Maafîu 1 - Bible

Zîsɛ ŋɔsuui pîlaŋ-pere

¹ Zîsɛ Kôrai, nyii gáa a Deeƃé ǹóŋ da Eberaɣɛ̃ɛ ǹóŋ, ŋɔsuui pîlaŋ-pere ká ŋí.

² Eberaɣɛ̃ɛ è kɛ̀ a Aise ǹâŋ, Aise kɛ́ ƃò a Zeeka ǹâŋ, Zeeka kɛ́ ƃò a Zudasi ǹâŋ da Zudasi ǹêɣe-ni,

³ Zudasi kɛ́ ƃò a Pɛrɛzi da Zera dínâŋ, nyii-ŋai da Tema dí dísɔlɔ ƃôi, Pɛrɛzi kɛ́ ƃò a Ɛsɛlɔŋ ǹâŋ, Ɛsɛlɔŋ kɛ́ ƃò a Araŋ ǹâŋ,

⁴ Araŋ kɛ́ ƃò a Aminada ǹâŋ, Aminada kɛ́ ƃò a Nâsuŋ ǹâŋ, Nâsuŋ kɛ́ ƃò a Samɔŋ ǹâŋ,

⁵ Samɔŋ kɛ́ ƃò a Booɛ ǹâŋ, nyii da Leɣa dí zɔlɔ ƃôi, Booɛ kɛ́ ƃò a Obɛɛ ǹâŋ, nyii da Lûfi dí zɔlɔ ƃôi, Obɛɛ kɛ́ ƃò a Zɛse ǹâŋ,

⁶ Zɛse kɛ́ ƃò a gâloŋ Deeƃé ǹâŋ. Deeƃé kɛ́ ƃò a Saloma ǹâŋ, nyii da Yuraya ŋɔnɛnîi dí zɔlɔ ƃôi.

⁷ Saloma è kɛ̀ a Leoboaŋ ǹâŋ, Leoboaŋ kɛ́ ƃò a Aƃiza ǹâŋ, Aƃiza kɛ́ ƃò a Asa ǹâŋ,

⁸ Asa kɛ́ ƃò a Ziosafa ǹâŋ, Ziosafa kɛ́ ƃo a Zɛoraŋ ǹâŋ, Zɛoraŋ kɛ́ ƃò a Uzia ǹâŋ,

⁹ Uzia kɛ́ ƃò a Zotaŋ ǹâŋ, Zotaŋ kɛ́ ƃò a Eeɣa ǹâŋ, Eeɣa kɛ́ ƃò a Ɛsekaya ǹâŋ,

¹⁰ Ɛsekaya kɛ́ ƃò a Manasɛ ǹâŋ, Manasɛ kɛ́ ƃò a Amɔŋ ǹâŋ, Amɔŋ kɛ́ ƃò a Zosaya ǹâŋ,

¹¹ Zosaya kɛ́ ƃò a Zɛoasiŋ ǹâŋ da Zɛoasiŋ ǹêɣe-ni tãi dí lì la a dia Babelɔŋ.

¹² Díliɛɛ a dia Babelɔŋ, Zɛoasiŋ è kɛ̀ a Siatiɛ ǹâŋ, Siatiɛ kɛ́ ƃò a Zɛrubabɛɛ ǹâŋ,

¹³ Zɛrubabɛɛ è kɛ̀ a Abiyu ǹâŋ, Abiyu ǹyaŋ kɛ́ ƃò a Ilaikiŋ ǹâŋ, Ilaikɛŋ kɛ́ ƃò a Azɔɔ ǹâŋ,

¹⁴ Azɔɔ kɛ́ ƃò a Zadɔ ǹâŋ, Zadɔ kɛ́ ƃò a Akiŋ ǹâŋ, Akiŋ kɛ́ ƃò a Ɛliu ǹâŋ,

¹⁵ Ɛliu kɛ́ ƃò a Iliezɛ ǹâŋ, Iliezɛ kɛ́ ƃò a Mataŋ ǹâŋ, Mataŋ kɛ́ ƃò a Zeeka ǹâŋ,

¹⁶ Zeeka kɛ́ ƃò a Zosɛ ǹâŋ, nyii kɛ̀ a Mere ŋɔsurɔ̂ŋ, nyii Zîsɛ sɔlɔ ƃô da kɛ̂ mà Kôrai.

