Lomaŋ 7 - Bible

Dɔ̂ŋ kɛ́-pere káa yɛ̂ɛ tûa-laa

¹ Ŋánûa, ŋa lônoi kápɔ, káai dɔ̂ŋ kɔ́lɔŋ káfe gɔ́lɔŋ a gɛ́ɛ dɔ̂ŋ ŋɔwála-walai káa núu mɛi a tãi nɔ́ gáa la ɣele mai?

² Mɛni ma ǹɛnii nyíi a surɔ̂ŋ kulai, dɔ̂ŋ ŋɔwála-walai káa mɛi ŋɔsurɔ̂ŋ mɛni ma tãi nɔ́ ŋɔsurɔ̂ŋ káa la ɣele mai; kɛ́lɛ, à kɛ̀ ŋɔsurɔ̂ŋ à sàa, gɛ̀ ní dɔ̂ŋ ŋɔwála-walai fe ŋɔ́nɔ mɛi ŋɔsurɔ̂ŋ mɛni ma.

³ Yɛ̂ɛ berei gáa lai, à kɛ̀ à tòo surɔ̂ŋ da kpɛni yêei, tãi ŋɔsurɔ̂ŋ káa niî la ɣele mai, da pâi dólîi a wulu-wulu kɛ-nɛni. Kɛ́lɛ, à kɛ̀ ŋɔsurɔ̂ŋ à sàa, dɔ̂ŋ ŋɔwála-walai fe ŋɔnɔ m̀ɛi. Ǹyaŋ à surɔ̂ŋ da kpɛni kùla dífa dòli a wulu-wulu kɛ-nɛni.

⁴ Ŋánûa, ka kpera káɣeniɛi kɛ́ɛ ma dɔ̂ŋ mɛni ma a berei tɔnɔi ti Kôrai kponoi sârai, a gɛ́ɛ ká kɛ́ a núu da kpɛni pɔ́ɔ, nyíi Ɣâla e mu siɣe saa yêei, a gɛ́ɛ ku ƃá Ɣâla mɛni ma.

⁵ Tãi ku kɛ̀ niî la kúkpîŋ tua-perei pôlui, dɔ̂ŋ e kúsɔnyɔ̂ŋ wɛli-lii-ŋai mu siɣe, nyíi-ŋai dí tíi kɛ̀ kúkponôi a gɛ́ɛ ku ƃa saa mɛni mai.

⁶ Kɛ́lɛ, kúŋuŋ ma ƃóɔi nâa dɔ̂ŋ yêei. Kúloai téɛɛ̂i nâa kwa sɛŋ nyíi a kúkɛ̀ ku kɛ́ a luɛ-ŋai. Mɛni ma kúkaa a luɛ-ŋa bere ninai su, nya ƃa M̀ɔlêŋ ŋɔperei. Kúfe a luɛ-ŋa bere pɔlɔi su, nya ƃa kúfe a luɛ-ŋa dɔ̂ŋ yée mu nyíi bɔ̃yɛɛ̂i.

Sɔnyɔ̂ŋ káa kúkponôi

⁷ Kwa pâi ŋaŋ kɛ̂i le? A gɛɛ dɔ̂ŋ káa a sɔnyɔ̂ŋ? Ve ti a dɔnɔ kpîŋ! É máŋ kɛ́ ti tɔ̂ŋ eêi wàla kɛ́ ɣele ma, fei sɔnyɔ̂ŋ kɔ̀lɔŋ. Fei sɛŋ maa-lii-teɛɛ kɔlɔŋ, eêi kɛ̀ dɔ̂ŋ eêi wàla m̀o, ǹyɛɛ, “Ífe sɛŋ maa-lii tèe.”

⁸ Kɛ́lɛ, dɔ̂ŋ e sɔnyɔ̂ŋ kɔ́ɔ pìlaŋ a gɛ́ɛ e tíi kɛ́ ŋ́gbonôi. E ŋ́gɛ̀ ŋá sɔnyɔ̂ŋ-sii kélee wɛ́li. Bɛ́i tɔ̂ŋ fe naai sɔnyɔ̂ŋ saâi naa.

⁹ Tãi fe kɛ́ ni la dɔ̂ŋ mui ŋa kɛ̀ ɣele ma a tãi da dɔ̂ŋ ŋɛi pôlu, kɛ́lɛ, tãi dɔ̂ŋ è pà lai, sɔnyɔ̂ŋ e ŋ̀ɛi la ƃo, nya ƃe ŋá sàa;

¹⁰ dɔ̂ŋ tɔnɔi nyíi gono tèe a gɛ́ɛ e fulu-laa tɛɛ núu-kpune pɔi, e saa tɛ̀ɛ ḿbɔ.

¹¹ Kpɛ́ni fêi, dɔ̂ŋ e sɔnyɔ̂ŋ ŋɔtíi kɔ́ɔ pîlaŋ ŋ́gbonôi. Sɔnyɔ̂ŋ è ḿbɛ̀lɛ é ḿbaa a dɔ̂ŋ.

