Lonon mo 23 - Bible

¹ Nya ƃe Bâlaŋ è mò Bâla mà, ǹyɛɛi, “Ɣâla-teƃele lɔ́ɔlu mɛi feerɛ tɔ́ɔ mî ƃɛ́, í pá a niŋa-sirɛ lɔ́ɔlu mɛi feerɛ da ƃála-sirɛ lɔ́ɔlu mɛi feerɛ.”

² Bâla è gɛ̀ yɛ̂ɛ berei Bâlaŋ è mò la mai. Bâla da Bâlaŋ dí sâla kùla ŋ̀âla-teƃele-ŋai dîa tɛi-tɛi a niŋa-sirɛ tɔnɔ tɔ́nɔ da ƃála-sirɛ tɔnɔ tɔ́nɔ.

³ Bâlaŋ è mò Bâla mà ǹyɛɛi, “Tɔɔ íkereŋ-salai kɔlɛ. Ŋa pâi liî ŋá gáa a kɛ̀ Yâwɛɛ a ŋ̀wɛ̂lii é lóno ḿbɔ. Mɛnii kélee a pâi nɛ̂i mâi, ŋa pâi môi yâ.” Nya ƃe è lì é tɛ́ yée tɔnɔ tôŋ su.

⁴ Nàa ƃé Ɣâla è gbîŋ lɛ̀ naa Bâlaŋ mà. Bâlaŋ è mò mà ǹyɛɛi, “Ŋá Ɣâla-teƃele lɔ́ɔlu mɛi feerɛ tɔ̀ɔ. Ŋá sâla kùla dîa tɛi-tɛi a niŋa-sirɛ tɔnɔ tɔ́nɔ da ƃála-sirɛ tɔnɔ tɔ́nɔ.”

⁵ Nya ƃe Yâwɛɛ è ŋ̀óo tɛ̀ɛ a Bâlaŋ ǹyɛɛ mai, “Lí pôlu í ŋ̀óo-ŋai ŋí ƃó Bâla ma.”

⁶ Nya ƃe è lì pôlu é Bâla da ŋɔnúu túɛ-ƃelai kélee káa tɔɔ ni ŋɔkéreŋ-salai kɔlɛ.

⁷ Nya ƃe Bâlaŋ è ŋ̀óo-ŋai ŋí ƃò ǹyɛɛi, “Môa kaloŋ Bâla è ŋ́gula, Siria vóloi-kulai pere yee-ŋai ma. Ǹyɛɛ mâ, ‘Pa í Zeeka fóo ḿî. Pá í kpalo ƃéla Eezuɛ-ŋai dîa.’

⁸ Ŋa pɔ̂ri dífôoi léŋ ǹyaŋ Ɣâla fé dífoo ni? Ŋa kpalo ƃéla dîa léŋ ǹyaŋ Yâwɛɛ fé kpalo ƃéla ní dîa?

⁹ Ŋ́gaa tɔɔ ni kɔni-yeei tôŋ su ŋ́gɛ díkaa. Ŋ́gaa ǹyéei ma ŋ́gɛ dímaa kpɛɛ. Dí káa nɔ́ a lɔii-ŋuŋ nyii gáa seêi nɔ́ ǹya tee-tee. Dífa díkpîŋ sìɣe yɛ̂ɛ lɔii da kpɛ́ni su-ƃela.

¹⁰ Zeeka ŋɔsuui-su ƃelai tâmaai yɛ̂ɛ ŋɛya. Núu fa pɔ̂ri dí lônoi. Tɔɔ ŋá sáa yɛ̂ɛ Ɣâla ŋɔnûai. Tɔɔ ŋá sáa yɛ̂ɛ deniŋ ƃô ƃelai.”

¹¹ Nya ƃe Bâla è mò Bâlaŋ mà ǹyɛɛi, “Lé ƃé ŋí ƃa gɛ́ a ńyãai? Ŋá ítòli ƃɛ́ a gɛɛ é ŋákpɔara-ƃelai fóo, kɛ́lɛ íkaa nɔ́ lûwa tôoi dîa.”

¹² Bâlaŋ è ŋ̀óo su tòo ǹyɛɛi, “Mɛnii nɔ́ ŋa pɔ̂ri môi ǹya ƃa nyii Ɣâla a bù ńaai.”

Bâlaŋ ŋɔɣala-woo-ƃoɔɔi veerɛi

¹³ Nya ƃe Bâla è mò Bâlaŋ mà ǹyɛɛi, “Kú lí kwaa ta kpɛ́ni ma ƃɛ́i ƃa pɔ̂ri Eezuɛ-ŋai da-ni kâai naai. Nàa ƃé í dífoo naa ḿî.”

¹⁴ È lì la Zofiŋ ǹɔɔi su Piga yeei tôŋ su. È Ɣâla-teƃele lɔ́ɔlu mɛi feerɛ tɔ̀ɔ naa é niŋa-sirɛ tɔnɔ da ƃála-sirɛ tɔnɔ kula dîa tɛi-tɛi a sâla.

