Lonon mo 12 - Bible

Ɣâla è tɔ̂ŋ pù Miriaŋ ma

¹ Miriaŋ da Eelɔŋ dí lòno a nyɔmɔɔ é pîlaŋ Mose mà. Kpɛ́ni fêi, è Kusai-nɛni kùla a nɛnî.

² Dí mò dîyɛɛi, “Mose tɔnɔ nɔ́ ƃé Yâwɛɛ a lóno zârai? Vé niî lóno ní máŋ kúsârai?” Yâwɛɛ è díwoo mɛ̀ni.

³ Mose è kɛ̀ a ǹíi maa yeŋɔɔ kpɔ́ é tɛ́ɛ núu kélee ma ŋ̀éniɛi su.

⁴ Yâwɛɛ è mò Mose ma da Eelɔŋ é pɛ́lɛ Miriaŋ ma ǹyɛɛ diai, “Ká saaƃaŋɔɔ ka kula m̀ûui su ká pá Zua kɔlɔ seɣe pɛrɛ maa waai lá.” Nya ƃe dísaaƃaŋɔɔ dí kùla dí lí.

⁵ Yâwɛɛ è yèŋ ɣele-kɔlɔ kolei su é tɔ́ɔ Zua kɔlɔ seɣe pɛrɛ maa waai láƃelei é Eelɔŋ da Miriaŋ dítòli. Dífeerɛŋɔɔ dí kùla dí tɔ́ɔ tuɛ-pere.

⁶ Yâwɛɛ è mò dîa ǹyɛɛ, “Ka ŋ́oo mɛ́ni. À kɛ̀ Ɣâla ŋɔlóno kɛ́-nuu káa kásama, ńyãai a Yâwɛɛ ŋá ŋ́gbîŋ lɛ̀ mà zĩa su, ŋá lóno bɔ́ seêi-pere.

⁷ Kɛ́lɛ ńono-pere káa a dee ńyee mu-nuui Mose pɔ́. Ŋá dɔ̀ɔ ŋánûai nyii-ŋai díkaa a Eezuɛ-ŋai díkelee dílaa túɛi.

⁸ Ŋa lôno bɔ́ a zu ponoɔ yɛ̂ɛ núu à kɛ̀ lônoi marâŋ nuu pɔ́. Fa lóno bɔ́ sáŋ su. A ńinîŋ kàa máŋ. Gɛ̀ ní lé mɛni ƃé káfe yao ní la ńyee mu-nuui Mose ma kákɛ lòno a nyɔmɔɔ é pîlaŋ mai?”

⁹ Nya ƃe Yâwɛɛ è ǹíi ŋwàna dîa é lí.

¹⁰ Ŋele-kɔlɔŋ kolei kuláa Zua kɔlɔ seɣe pɛrɛ maa waai mɛi, gbôto è kùla Miriaŋ ma, gbono gwaa kélee é kole yɛ̂ɛ yee-fũa. Eelɔŋ è tìnaŋ é gáa gbono gwaa kélee mɛi pɛlɛɛ a gbôto.

¹¹ Nya ƃe Eelɔŋ è mò Mose mà ǹyɛɛi, “Óo Ŋánuu-namui, ífe tɔ̂ŋ kpɛ̀ kûa a gɛɛ kwa sɔnyɔ̂ŋ kɛ́.

¹² Ífe Miriaŋ lɛ̀ɛ naa vé kɛ̀ yɛ̂ɛ da núu maa sɔlɔ ƃò a boma nyii gbono lûlaai mai.”

¹³ Nya ƃe Mose è wɔ̀lɔ Yâwɛɛ mà ǹyɛɛi, “Óo Ɣâla kpera yɛ̂, Miriaŋ ƃálo.”

¹⁴ Kɛ́lɛ Yâwɛɛ è mò Mose mà ǹyɛɛi, “Eî kɛ̀ Miriaŋ ǹâŋ é ǹá-ya pù ǹyaa Miriaŋ m̀a, vêi ŋumɛ a fólo lɔ́ɔlu mɛi feerɛ? Ka gula m̀ûui su a fólo lɔ́ɔlu mɛi feerɛi ká lɛ́ɛ pâi la pôlu naa.”

¹⁵ Nya ƃe dí Miriaŋ kùla m̀ûui su a fólo lɔ́ɔlu mɛi feerɛ. Ǹûai dífe kolôŋ ni m̀ûui su é lɛ́ɛ la zu Miriaŋ é pá pôlu.

¹⁶ Nàa pôlu ma ǹûai dí kòloŋ Azelo dí lí Paraŋ fɛ̃ɛ-kpalaŋ su dí díƃûui pú naa.