Maafîu 16 - Bible

Faresii-ŋai dí ŋɛi-kɛ-maa kɔ̀ri

¹ Faresii-ŋai da Sâdusii-ŋai dí pà dí a gɛɛ dí díyee laa Zîsɛ ma. Nya ƃe dí m̀arê kɛ̀ a gɛɛ é ŋɛi-kɛ-maa lɛ dîa é kúla Ɣâla-taa.

² Kɛ́lɛ, è díwoo su tòo, ǹyɛɛ diai, “À kɛ̀ a ɣele-wulii, ka mò, ‘Ŋelei su a pâi ponôi, kpɛ́ni fêi, ŋele-kɔlɔŋ a kpɔlûi.’

³ À kɛ̀ a ɣele-wala, ka mò kâa, ‘Fãa a pâi sâa tɛɛ̂i, kpɛ́ni fêi, ŋele-kɔlɔŋ a kpɔlûi, ŋelei su kɛ́ yeŋ.’ Ka ŋele-kɔlɔŋ kɛ́-perei maa-mɛni su-kulâi kɔ́lɔŋ, kɛ́lɛ, káfa pɔ̂ri tãi ŋí su ŋɛi-kɛ-maa-ŋai kɔ́lɔnîi.

⁴ Ŋ̀éniɛi ŋí su ŋ̀wana-lɔ̂ɔ-ƃela da wulu-wulu kɛ-ƃela, díkaa ŋɛi-kɛ-maa kɔ́rîi, ǹyaŋ dífe pâi ŋɛi-kɛ-maa tɔnɔ kpîŋ kâai é kúla Zôna ŋɔŋɛi-kɛ-maai pôlu.” Nya ƃe è dílɛ̀ɛ naa é lí.

Faresii-ŋai da Sâdusii-ŋai díkpolo-tɛ-sɛŋ

⁵ Ŋɔpôlu-ƃelai kɛ́ɛ pâi zîŋ-wolii kpéli maa-perei, dí nìa dífe pa ni a kpólo.

⁶ Nya ƃe Zîsɛ è mò dîa, ǹyɛɛi, “Ka kámɛi káa a Faresii-ŋai da Sâdusii-ŋai díkpolo-tɛ-sɛŋ.”

⁷ Kɛ́lɛ, dí mò díkîe-ni loai, dîyɛɛi, “Kúfe pa ní a kpólo.”

⁸ M̀ɛnii ŋí kɔ́lɔŋɔɔ Zîsɛ mìi, è mò, ǹyɛɛi, “Káai kálaa-lai kuro-têi, le-mɛni ƃe ka môi la kákîe-ni loai a gɛɛ kpólo fé káyêei?

⁹ Káfe niî ŋá kaa ní, kpaa máŋ gbólo-kpala lɔ́ɔlui mɛni fé lɛɛ ní kákili ŋá nyii núu wála lɔ́ɔlui (5,00) ŋá kɔ̂ŋ, da gbólo-pɛnɛ-kpɔlɔ támaai ká ŋá tɛ̀ mai?

¹⁰ Kpaa máŋ gbólo-kpala lɔ́ɔlu mɛi feerɛi, nyii ǹúu wála náaŋ (4,000) ŋá kɔ̂ŋ, da gbólo-pɛnɛ-kpɔlɔ támaai ká ŋá tɛ̀ mai?

¹¹ Gɛ́ɛ̂i ŋaŋ leŋ káfe ŋá kâai a gɛɛ fé lono ní kápɔ é pîlaŋ kpólo mai? Kɛ́lɛ, ka kámɛi káa a Faresii-ŋai da Sâdusii-ŋai díkpolo-tɛ-sɛŋ.”

¹² Dí nâa tàre zu a gɛɛ ve m̀o ni dîa dí dímɛi káa a gbólo-tɛ-sɛŋ, kɛ́lɛ, a Faresii-ŋai da Sâdusii-ŋai dísɛŋ-lɛɛi.

Pitɛ ŋɔkili-kpanaŋ-wooi

¹³ Tãi nâa Zîsɛ è pà la Sɛsɛria Felepâ-kpiniŋ sui, è ŋɔpôlu-ƃelai marê kɛ̀, ǹyɛɛ diai, “Ǹûai da núu-kpune Ǹóŋ tòli a gbɛ̂ɛ?”

¹⁴ Dí mò ma, dîyɛɛi, “Ǹúui da-ni da mò, dîyɛɛ, Batâi-kɛ-nuui Zɔ̂ŋ, da-ni dîyɛɛ, Ilaza, da-ni dîyɛɛ Zɛlemaya, kpaa Ɣâla ŋɔlóno-kɛ-ƃelai dɔnɔ.”

¹⁵ E mò dîa, ǹyɛɛi, “Kɛ́lɛ, ka mò kâa, gbɛ̂ɛ ƃa ńyãa?”

