Lukə 14 - Bible

Zîsɛ a vɛ́ɛ-fɛɛ kɔlɔ-fela-naloŋ ƃálo

¹ Nya ƃe e kɛ̀ ti, gɛɛ kɛ̀ liî Faresii-nuu kpaya-kpayai dɔnɔ ŋɔpɛ́rɛi mu a Vii-tɔɔ-ɣelei a gɛɛ e ǹáa mii, dí kɛ̀ kpɔ́ nɔ m̀aa kpɛɛ̂i.

² Nalôŋ tɔnɔ ƃe kɛ̀ naa ŋ̀ɛi tuɛ nyii fɛ́ɛ-fɛɛ kɔlɔ-fela è kɛ̀ mai.

³ Nya ƃe Zîsɛ e lòno dɔ̂ŋ-lɛ-ƃelai da Faresii-ŋai pɔ, ǹyɛɛi, “Gáa dɔ̂ŋ lá-woo ma a gɛɛ dí núu ƃalo a Vii-tɔɔ-ɣelei, kpaa ve gɛ ti?”

⁴ Kɛ́lɛ, dí lɛ̀ɛ a dímɛi saa. Gɛɛ ti, e ǹyée pɛ̀lɛ ma e m̀alo e dɛɛ pôlu.

⁵ Nya ƃe e mò dîa, ǹyɛɛi, “Káai ŋi kata nênɛ ƃe ǹóŋ-surɔŋ kpaa niŋa-sirɛ à kɛ̀ ǹyêei, à tòo ya-loa su va gula naa a maa felaa a Vii-tɔɔ-ɣelei?”

⁶ Kɛ́lɛ, dífe pɔ̂ri ni kɛ̀ mɛnii ŋi su toôi.

Gúu su ŋɔ̃yâ-ŋai

⁷ Gɛɛ ti, e sáŋ sɔ̀ɔ dîɛ diai dí mɛlɛ-tolii ƃo a dîa tãi e gàa la berei dí zee-sɛŋ lɛ́lɛɛ-ŋai siɣe la zui, ǹyɛɛ dîa,

⁸ “Tãi núu da à ƃɛlɛ-toli ƃò a yá nɛni-kula-kuu su, ífe zee-sɛŋ ǹɛ́lɛɛi siɣe zu. Kpɛ́ni fei, ɣele da da ƃɛlɛ-toli ƃò a ǹúui nyii gɛ́tɛ̂i dɛɛ yâi;

⁹ gɛ̀ ní, ǹúui mɛlɛ-tolii ƃo a káfeerɛi a pâi pâi, ǹyɛɛ yâ, ‘Ísee-sɛŋ tɛɛ nalôŋ ŋi pɔ.’ Gɛ̀ ní, ŋumɛ a pâi íkɛ̂i, í see teƃele-wóŋ ma.

¹⁰ Kɛ́lɛ, tãi da ƃɛlɛ-toli ƃò a yái, ye lí í see teƃele-wóŋ ma a gɛɛ ǹúui mɛlɛ-tolii ƃoi à pà, a pâi m̀ôi yâ, ǹyɛɛ, ‘Marâŋ, ye lí see teƃelei ŋuŋ ma’. Gɛ̀ ní, ƃâa a pâi kɛ̂i yâ ǹûai ŋ́ɛi ka dîa-ni kákaa see ni teƃelei mai.

¹¹ Kpɛ́ni fêi, ǹúui kélee a gbîŋ kɛ̀tɛi, maa a pâi yenîi. Kɛ́lɛ, ǹúui à gbîŋ maa yêŋ, a pâi kɛ̂i a gɛ́tɛ.”

