Lomaŋ 15 - Bible

¹ Kúai kúsu kpanaŋɔɔ̂i, maa nɛ̃ɛ̂i kú kúlii kpéle vii-kpɛɛ-ƃelai díkili-ŋa-sia nyɔ́mɔɔ-ŋai yêei, kúfe kúkpîŋ líi làa;

² fɛ̂ɛ kúkelee kúkɔlɛ-ma-ƃelai líi láa a gɛ́ɛ mɛni lɛ́lɛɛ e pa dípɔ dísu e kpanaŋ.

³ Kpɛ́ni fêi, Kôrai fe gbîŋ líi láa ni; kɛ́lɛ, yɛ̂ɛ berei bɔ̃yɛɛ̂i lai, “Mɛni nyɔ́mɔɔ-ŋai dí mò e pîlaŋ yâi, gélee e pù ŋ́ûa.”

⁴ Mɛni-ŋai dí bɔ̃̀yɛ nàa tuɛi, dí bɔ̃̀yɛ a gɛ́ɛ ku mɛni maa kɔ́ri a dia, a gɛ́ɛ lii-kpele su da Ŋ̀âla-kɔlɔi ŋɔŋa-nɛnɛ kili-kɛ-zu e kɛ́ kúyêei.

⁵ Nii-kpelei da ŋ̀anɛnɛ-Ɣalai é gɛ́ ka kákîe-ni wóo mɛni yɛ̂ɛ berei Zîsɛ Kôrai e mo lai,

⁶ a gɛ́ɛ ka Kúnuu-namui Zîsɛ Kôrai Naŋ-Ɣala ŋɔfólo-laai maa tɛ a woo-kɛ-zu tɔnɔɔ.

Duŋ Lɛ́lɛɛi a liî Zɛ̃tai-ŋai pɔ́

⁷ Mɛni ma ka káyee see kákîe-ni mu yɛ̂ɛ berei máŋ Kôrai e ǹyée see la kúmu Ɣâla ŋɔfólo-laai mɛni mai.

⁸ Ŋa môi a gɛ́ɛ Kôrai è kɛ̀ a núu-kpɛtɛ-mɛni yee-mu-nuu Ɣâla ŋɔtɔ̃yâi mɛni ma a gɛ́ɛ e Ɣâla ŋɔkono-tee-ŋai ŋ̀aa-see kɛ́ nyíi e gɛ Kúnuu-pɔlɔ-ŋai yêei,

⁹ a gɛ́ɛ ŋɔ́nɔ Zɛ̃tai-ŋai dí Ɣâla ŋɔfólo-laai maa tɛ ŋɔmaloŋ-kaai mɛni ma, yɛ̂ɛ berei bɔ̃yɛɛ̂i lai, “Mɛni ma ŋa pâi ímaa-mɛni ƃôi Zɛ̃tai-ŋai sama, ŋa wule tóo a ílaa”;

¹⁰ È mò ŋɔ́nɔ, ǹyɛɛi, “Zɛ̃tai-ŋai, ka lii-nɛ̃ɛ kula ka ŋɔnûai”;

¹¹ Ǹyɛɛ ŋɔ́nɔ, “Káai a Zɛ̃tai-ŋai kélee ka Kúnuu-namui láa maa tɛ, ka ǹɛɛ naa ǹûai kélee dí ǹáa maa tɛ”;

¹² Nya ƃe Azaya e mò ŋɔ́nɔ, ǹyɛɛ, “Núu tɔnɔ a pâi kulâi Zɛse ŋɔsuui su, nya ƃe pâi kɛ̂i Zɛ̃tai-ŋai mɛi; Zɛ̃tai-ŋai da pâi díkili kɛ̂i ma.”

¹³ Gili-kɛ-zu-Ɣalai é kálaa fɛ́ɛ a Líi-nɛ̃ɛ da lii-sêe laa-la su, a gɛ́ɛ kili-kɛ-zu támaa é kɛ́ káyêei M̀ɔlêŋ Maa Waai ŋɔwála-walai sârai.

