Lonon mo 18 - Bible

Zâla láa-soŋ-ƃelai da Livai-ŋai dítii

¹ Yâwɛɛ è mò Eelɔŋ mà ǹyɛɛi, “Ka ílônii é pɛ́lɛ Livai-ŋai dísuui ma ka pâi tɔ̂ŋ-kpɛ-maa sɔlɔ ƃôi à kɛ̀ ka pɔara-maa kɛ̀ zua kɔlɔ seɣe pɛrɛ maa waai maa-tii kɛ́ɛ su. Ka ílônii nɔ́ ƃé pâi tɔŋ-kpɛ-maa sɔlɔ ƃôi à kɛ̀ kà pɔara-maa kɛ̀ kásâla-laa soŋ-tii kɛ́ɛi su.

² Ka Livai-ŋai ka pá máŋ nyii-ŋai dí káa a ínâŋ ŋɔsuui su-ƃelai, a gɛɛ dí kpɔ́ŋ yâ díi kɛ́-mɛni ma, tãi ka ílônii kákaa tíi kɛ̂i la zua kɔlɔ seɣe pɛrɛ maa waai mui.

³ Da pɔ̂ri tíi kɛ́i yɛ̂ da zua kɔlɔ seɣe pɛrɛ maa waai mu-tii kélee. Kɛ́lɛ dífe lɛ̀ɣɛ zua kɔlɔ seɣe pɛrɛ maa waai mu-sɛŋ-folo-ŋai kɔlɛ da ŋ̀âla-teƃelei. Dà lɛ̀ɣɛ díkɔlɛ, ka dîa-ni ka pâi saâi.

⁴ Ka dîa-ni ka pɔ̂ri zua kɔlɔ seɣe pɛrɛ maa waai mu-tii-ŋai da kélee kɛ̂i gîe ma. Kɛ́lɛ ǹúui vé a Livai-ŋai dísuui dai, vé lɛ̀ɣɛ kâa.

⁵ Ílônii nɔ́ ƃé ka dîa-ni ká zua kɔlɔ seɣe pɛrɛ maa waai mu-tii-ŋai kɛ́ é pɛ́lɛ ŋ̀âla-teƃelei maa-tii-ŋai dîa a gɛɛ ńii fé ŋɔ́nɔ ŋwàna Eezuɛ-ŋai dîa.

⁶ Ka gáa, Livai-ŋai nyii-ŋai díkaa a kákayɔɔ-ŋai, ńyãa ƃé díkùla Eezuɛ-ŋai sáma. Díkaa a sama-sɛŋ kámɛni ma. Ŋa dílɛ a gɛɛ dí tíi kɛ́ ḿɛni ma zua kɔlɔ seɣe pɛrɛ maa waai mu.

⁷ Kɛ́lɛ ka ílônii nɔ́ ƃé ká zâla-laa-soŋ tii-ŋai kélee kɛ́ nyii-ŋai díkaa ŋ̀âla-teƃelei mɛni ma da gwaa maa waai ŋɔkwaa maa waai mai. Ŋa kásâla laa soŋ-tii tɛ́ɛ kápɔ a sama-sɛŋ. Ǹyaŋ núu da kpɛ́ni à lɛ̀ɣɛ naa, a pâi saâi.”

Zâla láa-soŋ-ƃelai dísama-sãai

⁸ Yâwɛɛ è mò Eelɔŋ ma ǹyɛɛi, “Zama-sãai Eezuɛ-ŋai dí dɛ̀ɛ ḿbɔi, nyii-ŋai kélee dífe kɛ́ ní a kéreŋ-salai, ŋa dítɛɛ kápɔ a káwɔ̂i ka ílônii wɔlɔ-wɔlɔ da wɔlɔ-wɔlɔ.

⁹ Zama-sãa maa waai nyii-ŋai dífe a kéreŋ-salai, nyii-ŋai díkaa a kápɔɔ ka ílônii, dia ká ŋí. Mii-sɛŋ sâla, sɔnyɔ̂ŋ su-mɛni lɛɛ sâla da mɛni lɛɛ-maa sala. Sama-sɛŋ maa-waa nyii kélee da dɛ̀ɛ ḿbɔi, díkaa a kápɔɔ ka ílônii.