¹⁶ Samaŋ Pitɛ è ŋ̀óo su tòo, ǹyɛɛi, “Íkaa a Kôrai, nyii gáa a Vulu-laa-ɣalai Ǹóŋ.”

¹⁷ Nya ƃe Zîsɛ è ŋ̀óo zu tòo, ǹyɛɛ mai, “Lûwa káa yâ Zôna ǹóŋ Samaŋ! Kpɛ́ni fêi, núu-kpune fé m̀ɛnii ŋí lɛ ni yâ, kɛ́lɛ, Ŋáɣâla-taa-Naŋ ƃe ǹɛ yâ.

¹⁸ Ŋá ŋɔnɔ m̀ó yâ a gɛɛ íkaa a Pitɛ. Ŋa pâi ŋátoli-kpɔŋ tɔɔ̂i gɔnii ŋí ŋá. Ǹyaŋ Dɛ̂ƃele ŋɔwala-walai fé pâi ǹyée m̀ɛi ɣálêi.

¹⁹ Ŋa pâi Ŋ̀âla-taa kâloŋ-laai ŋɔkîi-ŋai tɛɛ̂i ípɔ. Sɛŋ kélee ya ŋìri ŋ̀éniɛi ŋí sui, a pâi kɛ̂i a ŋiriɛɛ Ɣâla-taa. Sɛŋ kélee ya vùloŋ ŋ̀éniɛi ŋí sui, a pâi kɛ̂i a vúloŋɔɔ Ɣâla-taa.”

²⁰ Nya ƃe è ŋɔpôlu-ƃelai lia-woo ƃò a gɛɛ dífe mò núu da kélee ma a gɛɛ gáa a Kôrai.

Zîsɛ è ŋɔsaai maa-mɛni ƃò naa-tuɛ

²¹ É síɣe maa-tãi tí ma Zîsɛ è nâa pɛ̀lɛ ǹɛ̂i ŋɔpôlu-ƃelai dîa a gɛɛ fɛ̂ɛ é lí Zerusâlɛŋ é mɛni-soli támaa kaa naa ǹúu-pɔlɔ-ŋai yée ŋá da zâla láa soŋ-ƃela kpaya-kpayai da gɔlɔ-pɔ̃yɛ-ƃelai, a gɛɛ dí bàa é m̀u síɣe saa yêei a ŋele-kuui zaaƃa-ɣelei.

²² Nya ƃe Pitɛ è lì la é pɛlɛ lônoi ma, ǹyɛɛi, “É folôŋ yâ, Kúnuu-namui! Nyiŋi fé pâi wɔ́lɔ kɛ̂i a yá.”

²³ Nya ƃe è tìnaŋ Pitɛ pɔ-pere, ǹyɛɛ mai, “Sêtɔŋ, síɣe ŋ́gɔlɛ! Íkaa ḿbilîi ƃáre ŋá. Kpɛ́ni fêi, Ɣâla ŋɔmɛni fé íkili ŋá, fɛ̂ɛ núu ŋɔmɛni.”

²⁴ Nya ƃe Zîsɛ è mò ŋɔpôlu-ƃelai dîa, ǹyɛɛi, “À kɛ̀ núu da a ŋ̀wɛ̂lii é lɛ́ɛ ḿbôlu, tɔɔ é gíli kula gbîŋ kponôi é ŋɔsaa-wurii síɣe é lɛ́ɛ ḿbôlu.

²⁵ Kpɛ́ni fêi, ǹúui nyii ŋ̀wɛli é ŋɔfúlu-laai lâai kɛ̂i, a pâi ǹánîi. Kɛ́lɛ, ǹúui a ŋɔfúlu-laai làŋ ḿaa-mɛni mai, a pâi gáâi.

²⁶ Le ƃe núu a pâi zɔlɔ ƃôi a kɛ̀ a ŋɔfúlu-laai làŋ a gɛɛ é ŋ̀éniɛi kélee kɛ́ a bɔ́ɔ? Kpaa máŋ le ƃe núu a pɔ̂ri dɛɛ̂i a gɛɛ é ŋɔfúlu-laai sɔlɔ ƃô pôlu?

²⁷ Núu-kpune Ǹóŋ a pâi pâi a Ŋɔɣâla-taa kela-ŋai Ǹâŋ ŋɔfólo-laai su, gɛ̀ ní, a pâi núu kélee fela fêi tɛi-tɛi ŋɔtii-kɛ-pere ma.

²⁸ Tɔ̃yâ ma, ŋá m̀ó kâa, núu da-ni díkaa tɔɔ ni ƃɛ dífe pâi saâi fɛ̂ɛ dí núu-kpune Ǹóŋ káa pâi ŋɔkâloŋ-laai su.”