Lonon mo 5 - Bible

Ǹûai dímaa fé waa nii

¹ Nya ƃe Yâwɛɛ è mò Mose ma ǹyɛɛi,

² “M̀ó Eezuɛ-ŋai dîa dí gɔlɔ kâra-maa kɔlɔ-fela-ƃelai kúla mûui su da diai kɔlɔ-fela nyɔ́mɔɔ káa dîa nyii a gɛ̀ yá kɛ́ kúla diai, da diai kélee dímaa fé waa ní, kpɛ́ni fêi, dí lɛ̀ɣɛ saa mai.

³ Surɔ̂ŋ kpaa nɛnî, ka díkula mûui su ƃɛ́i ŋ́gaa naa ŋánûai sámai dífa lâa nàa kara la.”

⁴ Eezuɛ-ŋai dí gɛ̀ yɛ̂ɛ berei Yâwɛɛ è mò la Mose mai. Dí díkelee kùla m̀ûui su.

Sɔnyɔ̂ŋ fela-fei kɛ̀ mɛni

⁵ Yâwɛɛ è mò Mose ma ǹyɛɛi,

⁶ “M̀ó Eezuɛ-ŋai dîa yɛ̂ɛi, ‘À kɛ̀ surɔ̂ŋ kpaa máŋ nɛnî a sɔnyɔ̂ŋ kɛ̀ a m̀araŋ nuu, gɛ̀ ní gáa a zɔŋ. Ǹyaŋ gɛ̀ ní a sɔnyɔ̂ŋ kɛ́ a ńyãa.

⁷ Fɛ̂ɛ maa-nuui é ŋɔsɔŋyɔ̂ŋ ƃó, é maa-fela kɛ́ ǹúui yêei è zɔnyɔ̂ŋ kɛ̀ lai. É tela zɛŋ tí ŋɔfela ŋáa kɛ́lɛ gîei lɔ́ɔlu, é gbua tɔnɔ too ma.

⁸ Kɛ́lɛ à kɛ̀ ǹúui dí zɔnyɔ̂ŋ kɛ̀ lai a sàa, kpaa máŋ ŋɔnúu da fé ma é zɔ́lɔ ƃó, fɛ̂ɛ dí zɔnyɔ̂ŋ tí maa fela-fei tɛ́ɛ ḿbɔ zâla láa soŋ-nuui mɛni ma. Nàa pôlu ma fɛ̂ɛ é ŋɔ́nɔ ƃála-sirɛ tɛ̀ɛ zâla láa soŋ-nuui pɔ́ ŋɔsɔnyɔ̂ŋ su-mɛni lɛɛ maa-sala kula mɛni ma.

⁹ Ǹyaŋ sama-sãa kélee da sãa maa waa kélee nyii-ŋai Eezuɛ-ŋai da pâ la zâla láa soŋ-nuu pɔ́i, díkaa a bɔ́ɔ.

¹⁰ Zɛŋ maa waai kélee núu a ǹâai kɛ̀ mɛni mai, gáa a zâla láa soŋ-nuui pɔ́ɔ. Sama-sɛŋ kélee núu a dɛ̀ɛ zâla láa soŋ-nuui pɔ́i, gáa a bɔ́ɔ.’ ”

Dɔ̂ŋ bîlaŋɔɔ tólo kúlaa mai

¹¹ Nya ƃe Yâwɛɛ è mò ma ǹyɛɛi,

^12-14 “M̀ó Eezuɛ-ŋai dîa a gɛɛ tãi da surɔ̂ŋ da kíli à kɛ̀ zu a gɛɛ ŋɔnɛnîi wólii à kpɔ́lɔ mà, kpɛ́ni fêi, a wulu-wulu kɛ́, kɛ́lɛ ǹyaŋ ǹyaai a zurɔ̂ŋ vé niî nàa maa kpɛɛ ní, sêre fé tela nàa a gɛɛ é tɔ̃yâ ƃó, ǹyaŋ vé dísoŋ ní da zurɔ̂ŋ, à kɛ̀ tólo à tɛ̀ zurɔ̂ŋ ŋɛ́i a gɛɛ ŋɔnɛnîi a wulu-wulu kɛ́ a tɔ̃yâ kpaa máŋ vé a tɔ̃yâ,

¹⁵ fɛ̂ɛ maa surɔ̂ŋ tí é lí a ŋɔnɛnîi zâla láa-soŋ-nuui pɔ́ é bɛ́lɛ sâla kula-sɛŋ ma nyii gáa a fêlaƃa-pãi lɔ́ɔlu mɛi feerɛi. Vé wúlɔ pù ma, vé tela kéreŋ-sɛŋ kúŋ nɛ̃ɛ pù ma, kpɛ́ni fêi, gáa a tólo-sala, gɛ́ ƃò a kili-too ŋá sala nyii a sɔnyɔ̂ŋ lɛi.