¹⁰ Ka dímii gwaa maa waai ma. Sinâa nɔ́ ƃa pɔ̂ri dímîi. Zãai ŋí maa waâi.

¹¹ “Ǹíi-see sala-sãai Eezuɛ-ŋai da dítɛ̀ɛ ḿbɔi, díkaa máŋ a kápɔɔ ka ílônii-sinaai da ílônii-nɛyãai wɔlɔ-wɔlɔ da wɔlɔ-wɔlɔ. Ísuui su-ƃelai nyii-ŋai kélee dímaa waâi, da pɔ̂ri da miî.

¹² “Eezuɛ-ŋai dísi-ŋai m̀á maa-ŋuŋ-ŋai da dɛ̀ɛ ḿbɔ a kóraŋ kélee, ŋa dítɛɛ kápɔi dia ka ŋí. Wúlɔ, ŋwãai da ísi-sãai ǹɛ̂lɛɛ-ŋai.

¹³ Ŋuru-ƃa kpɔlui maa-ŋuŋ kélee dílɔii ma nyii-ŋai da dɛ̀ɛ ḿbɔi, díkaa a kápɔɔ. Diai kélee dímaa waâi ípɛrɛi mui da pɔ̂ri da miî.

¹⁴ “Sɛŋ nyii kélee Eezuɛ-ŋai da dɛ̀ɛ ḿbɔ nyii dífa ŋɔ́nɔ pɔ̂ri ziɣêi pôlui, gáa a kápɔɔ.

¹⁵ “Núu-kpune da taa-tulɛ dílônii maa-ŋuŋ-ŋai kélee nyii-ŋai da dítɛ̀ɛ ḿbɔi, díkaa a ípɔɔ. Kɛ́lɛ fɛ̂ɛ í íyee sée núu-kpune ǹônii maa-ŋuŋ-ŋai díŋuŋ-ma-ƃo fela-fei mu. Íyee sée daa-tulɛ lônii maa-ŋuŋ-ŋai díŋuŋ-ma ƃó fela-fei mu nyii-ŋai dímaa fé waa nii.

¹⁶ Núu-kpune ǹônii sinaai maa-ŋuŋ-ŋai nyii-ŋai dípɔlɔ-pɔlɔ-laa káa a ɣáloŋ tɔnɔi, díŋuŋ-ma-ƃo fela-fei é kɛ́ a káne kpua lɔ́ɔlu nyii ŋɔwiɛ káa yɛ̂ɛ berei ŋ̀âla-pɛrɛ kɛ́tɛi è nɛ̀ lai.

¹⁷ Kɛ́lɛ vé a sɛŋ a gɛɛ ǹûai dí moli-ŋai, niŋa-ŋai é pɛ́lɛ mala-ŋai dîa dílônii sinaai maa-ŋuŋ-ŋai ŋuŋ-ma-ƃo fela fe kɛ́. Kpɛni fêi, dímaa waâi. Díŋãa pú ŋ̀âla-teƃelei ma í díwulɔ kúla a kéreŋ-sala. Zâla ŋí lɛ̂lɛi a ńîa.

¹⁸ Díluu káa a ípɔɔ yɛ̂ɛ berei nii-see-salai maa suai geŋe-la káa la a ípɔɔ da ǹáa mii-yee mɛi wɛrɛi.

¹⁹ “Zama-sãa maa waai-ŋai kélee Eezuɛ-ŋai da dítɛ̀ɛ ḿbɔi, ŋa dítɛɛ ípɔ ka ílônii-sinaai da ílônii-nɛyãai wɔlɔ-wɔlɔ da wɔlɔ-wɔlɔ. Ŋakono-tee-wooi ŋí kpanaɔɔi nyii ŋa gɛ̀ kayêei ka ísuui su-ƃelai kéleei.”

²⁰ Yâwɛɛ è mò Eelɔŋ mà ǹyɛɛi, “Ífe pâi Eezuɛ-ŋai díkɔ̃liŋ da kélee sɔlɔ ƃôi a ípɔɔ kpaa máŋ dílɔii gbua da. Ńyãai Yâwɛɛ, ńyãa ƃa íkɔ̃liŋ da ílɔii Eezuɛ-ŋai sáma.

