pɔ. Íkɔ̃liŋ a pâi kɛ̂i Ɣâla-taa. A kɛ̀ tí, pá í lɛ́ɛ bôlu.”

²² Kɛ́lɛ, tãi Ǹyaŋkpâi è ŋ̀óoi ŋí mɛ̀ni lai, è lì pôlu a malôŋ-pere. Kpɛ́ni fêi, gɔ̃liŋ è kɛ̀ a dámaa.

²³ Nya ƃe Zîsɛ è mò ŋɔpôlu-ƃelai dîa, ǹyɛɛi, “Ŋa tɔ̃yâ ƃoi kâa, gbanaŋɔɔ̂i a gɛɛ tɔɔ-nuu é lí Ŋ̀âla-taa kâloŋ-laai su.

²⁴ Ŋá m̀ôi ŋɔ́nɔ kâa, a gɛɛ nàa fii-kpɛɛi a gɛɛ soo-fáleŋ é lɔ́ saɣílaŋ wôloi é tɛ́ɛ tɔɔ-nuu liɛɛ Ɣâla ŋɔkâloŋ-laai su ma.”

²⁵ Tãi ŋɔpôlu-ƃelai dí nyiŋi mɛ̀ni lai, díla è kpàla dîa kpɔ́ a ŋánaa, dîyɛɛi, “Gbɛ̂ɛ ŋaŋ ƃa pɔ̂ri ƃálôi?”

²⁶ Zîsɛ è díkàa, ǹyɛɛ diai, “Nyiŋi bɔri fé núu-kpune mì, kɛ́lɛ, mɛni kélee bɔri káa Ɣâla mì.”

²⁷ Nya ƃe Pitɛ è ŋ̀óo su tòo, ǹyɛɛ mai, “Gáa, kwa kúkɛ mɛni kélee lɛ́ɛ kúkɛ ƃò ípôlu. Gɛ̀ ní, le ƃe kwa pâi zɔlɔ ƃôi?”

²⁸ Nya ƃe Zîsɛ è mò dîa, ǹyɛɛi, “Ŋa tɔ̃yâ ƃoi kâa, tãi núu-kpune Ǹóŋ a pâi seêi la gâloŋ-see-sɛŋ ŋá ŋɔfólo-laai su, vulu-laa ninai sui, káai ka kákaa ḿbôlui, káa máŋ ka pâi seêi kâloŋ-see-sɛŋ puu kao feerɛ ŋá, kakɛ Eezuɛ-ŋai dísuu puu kao féerɛi dímɛni ŋá tee.

²⁹ Ǹyaŋ ǹúui kélee a ŋɔpɛ́rɛi lɛ̀ɛ, ǹêɣe-sinaa da ǹîa-sinaa, kpaa máŋ zaaƃɔlɔ-ni, kpaa máŋ ǹâŋ da ǹee, ŋɔnîa-pɛlɛɛi, kpaa máŋ ŋɔlɔii, ńaai mɛni mai, a pâi dámaa sɔlɔ ƃôi é tɛ́ɛ nyíti ma. A pâi ŋɔ́nɔ wɔlɔ-wɔlɔ fulu-laai sɔlɔ ƃôi.

³⁰ Kɛ́lɛ, núu támaa, nyii-ŋai díkaa a ǹûai maa-ŋuŋ-ŋai, da pâi kɛ̂i a gbɛɛ ŋá, diai díkaa a gbɛɛ ŋái dí kɛ́ a maa-ŋuŋ.