¹² Mɛni ma dɔ̂ŋ maa waâi. Mɛnii dɔ̂ŋ a m̀ôi maa waâi, dɔ̃yâ, ǹɛ́lɛɛ.

¹³ Gɛ̀ ní ŋaŋ dɔ̂ŋ nyíi ǹɛ́lɛɛ̂i è pà ḿbɔ a saa? Ve ti a dɔnɔ kpîŋ! Sɔnyɔ̂ŋ ƃé pà ḿbɔ a saa sɛŋ lɛ́lɛɛ sârai, a gɛ́ɛ sɔnyɔ̂ŋ é lɛ́ a sɔnyɔ̂ŋ, a gɛ́ɛ dɔ̂ŋ é sɔnyɔ̂ŋ lɛ́ a sɛŋ nyíi nyɔ́mɔɔ̂i kpɔ́ a ŋánaai.

¹⁴ Ku gɔ́lɔŋ a gɛ́ɛ dɔ̂ŋ a kûla M̀ɔlêŋ yêei; kɛ́lɛ, ŋ́gaa nɔ́ a núu-kpune. Dí ŋ́gɔ̀lɛ yɛ̂ɛ luɛ a gɛ́ɛ ŋá tíi kɛ́ sɔnyɔ̂ŋ mi.

¹⁵ Mɛni-ŋai ŋa díkɛ̂i, fe gɔ́lɔŋ lé mɛni ƃe ŋa díkɛ̀ lai. Kpɛ́ni fêi, mɛni-ŋai ŋa díwɛli níi, fa díkɛ̀. Kɛ́lɛ, mɛni-ŋai ŋa díkpɔ̀arai, dia ƃe ŋa díkɛ̀.

¹⁶ Kɛ́lɛ, à kɛ̀ ŋa mɛni-ŋai kɛ̀ nyíi-ŋai fa ŋwɛ̀li ŋá gɛ́i, gɛ̀ ní ŋa fáa a gɛ́ɛ dɔ̂ŋ lɛ́lɛɛ̂i.

¹⁷ À kɛ̀ ti gɛ̀ ní ńyãa fa gɛ̀, kɛ́lɛ, zɔnyɔ̂ŋ gáa ŋ́gbonôi nya ƃa gɛ̀.

¹⁸ Kpɛ́ni fêi, ŋá gɔ́lɔŋ a gɛ́ɛ mɛni lɛ́lɛɛ kélee fe ŋ́gbonôi, nya ƃa ŋ́gbîŋ-tua-perei su. Ŋa ŋ̀wɛli ŋá mɛni-ŋai kɛ́ dílɛlɛɛ̂i, kɛ́lɛ, fa díkɛ̀.

¹⁹ Kpɛ́ni fêi, mɛni lɛ́lɛɛi ŋa ŋ̀wɛli ŋá gɛ́i, fa gɛ̀, kɛ́lɛ, ŋa mɛni nyɔ́mɔɔi kɛ̀ nyíi fa ŋ̀wɛli ŋá gɛ́i.

²⁰ À kɛ̀ ǹyaŋ ŋa mɛni-ŋai kɛ̀ nyíi-ŋai fa ŋ̀wɛli ŋá díkɛi, gɛ̀ ní ńyãa fa díkɛ̀, kɛ́lɛ, zɔnyɔ̂ŋ gáa ŋ́gbonôi nya ƃa díkɛ̀.

²¹ Mɛni ma ŋa gáa a gɛ́ɛ gáa a tɔ̂ŋ a gɛ́ɛ tãi ŋa kɛ̂ ŋ̀wɛ̂lii la ŋa mɛni lɛ́lɛɛ kɛ̂i, mɛni nyɔ́mɔɔ káa nɔ́ ŋ́gɔlɛ.

²² Kpɛ́ni fêi, ŋa Ɣâla ŋɔtɔ̂ŋ mɛi kaa a lii-nɛ̃ɛ ŋ́gbîŋ kponôi.

²³ Kɛ́lɛ, ŋa tɔ̂ŋ da kpɛni kâa ŋ́gbonôi gɛ kɔ dɔ̂ŋ pɔ nyíi gáa ŋ́gili ŋái, nyíi a ŋ́gɛ̀ a luɛ a gɛ́ɛ ŋá kɛ́ sɔnyɔ̂ŋ ŋɔtɔ̂ŋ mu nyíi gáa ŋ́gbonôi.

²⁴ Ŋ́gaa kpɔ́ a núu nyɔ́mɔɔ! Gbɛ̂ɛ ƃe pâi ŋ́gulâi ŋ́gbonôi ŋɔsaai yêei?

²⁵ Sɛɣɛi fe é tɛ́ɛ Ɣâla pɔ Kúnuu-namui Zîsɛ Kôrai sârai! À kɛ̀ ti gɛ̀ ní ńyãa kpîŋ ŋa Ɣâla ŋɔtɔ̂ŋ mɛi kâa a ŋ́gili, kɛ́lɛ, ŋa sɔnyɔ̂ŋ ŋɔtɔ̂ŋ mɛi kâa a ŋ́gbîŋ-tua-perei.