Lukə 17 - Bible

Zu-kɔ̂ɔŋ-ŋai da núu kɛ̀ é sɔnyɔ̂ŋ kɛ́i

¹ Nya ƃe e mò ŋɔpôlu-ƃelai dîa, ǹyɛɛi, “Va wɔ́lɔ pɔ̂ri kɛ̂i a gɛɛ su-kɔɔŋ fé pa; kɛ́lɛ, kpalo ƃélaâi ǹúui ma a pa lai!

² Maa eêi pɔ̂ri kɛ̂i a nɛ̃ɛ à kɛ̀ kɔni kɛ́tɛ eêi kɛ̀ sɛlɛnii gɔŋ ma dí bili yuo su, é tɛ́ɛ la máŋ a gɛɛ e nîa-pɛlɛɛi ŋi dɔnɔ kɛ́ e karêŋ.

³ Ka kámɛi káa; íƃarâŋ-nuu à sɔnyɔ̂ŋ kɛ̀ a yá, ǹia-woo ƃo, à kɛ̀ à ǹíi pène, zu-mɛni lɛɛ mì.

⁴ À mɛni nyɔ́mɔɔ kɛ̀ a yá ɣele tɔ̂nɔ yée mu lɔ́ɔlu mɛi feerɛ, é tínaŋ é mó la kɛ̀ yâ lɔ́ɔlu mɛi feerɛ, ǹyɛɛi, ‘Ńii a pene,’ fɛ̂ɛ í zu-mɛni lɛɛ mì.”

Kúlaa-laai da pú ma

⁵ Zia-ƃelai dí mò Kúnuu-namui ma, dîyɛɛi, “Kúlaa-lai dámaa pú ma!”

⁶ Nya ƃe Kúnuu-namui e mò, ǹyɛɛi, “Eêi kɛ̀ laa-la káa kɛ̀ káyêei yɛ̂ɛ mɛsɛ-kao, kâi máŋ mo sakemɔŋ-wurii ŋi ma, ‘Ísame kúla, í sí yuo su.’ Gɛ̀ ní, eêi máŋ káwoo siɣe.

Ǹyée-mu-nuui kɛ-tii

⁷ “Gbɛ̂ɛ ƃe kásama, nyii ǹyée-mu-nuu káa ǹyêei gɛ sí-sɛŋ sí, kpaa máŋ gɛ ƃála mɛi kâa, à kùla gbâlaŋ ŋá a pɔ̂ri m̀ôi ma, ‘Pá a maa félaa, í sée teƃele ma, í ílaa míi’?

⁸ Ve pâi m̀ôi ma, ǹyɛɛi, ‘Ŋámii-sɛŋ kpɛtɛ, í íseɣe kôyai kpiniŋ íleŋei, í ŋámii-sɛŋ tɛɛ ḿbɔ e lɛɛ zu ŋa kpɛɛ a ǹáa mii, ŋa ŋ́gbele; nàa pôlu ma, ya pâi ílaa miî í íkpele’?

⁹ A pɔ̂ri ǹyée-mu-nuui sɛɣɛi fêi, kpɛ́ni fêi, e mɛni kɛ̂ e mò ma a gɛɛ e gɛ́i?

¹⁰ Káa máŋ, kà mɛnii kélee kɛ̀ da mò káa a gɛɛ ka gɛ́i, ka mò, ‘Kúkaa a yée-mu-ƃela kúmaa fé nɛ̃ɛ ni; kwâa díi kɛ́ nɔ nyii kɛ̀ a kúkɛ-tii.’ ”

Zîsɛ e gbôdo-ƃela puu ƃàlo

¹¹ Nya ƃe e kɛ̀ ti, gɛɛ kɛ̀ liî Zerusâlɛŋ e kɛ̀ tɛɛ̂i Sameria da Galalii-lɔii loai.

¹² Gɛɛ a seri kɛ̀ kpanâŋ tɔnɔ lái, e gbôdo-ƃela puu kâa tɔɔ ni kwaa kôya ma.

¹³ Dí làɣi a díwoo su kɛ́tɛ, dîyɛɛi, “Zîsɛ, Kaamɔ̂ɔ, kúmalôŋ káa.”

¹⁴ Gɛɛ a díkâai, e mò dîa, ǹyɛɛi, “Ka lí, ka kákpîŋ lɛ zâla láa soŋ-ƃelai dîa.” Nya ƃe e kɛ̀ ti, díkɛɛ liî, dí ƃalo.

¹⁵ Nya ƃe dɔnɔ, tãi e gàa la a gɛɛ a ƃáloi, e pene pôlu, gɛ Ɣâla láa maa tɛ̂ a láɣi-woo.

¹⁶ È tòo Zîsɛ kɔ́ɔ mu, gɛ sɛɣɛ̂i-fei tɛɛ bɔ́. Nalôŋ è kɛ̀ a Sameria-nuu.

¹⁷ Zîsɛ e zu tòo, ǹyɛɛi, “Ḿve núu puu ƃalo ni? Mɛi náaŋ kɔɔ?

¹⁸ Núu da fé naa e pene pôlu e laa-maa-tɛ tɛɛ Ɣâla pɔ fɛ̂ɛ yá ŋɔ̃yâi ŋi?”

