Lonon mo 10 - Bible

Gáne turu-ŋai

¹ Nya ƃe Yâwɛɛ è mò Mose mà ǹyɛɛi,

² “Káne-turu feerɛ ɣále a kpɔ́kpɔ Eezuɛ-ŋai tóli-mɛni ma díkîe ma da díƃûu-ŋai kolôŋ-mɛni.

³ Tãi Eezuɛ-ŋai da dúru feerɛi ŋí veerɛ wóo mɛ̀ni lai, fɛ̂ɛ díkelee dí díŋa tɛ́ díkîe ma íŋɛi-tuɛ Zua kɔlɔ seɣe pɛrɛ maa waai lá.

⁴ Kɛ́lɛ da dɔnɔ wóo mɛni nɔ́ gɛ̀ ní Eezuɛ-ŋai dísuu-ŋai túɛ-ƃelai nɔ́ ƃa pɔ̂ri díŋa tɛ̂i díkîe ma íŋɛi-tuɛ.

⁵ Tãi da dúrii dɔnɔ wóo mɛ̀ni la a zu kpuaai, gɛ̀ ní fɛ̂ɛ dí m̀ûu-ŋai kolôŋ nyii-ŋai díkaa Zua kɔlɔ seɣe pɛrɛ maa waai ŋɔfólo ƃelai-perei.

⁶ Da dúru-woo su-kpuaai ŋí mɛ̀ni a veerɛ ɣelei, fɛ̂ɛ dí m̀ûu-ŋai kolôŋ nyii-ŋai díkaa nàa kwára-perei. Bere ƃé fɛ̂ɛ m̀ûu-ŋai kolôŋ turu-wooi é kɛ́ la a gbua-kpuaa.

⁷ Kɛ́lɛ à kɛ̀ a ǹûai kélee tóli-mɛni díkîe ma, fɛ̂ɛ ká dúru-ŋai ŋí veerɛ fɛ́ɛ a zu kôya.

⁸ Eelɔŋ nyii gáa a zâla láa-soŋ-nuu kɛ́tɛi ǹônii sinaai nɔ́ ƃa dúru-ŋai ŋí fɛ́ɛ-ƃela. Ka dɔ̂ŋ-ŋai ŋí mɛi káa wɔlɔ-wɔlɔ da wɔlɔ-wɔlɔ.

⁹ Kɛ́lɛ kà kákpɔara-ƃela kà kɛ̀ kɔ́ kɔ̂i kákpɔɔi lɔii su, gɛ̀ ní ka dúru-ŋai ŋí fɛ́ɛ yɛ̂ɛ kɔ́-turu. Gɛ̀ ní ńyãai Yâwɛɛ, Káɣâlai, kámaa-mɛni a pâi toôi ŋ́gili-ŋá ŋá kákula kákpɔara-ƃelai yêei.

¹⁰ À kɛ̀ máŋ a kálii-nɛɛ-tãi yɛ̂ɛ kákuu-ŋai kɛ́-tãi da ŋ̀áloŋ-ŋai kɔ́ɔ-pilaŋ kuu-ŋai, fɛ̂ɛ ká dúru-ŋai ŋí fɛ́ɛ géreŋ-sala-ŋai da nii-see-sala-ŋai mɛi. Gɛ̀ ní ńyãai a Káɣâlai kámaa-mɛni a pâi toôi ŋ́gili-ŋa ŋá kpɔ́ŋ kâa. Ńyãa ƃa Yâwɛɛ, Káɣâlai.”

Eezuɛ-ŋai dí kùla Sana Yeei ma

¹¹ Ŋ̀ele-kɔlɔŋ kolei è kùla Zua kɔlɔ seɣe pɛrɛ maa waai mɛi a góraŋ veerɛi ɣaloŋ veerɛi ŋɔɣele-kuui buu feerɛi díkulaa Ize pôlu mai.

¹² Nya ƃe Eezuɛ-ŋai dí kùla Sana Fɛ̃ɛ-kpalaŋ su díkɛ pà a ƃûu pú perêi. Ŋ̀ele-kɔlɔŋ kolei è kpèra Paraŋ Fɛ̃ɛ-kpalaŋ su.

¹³ Dí dísiai maa-ŋuŋ kùla yɛ̂ɛ berei Yâwɛɛ è mò la Mose mai.

¹⁴ Zuda ŋɔƃûui su-ƃelai ƃé tɔ̀ɔ tuɛ da díƃenâi mu-ƃelai, nyii-ŋai dítuɛ-nuui è kɛ̀ a Aminada ǹóŋ Nasuŋ.

¹⁵ Isaka ŋɔƃûui su-ƃelai túɛ-nuui ƃé kɛ̀ a Zua ǹóŋ Nataniɛ.

¹⁶ Zɛbulɔŋ ŋɔnuu-suui su-ƃelai túɛ-nuui ƃé kɛ̀ a Ɛlɔŋ ǹóŋ Ilia.

¹⁷ Tãi dí Zua kɔlɔ seɣe pɛrɛ maa waai kùla lai, Gɛsɔŋ ŋɔsuui da Melali ŋɔsuui ƃé lì la.