¹² E mò máŋ ǹúui ma mɛlɛ-tolii ƃoi, ǹyɛɛi, “Tãi yà ɣele-wala-kuu kɛ̀ da ɣele-wulii-kuui, ífe ƃɛlɛ-toli ƃo a íƃarâai, kpaa ílee-kaa-sinaa, kpaa íkaayɔ, kpaa íkɔlɛ-ma-ƃelai diai dítɔɔ̂i, díaŋ dífe lâa ƃɛlɛ-toli ƃo la a yá a gɛɛ í íwɔ̂i bɔɔ-tee sɔlɔ ƃo.

¹³ Kɛ́lɛ, yà kúu kɛ̀, ye ƃɛlɛ-toli ƃó a gôlo-ƃelai, bɛlɛɛ ǹûa woŋo-kpalaa-ma-ŋai dîa, da gɔɔ-saa-ƃelai, da ŋɛi-pu-ƃelai.

¹⁴ Gɛ̀ ní, lûwa a pâi kɛ̂i yâ. Kpɛ́ni fêi, dífa pɔ̂ri íwɔ̂i bɔɔ-tee fei. Ya pâi ífela fei sɔlɔ ƃôi a Dɔ̃yâ-ƃelai mu-siɣe-ɣele.”

Záŋ bîlaŋɔɔi mii-sɛŋ mii-kuu kɛ́tɛi mai

¹⁵ Diai da dîa-ni dí kɛ̀ see ni teƃelei mai, díta tɔnɔ e mɛnii ŋi mɛni, ǹyɛɛ mai, “Lûwa káa ǹúui ma nyii pâi kpólo miî Ɣâla ŋɔkâloŋ-laai sui!”

¹⁶ Kɛ́lɛ, è mò ma, ǹyɛɛi, “Nalôŋ tɔnɔ ƃe kɛ̀ kúu kɛ́tɛ kɛ̂i, é ƃɛlɛ-tôli ƃó a núu támaa.

¹⁷ Gúui ŋ̀ele kɛ́ɛ a serii, è ǹyée-mu-nuu tɛ̀ɛ ǹûai pɔ́ naa a gɛɛ a ƃɛlɛ-tôli ƃó a dia, ǹyɛɛ, ‘Ka pá, kpɛ́ni fêi, zɛŋ kélee a nâa kpɛtɛ.’

¹⁸ Kɛ́lɛ, díkelee díta fé kula ni zu, díkɛ káfalo kula. Ǹúui duɛ-tuɛ e mò mà, ǹyɛɛi, ‘Ŋaâ lɔii kpua da yá, fɛ̂ɛ ŋa li naa ŋá gáa; ŋa íkpera fêi í ŋákafalo kɛ́.’

¹⁹ Kɛ́lɛ, ǹúui kpeli e mò, ǹyɛɛi, ‘Ŋaâ niŋa-sirɛ puu yá, ǹyaŋ, ŋ́gaa liî naa ŋa dímaa kpɛɛ; ŋa íkpera fêi í ŋákafalo kɛ́.’

²⁰ Ǹúui kpeli e mò, ǹyɛɛi, ‘Ŋaâ nɛnî kula. Maa-mɛni ƃe fa pɔ̂ri pâi la.’

²¹ Nya ƃe ǹyée-mu-nuui e pà e mɛnii ŋi su kula ŋɔnuu-namui ma. Ŋɔnuu-namui líi e ŋwàna, ǹyɛɛ ǹyée-mu-nuui ma, ‘Lí a nâa maa félaa daai sama bere kɛ́tɛ-ŋai da bere pɛlɛɛ-ŋai ma, í pa a gôlo-ƃelai, da nûa woŋo-kpalaa-ma-ŋai, da ŋɛi-pu-ƃelai, da gɔɔ-saa-ƃelai.’

²² Ǹyée-mu-nuui e mò, ǹyɛɛi, ‘Ńâmu, mɛnii í mòi aâ kɛ́, kɛ́lɛ, núu-seei káa niî ƃɛ.’

²³ Nya ƃe ŋɔnuu-namui e mò ǹyée-mu-nuui ma, ǹyɛɛi, ‘Lí bere-ŋai kao ma da gbâlaŋ ŋá-pere-ŋai, í kpala ǹûai lá dí pá a gɛɛ ŋápɛrɛi lá e fɛɛ.