¹⁹ Nya ƃe e mò ma, ǹyɛɛi, “Ímu siɣe, í li yɛ̂; ílaa-lai a íƃalo.”

Ŋ̀âla-taa kâloŋ-laai pá-pere

²⁰ Ǹyaŋ, tãi Faresii-ŋai dí m̀arê kɛ̀ la e pîlaŋ Ɣâla ŋɔkâloŋ-laai pa-mɛni mai, e díwoo su tòo, ǹyɛɛi, “Ɣâla ŋɔkâloŋ-laa fé pâi a ŋɛi-kɛ-maa a gɛɛ ka gáa;

²¹ fulɔi máŋ dí mò, dîyɛɛi, ‘Gáa, gáa ƃɛ!’ Kpaa, ‘Gáa naa.’ Kpɛ́ni fêi, ka gáa, Ɣâla ŋɔkâloŋ-laai káa kásama.”

²² Nya ƃe e mò ŋɔpôlu-ƃelai dîa, ǹyɛɛi, “Ŋele-ŋai da pâi pâi tãi ka pâi ŋ̀wɛ̂lii ka núu-kpune Ǹóŋ ŋɔɣelei dɔnɔ káa lai. Kɛ́lɛ, káfe pâi gaai.

²³ À kɛ̀ ti, da pâi m̀ôi kâa, dîyɛɛi, ‘Gáa, gáa naa!’ Kpaa, ‘Gáa, gáa ƃɛ.’ Kɛ́lɛ, káfe lì, káfe pîlaŋ dípôlu.

²⁴ Kpɛ́ni fêi, berei nɔ́ ŋ̀ele-gbâna-ŋɔŋ a tɛ̂ɛ la, gɛ́ ŋ̀elei su pòno é kúla m̀éla tɔnɔ ma é lí gbéli mai, bere ƃé núu-kpune Ǹóŋ a pâi kɛ́i la a ŋɔɣelei.

²⁵ Kɛ́lɛ, fulɔi fɛ̂ɛ e mɔ̃lɛ mɛni támaa su, ŋ̀éniɛi ŋi su-ƃelai dí dípôlu fé mì.

²⁶ Berei nɔ e kɛ̀ la a Nôa ŋɔɣele-ŋai, bere nɔ ƃe núu-kpune Ǹóŋ ŋɔɣelei a pâi kɛ́i la,

²⁷ dí kɛ̀ dílaa mii, díkɛ díkpele, díkɛ nɛnî kula, díkɛ nɛnî kóraŋ ƃo é lɛ́ɛ zu ŋelei e seri Nôa e lɔ la ǹyá ŋá-keleŋ kɛ́tɛi sui. Nya ƃe ǹya-fɛɛi e pà, e díkelee dísu kara.

²⁸ Bere tɔnɔi ti su nɔ ƃe e kɛ̀ la a La ŋɔɣele-ŋai-di kɛ̀ dílaa miî, díkɛ díkpele, díkɛ sãa ya, díkɛ gɔlɛ, díkɛ sí-sɛŋ sí, díkɛ pɛ́rɛ tɔɔ,

²⁹ kɛ́lɛ, ŋ̀elei La è kùla la Sodɔŋ, ŋɔŋ da sɔɔfɔ dí kùla ŋ̀elei su é díkelee dísu karai,

³⁰ berei tí nɔ́ ƃé a pâi kɛ̂i la a ŋ̀elei núu-kpune Ǹóŋ maa mɛ̂ni a pâi lɛ̂i lai.

³¹ Maa-ɣelei tí, nɛ̃ɛ naa ǹúui gáa bɛ́rɛi kɔŋ ma, kɛ́lɛ, ŋɔsãâi díkɛ ƃò bɛ́rɛi mui, vé pìlaŋ é pa dísiɣêi naa. Ǹɛɛ naa ǹúui gáa gbâlaŋ ŋái vé lì pôlu.

³² La ŋɔnɛnîi maa-mɛ̂ni é lɛ́ɛ kákili ŋá.

³³ Ǹúui pâi kɔ̂i a gɛɛ e ŋɔfúlu-laai lâai kɛ́i, a pâi ǹánîi. Kɛ́lɛ, ǹúui a ŋɔfúlu-laai làŋ, a pâi ǹáâi kɛ̂i.

³⁴ Ŋá m̀ó kâa, maa-kpinii ti su sinâa feerɛ da pâi kɛ̂i gbìŋ tɔnɔ ŋá; da pâi dɔnɔ siɣêi, gbeli e lɛɛ naa.

³⁵ Nɛnî feerɛ da pâi kɛ̂i mɔlɔŋ siâi gîe ma; da pâi dɔnɔ siɣêi, gbeli e lɛɛ naa. [

³⁶ Sinâa feerɛ da pâi kɛ̂i gbâlaŋ ŋá; da pâi dɔnɔ siɣêi, gbeli é lɛ́ɛ naa.”]

³⁷ Nya ƃe dí ŋ̀óo su tòo, díyɛɛ ma, “Mi-ta ƃe, Kúnuu-namui?” È mò dîa, ǹyɛɛi, “Ƃɛ́i sɛŋ-poma káa naai, nàa nɔ́ ƃe gɔ̃ɔ-ŋai da kpɔ̂ŋ naa.”