Lukə 20 - Bible

Dí Zîsɛ ŋɔwála-wâla-laai maa mare-kɛɛ kɛ̀

¹ Nya ƃe e kɛ̀ ti, ŋele-ŋai ti dɔnɔ ma tãi e kɛ̀ Ɣâla-woo lɛ̂i la ǹûai dîa gɛ Duŋ Lɛ́lɛɛi mɛni ƃo Ŋ̀âla-pɛrɛ Kɛ́tɛi mui, zâla láa soŋ-ƃela kpaya-kpayai da gɔlɔ-pɔ̃yɛ-ƃelai, bɛlɛɛ ǹúu-pɔlɔ-ŋai dîa, dí pà bɔ.

² Díyɛɛ ma, “Mó kûa le-wala-wala-laa ƃe íkaa mɛni-ŋai ŋi kɛ̀ lai? Kpaa máŋ, gbɛ̂ɛ ƃé Ɣâla ŋɔwala-laai ŋí tɛ̀ɛ ípɔ?”

³ E díwoo su tòo, ǹyɛɛi, “Ńyãa máŋ ŋa pâi mare-kɛɛ tɔnɔ kɛ̂i kâa; ká m̀ó mâ,

⁴ Zɔ̂ŋ ŋɔbatâi kɛɛi e kùla Ɣâla-taa, kpaa e kùla nûa yêei?”

⁵ Nya ƃe dí kɛ̀ lônoi díkîe-ni pɔ, dîyɛɛi, “Kwa mò kûɛ, ‘E kùla Ɣâla-taa,’ a pâi môi, ǹyɛɛi, ‘Le ƃe kɛ̀ káfe laa ni la?’

⁶ Kɛ́lɛ, à kɛ̀ kwà mò kûɛ, ‘E kùla nûa yêei,’ ǹûai kélee da pâi kúsɔɔ̂i a kɔni; kpɛ́ni fêi, díkelee da ziɣe a tɔ̃yâ a gɛɛ Zɔ̂ŋ e kɛ̀ a Ɣâla ŋɔlóno-kɛ-nuu.”

⁷ Nya ƃe dí ŋ̀óo su tòo a gɛɛ dífe gɔlɔŋ ƃɛi e kùla naai.

⁸ Nya ƃe Zîsɛ e mò dîa, ǹyɛɛi, “Ńyãa máŋ fé pâi m̀ôi kâa le-wala-wala-laa ƃe ŋa mɛni-ŋai ŋi kɛ̂i la.”

Záŋ bîlaŋɔɔi m̀á-kpɔmɔ-kpalaŋ ma da maa-tîi kɛ́-ƃelai

⁹ Nya ƃe è pɛ̀lɛ zã́ŋ ŋí sɔ̂ɔ ma ǹûai dîɛ, ǹyɛɛi, “Nalôŋ tɔnɔ ƃe ƃá-kpɔmɔ-kpalaŋ kɛ̀. É ǹɛɛ ŋɔkpâlaŋ ŋá tíi-kɛ-ƃelai da-ni yée ŋá, é lí lɔii da kpɛni su, é tûa kpɔ́ naa a ŋánaa.

¹⁰ Tãi m̀á-kpɔ̂lu-tãi e sèri lai, e ǹyée-mu-ƃelai dɔnɔ tɛ̀ɛ díi-kɛ-ƃelai pɔ naa a gɛɛ dí ŋɔkpɔmɔ-ƃai da tɛɛ mì; kɛ́lɛ, díi-kɛ-ƃelai dí ǹokwa, dí dɛɛ pôlu a ǹyée folo.

¹¹ Nya ƃe e ǹyée-mu-nuu da kpɛni tɛ̀ɛ ŋɔ́nɔ; dí ǹokwa máŋ, dí ŋumɛ-tua tee-tee kɛ́ la, dí dɛɛ pôlu a ǹyée folo.

¹² Nya ƃe e ŋɔ́nɔ ǹúui zaaƃai tɛ̀ɛ; kɛ́lɛ, dí ŋ̀wana máŋ, dí gbɛ.

¹³ Nya ƃe m̀á-kpɔmɔ-kpalaŋ-namui e mò, ǹyɛɛi, ‘Lé ƃé ŋa pâi gɛ̂i? Ŋa pâi ŋáwɛli-kɛ-maa-loŋ tɛɛ̂i. Ɣele da, da pâi m̀âa siɣêi.’

¹⁴ Kɛ́lɛ, tãi díi-kɛ-ƃelai dí gàa lai, dí mò díkîe-ni dia, dîyɛɛi, ‘Bɔɔ-sɛŋ-namui ká ŋi. Kwaa bàa, gɛ̀ ní, bɔɔ-sɛŋ a pâi kɛ̂i a kúpɔɔ.’