²⁴ Kpɛ́ni fêi, ŋá m̀ó yâ, zinâai ŋi ŋa ƃɛlɛ-toli ƃò a diai díta fé pâi ŋákuu-mii-sɛŋ kɔ́ɔnii.’ ”

Kôrai-pôlu-nuu maa-sɔ̃ɔ

²⁵ Nya ƃe da gbɔŋ kɛ́tɛi dí kɛ̀ liî. E tìnaŋ e m̀o dîa, ǹyɛɛi,

²⁶ “À kɛ̀ núu da à pà ḿbɔ, kɛ́lɛ, ve gbɔɔ̂i-naŋ kpɔara ni, da ǹee, da ŋɔnɛnîi, da ǹônii, da ŋɔlee-kaa surɔŋ, bɛlɛɛ la ŋɔsaa-ƃɔlɔ-ŋai dîa, ooei, ve máŋ gbɔɔ̂i-fulu-laai kpɔara ni, va pɔ̂ri kɛ̂i a ḿbôlu-nuu.

²⁷ Ǹúui va gbɔɔ̂i-saa-wurii siɣe é pîlaŋ la ḿbôlui, va pɔ̂ri kɛ̂i a ḿbôlu-nuu.

²⁸ À kɛ̀ ti, káai ŋi gbɛ̂ɛ ƃe ŋ̀wɛ̂lii e kɔni-yeŋ-keŋ kôya tɔɔ va see fulɔi e dɔɔ-sɛŋ-kao su see e gáa à kɛ̀ gáa ǹyée ŋá e gbɛɛ la?

²⁹ À wàla kɛ́ ti, e máŋ gɔ́ɔ pîlaŋ, pɔ̂ri maa fé mì e gbɛɛ, ǹúui kélee pâi gáâi da pâi pɛlɛɛ̂i a ɣɛ́lɛ-maa-kúlaa ma zu,

³⁰ dîyɛɛ, ‘Nalôŋ ŋi ƃe pɛ̀lɛ ŋɔkɔni-yeŋ-keŋ tɔɔ ma, kɛ́lɛ, pɔ̂ri fé mì e gbɛɛ.’

³¹ Kpaa, le-kaloŋ ƃe a pɔ̂ri mu siɣêi e li m̀arâŋ-kaloŋ tuɛ tɔɔ̂i kɔ su, va fulɔi see e gíli ŋá sia à kɛ̀ kpakolo su kpanaŋɔɔ wála puu káa ǹyêei, da pɔ̂ri kɛ̂i a dítamaa a gɛɛ e li a dîa gâloŋ tuɛ tɔɔ̂i nyii pâi e pɛlɛ ma a kpakolo wála buu feerɛ?

³² À wàla kɛ́ ti, à m̀arâŋ lɛ̀ɛ kwaa kôya ma e gɔ́-ŋa kpɛ́-ƃelai da tɛɛ a gɛɛ dí m̀arê kɛ́ lii-sêe mɛni ma.

³³ Bere tɔnɔi ŋi nɔ ƃe ǹúui kélee va bôlu fé kɔ̃liŋ kélee mii, va pɔ̂ri kɛ̂i a ḿbôlu-nuu.

Kpolo líyeŋ kpɛɛ ma

³⁴ “Kpolo-liyeŋ káa a sɛŋ lɛ́lɛɛ; kɛ́lɛ, gboloi é máŋ ǹíyeŋ láŋ, a pɔ̂ri kɛ̂i leŋ a ǹíyeŋɔɔ ŋɔ́nɔ?

³⁵ Va pɔ̂ri lîi a ǹɛ́lɛɛ ǹɔii da duluŋ dímɛni ma; ǹûai da bìli. Ǹúui wóli káa ma a gɛɛ e mɛni mɛnii, tɔɔ e mɛni.”