¹⁸ Lubiŋ ŋɔƃûui su-ƃelai da dí-ƃenâi mu-ƃelai ƃé lɛ̀ɛ naa pôlu díkpulu ma, nyii-ŋai dítuɛ-nuui è kɛ̀ a Sidu ǹóŋ Ilizɔ.

¹⁹ Simiɔŋ ŋɔnuu-suui su-ƃelai túɛ-nuui ƃé kɛ̀ a Zurisadai ǹóŋ Sɛlumiɛ.

²⁰ Gâa ŋɔnuu-suui su-ƃelai dítuɛ-nuu ƃé kɛ̀ a Deuɛ ǹóŋ Iliasa.

²¹ Nàa pôlu ma Koa ŋɔsuui su-ƃelai dí lì a Zua kɔlɔ seɣe pɛrɛ maa waai maa-sãa maa waai. Tãi dí seri la ƃɛ́i dí m̀ûu ninai pù naai, Zua-kɔlɔ pɛrɛ maa waai è kɛ̀ a dɔɔ.

²² Ifiraŋ ŋɔƃûui-su-ƃelai ƃé lɛ̀ɛ nàa pôlu díkpulu ma, nyii-ŋai dítuɛ-nuui è kɛ̀ a Amiyu ǹóŋ Ilisama.

²³ Manasɛ ŋɔsuui su-ƃelai dítuɛ-nuui ƃé kɛ̀ a Pedazɔ ǹóŋ Gamaliɛ.

²⁴ Bɛŋsima ǹyaŋ ŋɔsuu-suui su-ƃelai túɛ-nuui ƃé kɛ̀ a Gidioni ǹóŋ Abidaŋ.

²⁵ Daŋ ŋɔƃûui nyii lɛ̀ɛ m̀ûu-ŋai kélee pôlui, zu-ƃelai da díƃenâi mu-ƃelai dí lì díkpulu ma, nyii-ŋai dítuɛ-nuui è kɛ̀ a Amisadai ǹóŋ Aizɛ.

²⁶ Asɛ ŋɔsuui su-ƃelai túɛ-nuui ƃɛ́ kɛ̀ a Okaŋ ǹóŋ Pagiɛ.

²⁷ Nɛfɛtɛli ŋsuu su-ƃelai túɛ-nuui láa ƃé kɛ̀ a Inaŋ ǹóŋ Aila.

²⁸ Bere sii ŋí ƃé Eezuɛ-ŋai dí sìa la díkpulu ma.

²⁹ Mose è mò m̀ɔ̂lɔ Zɛturo nyii kɛ̀ a Midiaŋ-nuui ǹóŋ Oba mà ǹyɛɛi, “Kwa kɛ́ nâa liî ƃɛ́i ma Yâwɛɛ è mò a gɛɛ a pâi nàa tɛɛ̂i kúpɔi. Pá kwaa lí. Kwa pâi mɛni lɛ́lɛɛ kɛ̂i yɛ̂. Kpɛni fêi, Yâwɛɛ a kono-tee lɛ́lɛɛ kɛ́ Eezuɛ-ŋai yêei.”

³⁰ Kɛ́lɛ è mò ma ǹyɛɛi, “Fé liî. Ŋa pâi liî pôlu ŋ́gbîŋ lɔii su ŋánûai pɔ́.”

³¹ Mose ǹyɛɛ mai, “Kpera yɛ̂, ífe sìɣe kúpôlu. Kpɛni fêi, ƃa gâai berei fɛ̂ɛ kú ƃûu tɔɔ la vɛ̃ɛ-kpâlaŋ sui, ƃa pɔ̂ri kɛ̂i a kúteniŋ tɔɔ-nuu.

³² Kwa kaa-ni kwà lì, m̀ɛlɛ-seei kélee kwa pâi zɔlɔ ƃôi Yâwɛɛ yêei, ƃa pâi da sɔlɔ ƃôi”

Ǹûai dí ŋɔ́nɔ dí siai kɔ́ɔ pìlaŋ

³³ Nya ƃe dí kùla Yâwɛɛ ŋɔyéei mâ, dí sía a fólo saaƃa. Yâwɛɛ ŋɔkpanaŋ-woo-kɛɛi maa gãlai è kɛ̀ dítuɛ gɛ́ díƃûui pûi kɔ̀ri.

³⁴ Yâwɛɛ ŋɔɣele-kɔlɔŋ kolei è kɛ̀ dímɛi a ɣele-ƃɔɔ tãi da kâa kùla la díƃûui sui.

³⁵ Tãi kélee Yâwɛɛ ŋɔkpanaŋ-woo-kɛɛi maa gãlai a kâa kɛ̀ liî la dítuɛi, Mose a kâa mò ǹyɛɛ, “Óo Yâwɛɛ ímu síɣe í íkpɔara-ƃelai kpɛ́ kúperei, diai da íkpɔarai dí pú dí kúla íŋɛi-tuɛ.”

³⁶ Tãi kélee gãlai a kâa kpere lai, Mose a kâa mò ǹyɛɛi, “Pá pôlu, Óo Yâwɛɛ, í kɛ́ Eezuɛ-ŋai dínuu-su wála kpɔŋ ŋí sáma.”