¹⁵ Nya ƃe dí bìli m̀á-kpɔmɔ-kpalaŋ pôlu-pere, dí bàa. Le ƃe m̀á-kpɔmɔ-kpalaŋ-namui a pâi gɛ̂i a diai?

¹⁶ A pâi pâi e díi-kɛ-ƃelai su kara, e m̀á-kpɔmɔ-kpalaŋ tɛɛ nûa da kpɛni-ŋa pɔ.” Díkɛɛ da mɛnii ŋi mɛnii, dí mò, dîyɛɛi, “Ɣâla, ífe ǹɛɛ naa é kɛ́ ti!”

¹⁷ Kɛ́lɛ, è díkàa, ǹyɛɛi, “Gɛ̀ ní, Ŋ̀âla-wooi ŋí bɔ̃yɛɛ̂i ŋɔsu-kulâi ƃa lé? ‘Gɔnii nyii bɛ́rɛ tɔɔ-ƃelai dí díŋɛi nàɣiŋ mɛi, a nâa kɛ́ a bɛ́rɛi sonôŋ su-kɔnii gbîŋ-kpiŋ.’

¹⁸ Ǹúui kélee a tôo gɔnii tí ŋái, a pâi wólôi; kɛ́lɛ, tãi a tôo la núu da mai, a pâi maa-nuui fũa-fũai yɛ̂ɛ muluŋ.”

Ŋuŋ-fela-fe-ŋai tɛɛ-mɛni Gâloŋ Siizɛ pɔ

¹⁹ Zâla láa soŋ-ƃela kpaya-kpayai da gɔlɔ-pɔ̃yɛ-ƃelai dí kɔ̀ a gɛɛ dí zoŋ nɔ a tãi ti; kɛ́lɛ, dí yào ǹûai dîa, kpɛ́ni fêi, dí gɔ̀lɔŋ e záŋ ŋi sɔ̀ɔ e pîlaŋ díkpîŋ dîa.

²⁰ Nya ƃe dí m̀aa kpɛ̂ɛ dí maa-mɛni kɔ́ri-ƃela tɛɛ, nyii-ŋai dí díkpîŋ kɛ̀ nɔ yɛ̂ɛ nûa ƃe dísɔŋ lɛ́lɛɛ̂i a gɛɛ dí zoŋ ǹóno-woo su, dí dɛɛ gɔmɛnɛ-nuu pɔ, e kɛ́ ŋɔwala-wala-laai su.

²¹ Dí m̀are kɛ̀, dîyɛɛi, “Kaamɔ̂ɔ, ku gɔlɔŋ ya lôno, íkɛ mɛni lɛ a zã́a. À kɛ̀ ti, núu kélee káa nɔ íŋɛi tɔnɔɔ, íkɛ Ɣâla ŋɔperei lɛ tɔ̃yâ ma.

²² Gáa dɔ̂ŋ lá-woo ma a gɛɛ ku ŋuŋ-fela-fei tɛɛ Gâloŋ Siizɛ pɔ, kpaa ve ti?”

²³ Kɛ́lɛ, e díkiri-lii su kàa, ǹyɛɛ dîa,

²⁴ “Ka zɛŋ-kaoi da lɛ́ mâ. Gbɛ̂ɛ pɔɔkɔ̂ŋ ƃe ma da ǹáai?” Dí mò, dîyɛɛi, “Gâloŋ Siizɛ.”

²⁵ E mò dîa, ǹyɛɛi, “Gɛ̀ ní, zɛŋ gáa a Gâloŋ Siizɛ pɔ́ɔi, ka dɛɛ Gâloŋ Siizɛ pɔ, ǹyaŋ zɛŋ gáa a Ɣâla pɔ́ɔi, ka dɛɛ Ɣâla pɔ.”

²⁶ Nya ƃe, pɔ̂ri ma fé kɛ́ ni dîɛ a gɛɛ dí zoŋ ǹûai ŋɛi ǹóno-woo su; ŋɔmɛni su-too-wooi è díla kpàla dîa, dí dímɛi saa.

M̀are-kɛ̂i bîlaŋɔɔi mu-siɣe saa yêei tãi mai

²⁷ Sâdusii-ŋai diai maa-sia too, dîyɛɛ a gɛɛ saa mu siɣe-mɛni fé mai, dí pà bɔ,

²⁸ dí m̀arê kɛ̀, dîyɛɛi, “Kaamɔ̂ɔ, Mose e bɔ̃̀yɛ kûɛ a gɛɛ núu ǹîa à sàa, ŋɔnɛnîi e ƃo ma ve lóŋ kaa ni ma, fɛ̂ɛ ǹúui ti e bɔɔ-nɛnii kula e lóŋ sɔlɔ ƃo ma ǹîa mɛni ma.