¹⁵ Bâlaŋ è mò Bâla mà ǹyɛɛi, “Tɔɔ ƃɛ́ íkereŋ-salai kɔlɛ, ŋá lí ŋá gáa a kɛ̀ Yâwɛɛ a ŋ̀wɛ̂lii é lóno ḿbɔ.”

¹⁶ Nya ƃe Yâwɛɛ è ŋ̀óo tɛ́ɛ a Bâlaŋ ǹyɛɛ mai, “Lí pôlu í ŋ̀óo-ŋai ŋí ƃó Bâla ma.”

¹⁷ Nya ƃe è lì pôlu é Bâla da Môa-nuu túɛ-ƃelai káa tɔɔ ni ŋɔkéreŋ-salai kɔlɛ. Bâla è marê kɛ̀ ǹyɛɛ mai, “Yâwɛɛ ǹyɛɛ lé?”

¹⁸ Nya ƃe Bâlaŋ è ŋ̀óo-ŋai ŋí ƃò ǹyɛɛi, “Zîpo ǹóŋ Bâla pá, Íwoli tɔ́ɔ ŋ́oo mà.

¹⁹ Ɣâla fa lɛ́ɛ kɛ̀ yɛ̂ɛ berei núu kpune a gɛ̀ lai. Va ǹíi maa fâleŋ yɛ̂ɛ berei núu-kpune a gɛ̀ lai. A ŋɔkono-tee-wooi ŋ̀á-see kɛ̀. Mɛnii a mòi, a ŋ̀á-see kɛ̀.

²⁰ Ɣâla a ŋ́gɛ a gɛɛ ŋa ŋɔlûwai tóo, Mɛni mà fa pɔ̂ri ŋɔlûwa-wooi maa falenîi.

²¹ Ŋa gáa a gɛɛ Eezuɛ ŋɔtínaa tuɛ-pere, Mɛni kpɔ̂lu fé pâi kulâi mà, kpaa máŋ mɛni-sôli. Yâwɛɛ, Díɣâlai káa díkɔlɛ. Da mò dîɛ ǹyaa ƃa Díkâloŋ ma.

²² Ɣâla a díkùla Ize lɔii su, A kɔ̀ dímaa mɛ̂ni mà yɛ̂ɛ tou-sirɛ.

²³ Núu ŋɔsále nyɔ́mɔɔ kpaa máŋ wulu-nuu Fa sɛŋ tá kɛ̀ a Eezuɛ ŋɔnûai. Dímaa tɛli kpɛ́ɛ káa nɔ́ kpɛ́ni-kpɛni. Nûa da pâi môi dîyɛɛi, ‘Ka mɛnii káa Ɣâla a gɛ́ dîɛi.’

²⁴ Eezuɛ káa yɛ̂ɛ yala-sulu wála-walaa. Víi fa kpɛ̀ɛ é lɛ́ɛ la zu é ǹáa-mii suai, É lɛ́ɛ la zu é diai è dí pâai ŋãa kpéle.”

²⁵ Nya ƃe Bâla è mò Bâlaŋ mà ǹyɛɛi, “À kɛ̀ ƃà wàla kɛ́ ŋ̀wɛ̂lii í Eezuɛ-ŋai fóo, ífe lûwa làa dîa.”

²⁶ Bâlaŋ è ŋ̀óo su tòo ǹyɛɛi, “Fé m̀ó ní yâ a gɛɛ mɛnii nɔ́ ŋa pɔ̂ri môi ǹya ƃa nyii Ɣâla a bù ńai?”

Bâlaŋ ŋɔɣâla-woo Ƃóɔɔ zaaƃai

²⁷ Bâla è mò ǹyɛɛi, “Pá kú lí kwaa da kpɛ́ni ma. Tãi da Ɣâla a pâi fâai ma a gɛɛ í Eezuɛ-ŋai fóo naa mî.”

²⁸ Nya ƃe dí tɛ̀ Pio yeei tôŋ su nyii dɔɔ̂i vɛ̃ɛ-kpâlaŋ mɛi.

²⁹ Bâlaŋ è mò mà ǹyɛɛi, “Ɣâla-teƃele lɔ́ɔlu mɛi feerɛ tɔ́ɔ mî ƃɛ́ í pá a niŋa-sirɛ lɔ́ɔlu mɛi feerɛ da ƃála sirɛ lɔ́ɔlu mɛi feerɛ.”

³⁰ Bâla è gɛ̀ yɛ̂ɛ berei Bâlaŋ è mò la mai, é sâla kula ŋ̀âla-teƃele-ŋai dîa tɛi-tɛi a niŋa-sirɛ tɔnɔ tɔ́nɔ da ƃála-sirɛ tɔnɔ tɔ́nɔ.