¹⁷ M̀ɛni ma, é síɣe Eberaɣɛ̃ɛ ŋɔkɛ-ɣéniɛi ma, da ǹóŋ ŋɔi, da ǹóŋ ŋɔlòŋ ŋɔi, da ǹóŋ ŋɔlòŋ ŋɔlòŋ ŋɔi, é seri Deeƃé ŋɔtãi ma, è kɛ̀ a kɛ-ɣéniɛ seêi puu kao náaŋ. É síɣe Deeƃé ŋɔtãi ma é seri tãi mâ dí lì la a Zûu-ŋai Babelɔŋ è kɛ̀ a kɛ-ɣéniɛ seêi puu kao náaŋ. É síɣe ŋɔ́nɔ tãi mâ dí lì la a Zûu-ŋai Babelɔŋ é seri Kôrai ŋɔtãi ma, è kɛ̀ a kɛ-ɣéniɛ seêi puu kao náaŋ.

Berei dí Zîsɛ maa sɔlɔ ƃô lai

¹⁸ Ǹyaŋ berei ŋí ƃé dí Zîsɛ Kôrai maa sɔlɔ ƃô la. Tãi Zosɛ e Zîsɛ ǹee Mere kɔli-kao làa lai, dí lɛ́ɛ pâi kɛ̂i díkîe ma, M̀ɔlêŋ Maa Waai e gɛ̀ é koo síɣe.

¹⁹ Nya ƃe ŋɔsurɔ̂ŋ Zosɛ, nyii kɛ̀ a tɔ̃yâ-nuui, vé kɛ́ ní ŋ̀wɛ̂lii a gɛɛ e Mere ŋumɛ. È gbɛ̀tɛ gíli ŋá a gɛɛ é Mere lɛɛ loo-pere su.

²⁰ Kɛ́lɛ, tãi è kɛ̀ gíli ŋá siâi la é pîlaŋ m̀ɛni-ŋai ŋí diai, Kúnuu-namui ŋɔkélai dɔnɔ è pà bɔ́ nyiî-pere, ǹyɛɛ mai, “Deeƃé ǹóŋ Zosɛ, ífe yào Mere siɣe mɛ̂ni ma, nyii gáa a ínɛnîi, kpɛ́ni fêi, gooi gáa mai, M̀ɔlêŋ Maa Waai ƃé gɛ̀ é kɛ́ mà.

²¹ Ǹyaŋ a pâi lóŋ-surɔŋ maa sɔlɔ ƃôi, nyii ya pâi ǹáa seêi a Zîsɛ, kpɛ́ni fêi, a pâi ŋɔnûai ƃâloi dísɔnyɔ̂ŋ yêei.”

²² Nyíŋi kélee è kɛ̀ a gɛɛ m̀ɛnii Kúnuu-namui è wɔ́lɔ mò ŋɔlóno kɛ́-nuui sârai, ŋ̀a-see é kɛ́. È mò ǹyɛɛ,

²³ “Ka gáa, nɛnî-kpela tɔnɔ a pâi koo siɣêi é lóŋ-surɔŋ maa sɔlɔ ƃó, nyii da pâi dôlii a Imayuwɛ” (nyii su-kulai ƃa, Ɣâla káa kúkɔlɛ).

²⁴ Zosɛ kɛ́ɛ a ŋ̀ɛ́i lá ƃói, è gɛ̀ yɛ̂ɛ berei Kúnuu-namui Ɣâla ŋɔkélai è mò la mai. È ǹyée sèe ŋɔnɛnîi mu,

²⁵ kɛ́lɛ, vé kɛ́ ní a m̀aa-mɛni kɔ́lɔŋɔɔ é lɛ́ɛ la zu é ŋɔlóŋ-surɔŋ maa-ŋuŋ sɔlɔ ƃó. È ǹáa sèe a Zîsɛ.