²⁹ Lee-kaa-sinaa lɔ́ɔlu mɛi feerɛ ƃe kɛ̀ naa; duɛ-tuɛi e nɛnî kùla, e saa, ve lóŋ kaa ni ma;

³⁰ veerɛ da zaaƃa-ɣelei dí gùla.

³¹ Ǹúu lɔ́ɔlu mɛi feerɛi máŋ kélee dífe lóŋ kaa ni ma, dí saa.

³² Gbɛɛ ŋái, nɛnîi kpîŋ e nâa saa.

³³ À kɛ̀ ti, zaa-ƃelai mu-siɣe-ɣele, gbɛ̂ɛ ŋɔnɛnî ƃe pâi kɛ̂i la? Kpɛ́ni fêi, núu lɔ́ɔlu mɛi feerɛi ŋi dí gùla a nɛnî.”

³⁴ Nya ƃe Zîsɛ e mò dîa, ǹyɛɛi, “Ŋ̀éniɛi ŋi su-sinaâi da nɛnî kùla díkɛ nɛnî kóraŋ ƃo;

³⁵ kɛ́lɛ, nyii-ŋai diai díkaa a dímaa nɛ̃ɛ a gɛɛ dí seri ŋ̀éniɛi su pâi tuɛ-pere a zaa-ƃelai mu-siɣe-ɣelei, dífe pâi nɛnî kulâi, kpaa máŋ díkɛ nɛnî kóraŋ ƃo;

³⁶ ǹyaŋ, dífe pâi saâi ŋɔ́nɔ, kpɛ́ni fêi, díkaa yɛ̂ɛ Ŋ̀âla-taa-kela-ŋai, díkɛ ƃo ŋɔ́nɔ a Ɣâla lonii, a gɛɛ díkaa a mu-siɣe saa-yeei lonii.

³⁷ Mose ǹyaa kpîŋ è nɛ̀ ŋɔmɛni-pɔlɔi su nyii bîlaŋɔɔi gbɔlɔi ma, ƃɛi è Kúnuu-namui tòli naa a Eberaɣɛ̃ɛ Ŋɔɣâlai, Aise Ŋɔɣâlai, da Zeeka Ŋɔɣâlai, a gɛɛ dí zaa-ƃelai mu sìɣe.

³⁸ Ɣâla fé a zaa-ƃelai Díɣâla, kɛ́lɛ, fɛ̂ɛ núu fulu-ŋai; kpɛ́ni fêi, núu kélee káa a vulu ŋ̀ɛi.”

³⁹ Nya ƃe gɔlɔ-pɔ̃yɛ-ƃelai da-ni dí ŋ̀óo su tòo, dîyɛɛi, “Kaamɔ̂ɔ, yâa lono a ǹɛ́lɛɛ.”

⁴⁰ Nya ƃe dílii fé kpele ni a gɛɛ dí m̀arê kɛ́ ŋɔ́nɔ.

M̀are-kɛ̂i bîlaŋɔɔi Deeƃé ǹóŋ mai

⁴¹ È mò dîa, ǹyɛɛi, “Da pɔ̂ri m̀ôi leŋ a gɛɛ Kôrai káa a Deeƃé ǹóŋ?

⁴² Kpɛ́ni fêi, Deeƃé ǹyaa kpîŋ e mò Ŋ̀ule-woo-kɔlɔi su, ǹyɛɛi, ‘Nùu-namu-nuui e mò Ŋánuu-namui ma, “See ǹáa-mii-yee mɛi,

⁴³ é lɛ́ɛ la zu ŋá íkpɔara-ƃelai pú íkɔɔ mu.” ’

⁴⁴ Deeƃé a dòli a Nuu-namu; à kɛ̀ ti, a pɔ̂ri kɛ̂i leŋ a ǹóŋ?”

Zîsɛ è gɔlɔ-pɔ̃yɛ-ƃelai ƃɛlɛ tôo

⁴⁵ Ǹûai kélee kɛ́ɛ díwoli tɔɔ̂i, e mò ŋɔpôlu-ƃelai dîa, ǹyɛɛi,

⁴⁶ “Ka kámɛi káa a gɔlɔ-pɔ̃yɛ-ƃelai, diai da ŋ̀wɛ́li dí kɛ́ tɛɛ̂i yokpo kôya-koya su, díkɛ la-ti-maa wɛ̂li ǹûa yêei ǹɔ́ɔ-kpalaŋ-ŋai ŋá, díkɛ ƃaa-kɛ-maa see-sɛŋ-ŋa wɛ̂li Ŋ̀âla-fɛli-kêre-ŋai mu, da gúu-ŋai sui,

⁴⁷ kɛ́lɛ, da pɔɔ-nɛyaa fìli díkɔ̃liŋ su, dí Ɣâla fɛli a zu kôya a gɛɛ dí dímɛni nyɔ́mɔɔi mɛi pɛlɛ. Dia ƃe pâi maa-nɔɔ kâai a zu kɛ́tɛ.”