Livai-ŋai dísama-sãai

²¹ “Zama-sãai kélee Eezuɛ-ŋai dí dɛ̀ɛ ḿbɔi, ŋa buu-ɣelei tɛ̀ɛ Livai-ŋai pɔ́ a díkɔ̃liŋ dii-ŋai mɛni ma da gɛ̀ mî zua kɔlɔ seɣe pɛrɛ maa waai mui.

²² É síɣe sâa ma Eezuɛ-ŋai dífe lɛ̀ɣɛ a zua kɔlɔ seɣe pɛrɛ maa waai ma dífa la sɔnyɔ̂ŋ kɛ́ la dí sáa.

²³ Livai-ŋai nɔ́ ƃe pâi tíi kɛ̂i zua kɔlɔ seɣe pɛrɛ maa waai mu. Maa mɛni kélee káa a díŋûa-kpiri. Dɔ̂ŋ ŋí káa ísuui su-ƃelai kélee mɛni ma wɔlɔ-wɔlɔ da wɔlɔ-wɔlɔ. Livai-ŋai díkɔ̃liŋ da kélee fé pâi kɛ̂i ma Eezuɛ.

²⁴ Kpɛni fêi, zama-sãai buu-ɣelei Eezuɛi-ŋai dí dɛ̀ɛ ḿbɔi, ŋa dítɛ̀ɛ Livai-ŋai pɔ́ a díkɔ̃liŋ. Mɛni ƃé ŋá mò la dîa a gɛɛ díkɔ̃liŋ da kélee fé pâi kɛ̂i ma Eezuɛ-lɔii su.”

Livai-ŋai dísama-sãai buu-ɣelei

²⁵ Yâwɛɛ è mò Mose mà ǹyɛɛi,

²⁶ “M̀ó Livai-ŋai dîa yɛ̂ɛi, ‘Tãi ka Eezuɛ-ŋai dísama-sãai buu-ɣelei síɣe la nyii-ŋai Yâwɛɛ è dɛ̀ɛ kápɔ a kákɔ̃liŋ, fɛ̂ɛ ká buu-ɣelei tɛ́ɛ ḿbɔ a sama-sɛŋ.

²⁷ Zama-sɛŋ ŋí a pâi kɛ̂i nɔ́ yɛ̂ɛ mii-sɛŋ ninai da ŋwãai ninai gbâlaŋ ŋá-tii kɛ́-nuui a dɛ̀ɛ ḿbɔ a sama-sɛŋ.

²⁸ Berei ŋí ƃé ka pâi máŋ kásama-sãai tɛɛ̂i la ḿbɔ. Ǹyaŋ zama-sãai ŋí a pâi kɛ̂i kulâi kásama-sãai buu-ɣelei su nyii-ŋai Eezuɛ-ŋai da dɛ̀ɛ kápɔi. Fɛ̂ɛ ká kásama-sɛŋ ŋí tɛ́ɛ zâla láa-soŋ-nuui Eelɔŋ pɔ́.

²⁹ Zama-sãai nyii kélee ka zɔlɔ ƃôi, ka ǹɛ́lɛɛi kúla zu ka dɛ́ɛ ḿbɔ.

³⁰ Tãi ka zama-sɛŋ ǹɛ́lɛɛi kùla la zu ká dɛ́ɛ ḿbɔi ka pɔ̂ri gbɛ́li seêi kɛ̂i kámɛni ma yɛ̂ɛ berei gbâlaŋ ŋá-tii kɛ́-nuui a ŋɔsama-sãai kpéli seêi kɛ̀ la gbîŋ mɛni mai.

^31-32 Kà zama-sãai ǹɛ́lɛɛi kùla zu kà dɛ̀ɛ ḿbɔ ká gbéli mìi, káfe sɔnyɔ̂ŋ kɛ́ ní. Kɛ́lɛ káfe Eezuɛ-ŋai dísama-sãai da mìi nyii káfe niî buu-ɣelei kula ní zu. Kà gɛ̀ tí gɛ̀ ní ka pâi saâi.’ ”