¹⁶ “Nàa pôlu ma fɛ̂ɛ zâla láa soŋ-nuui é lí a ǹɛnîi Yâwɛɛ ŋɛ́i-tuɛ,

¹⁷ é yá maa waa pú pɔrɔ-leɣe su é pɔ̂rɔ kula Zua kɔlɔ seɣe pɛrɛ maa waai mu é bú ǹyái su.

¹⁸ Zâla láa soŋ-nuui é nɛnîi tɔ́ɔ Yâwɛɛ ŋɛ́i-tuɛ é ŋuŋ fúloŋ é gìli-too ŋá sala-sɛŋ lɔ́ ǹyêei, nyii gáa a tólo sâla-sɛŋ. Ǹyá ŋwanaa sɛŋ-foloi é kɛ́ zâla láa soŋ-nuui yêei nyii a pâ a voo-wooi.

¹⁹ Nyíti pôlu ma fɛ̂ɛ zâla láa soŋ-nuui é nɛnîi kɛ́ é vóo a ŋ̀ooi ŋí. À kɛ̀ ífe niî wulu-wulu kɛ́ ní tãi íkaa la ísurɔ̂ŋ yêei, gɛ̀ ní voo-wooi gáa ǹyá-ŋwanaai ŋí sui vé pâi ísonîi.

²⁰ Kɛ́lɛ à kɛ̀ ƃa wulu-wulu kɛ́,

²¹ gɛ̀ ní Yâwɛɛ a pâi íkɛ̂i a mɛni kɔɔŋ-maa ínûai sáma wulu-wulu kɛ́ mɛni ma é íkɛ íkoo kɛ́ kàra íkpono kɛ́ fɛ̀ɛ-fɛɛ.

²² Ǹyái ŋí nyii a pâ a voo-wooi é tɛ́ɛ íkoi é íkpono fɛ́ɛ-fɛ̂ɛ íkoo é kàra.” Fɛ̂ɛ ǹɛnîi é mó ǹyɛɛ, “É kɛ́ nɔ́ a ńyãa yɛ̂ɛ berei íkaa môi lai.”

²³ Nàa pôlu ma fɛ̂ɛ zâla láa soŋ-nuui é maa kɔlɔi wáa ǹyá ŋwanaai su,

²⁴ é nɛnîi kɛ́ é maa yâi kpéle nyii a pâ a voo-wooi. Ǹyá ŋwanaai a pâi lɔ̂i gbonôi é goi sóli.

²⁵ À kɛ̀ tí zâla láa soŋ-nuui é dólo-sâla-sɛŋ kúla nɛnîi yêei é ǹɛ́ Yâwɛɛ ma é pá la ŋ̀âla-teƃelei ma.

²⁶ Zâla láa soŋ-nuui é dólo sala-sɛŋ daloŋ soŋ zu a kili-too ŋa sala-sɛŋ é géreŋ ŋ̀âla-teƃelei ŋá, é maa yâi tɛ́ɛ ǹɛnîi pɔ́ é gbele.

²⁷ Nɛnîi a ǹyái kpèle, à kɛ̀ a wulu-wulu kɛ́ ŋɔsurɔ̂ŋ yêei, gɛ̀ ní ǹyái a pâi lɔ̂i gbonôi é goi sóli é gbono fɛ́ɛ-fɛɛ é gɛ́ goo kɛ́ kàra. Gɛ̀ ní nɛnîi a pâi kɛ̂i a ŋɛi-kɛ-maa ŋɔnûai sáma wulu-wulu kɛ́ mɛni ma.

²⁸ Kɛ́lɛ à kɛ̀ vé wulu-wulu kɛ́ ní maa waâi, gɛ̀ ní mɛni fé ma. A pɔ̂ri lóŋ maa sɔlɔ ƃôi.

^29-30 “Dɔ̂ŋ ká ŋí tólo mɛni mà tãi surɔ̂ŋ da kíli à kɛ̀ ŋɔnɛnîi ma a gɛɛ ŋ̀ólii a kpɔ́lɔ mà, kpɛ́ni fêi, a wulu-wulu kɛ́i. Fɛ̂ɛ maa-surɔ̂ŋ é lí a ŋɔnɛnîi é dɔɔ ŋ̀âla-ƃelai ŋɛ́i-tuɛ zâla láa soŋ-nuui é mɛni-ŋai kélee kɛ́ la yɛ̂ɛ berei dɔ̂ŋ ŋí a môi lai.

³¹ Mɛni fé ǹɛnîi ŋɔsurɔ̂ŋ ma. Kɛ́lɛ à kɛ̀ mɛnîi à lɛ̀ɛ nɛnîi mâ, fɛ̂ɛ é maa-tɔŋ-kpɛɛ-maa sɔlɔ ƃó.”