Sâpoi Pɔ̂ɔ è gɔlɔ pɔ̃yɛ lai

¹⁴ Ŋánûa, ńyãa kpîŋ ńii lâai kámɛni ma a gɛ́ɛ káa kpîŋ kálaa fɛɛ̂i a lɛ́lɛ-laa, kálaa fɛ́ɛ a táre kélee, pɔ̂ri kɛ́ ƃo káa a gɛ́ɛ ka sɛŋ lɛ kákîe-ni dîa.

¹⁵ Kɛ́lɛ, ŋa kɔlɔ pɔ̃yɛ káa a lii-kpele-pere e pîlaŋ la mɛni-ŋa dîa nyíi-ŋai ŋa ŋ̀wɛ̂lii é lɛ́ɛ kákili ŋái. Ŋá nyíŋi kɛ̀ m̀ɛlɛ-seei mɛni ma Ɣâla e dɛɛ ḿbɔ

¹⁶ a gɛ́ɛ ŋá kɛ́ a Zîsɛ Kôrai ŋɔtii-kɛ-nuu Zɛ̃tai-ŋai dîɛi. Ŋa tíi kɛ̀ Zɛ̃tai-ŋai dîɛ yɛ̂ɛ Ɣâla ŋɔsâla láa soŋ nuui ŋɔtuŋ lɛ́lɛɛi mɛni ma a gɛ́ɛ Ɣâla e ǹyée see dímu yɛ̂ɛ sâla-sãa nyíi-ŋai M̀ɔlêŋ Maa Waai a dímaa wáai.

¹⁷ Gɛ̀ ní, sâpo káa ńyêei Zîsɛ Kôrai kponôi a gɛ́ɛ ńii é nɛ̃ɛ ŋɔtíi mɛni ma Ɣâla mi.

¹⁸ Kpɛ́ni fêi, fe pâi kɔ̂i a gɛ́ɛ ŋá lóno e pîlaŋ mɛni da kpɛni ma, kɛ́lɛ, fɛ́ɛ nɔ́ mɛni-ŋai Kôrai a gɛ́ ńzârai a gɛ́ɛ ŋá pá a Zɛ̃tai-ŋai woo-mɛni su ńono-woo su da ńdûa-pere,

¹⁹ da ŋɛi-kɛ-maa-ŋa da mɛni kpaya-kpaya díwala-walai, da M̀ɔlêŋ Maa Waai ŋɔwála-walai a gɛ́ɛ ŋa Kôrai ŋɔtuŋ lɛ́lɛɛi ƃo é síɣe Zerusâlɛŋ e seri Iliɛkɔŋ gwaa kélee.

²⁰ Mɛni ma ŋá ŋ̀wɛli kpɔ́ a dámaa a gɛ́ɛ ŋa Duŋ Lɛ́lɛɛi ƃo nɔ́ ƃɛi-ŋai ma dífe niî Kôrai láa tóli ni naai. À kɛ̀ ti gɛ̀ ní fe pâi tíi kɛ̂i núu da kpɛni ŋɔtíi kɛ́ɛ su.

²¹ Kɛ́lɛ, yɛ̂ɛ berei bɔ̃yɛɛ̂i lai, “Diai dífe niî wɔ́lɔ m̀aa-mɛni ƃo ni diai, da pâi gâai. Diai dífe niî wɔ́lɔ m̀aa-mɛni mɛni ni, da pâi tárêi zu.”

Pɔ̂ɔ e gbɛ̀tɛ gíli ŋá a gɛ́ɛ é lí Luŋ naa-kaa kɛ̂i

²² Sapoi ká ŋí ŋa kpera la pâi kápɔ a tãi támaai.

²³ Kɛ́lɛ, tíi fe ŋɔ́nɔ ńyêei gbiniŋ ŋí su-pere. Kɛ́lɛ, berei ŋa kɛ̀ ŋ̀wɛ̂lii la a kóraŋ támaa ŋá kákaâi,

²⁴ gáa ŋ́gili ŋá, ŋá kákaa tãi ŋà kɛ̀ tɛɛ̂i la ŋ́gɛ lì Sipîŋ. Kwa ka-ni kwa yɛpɛ pu a guro, ká kápama mâ.

²⁵ Tãi ŋí su ŋa liî Zerusâlɛŋ a kpɔŋ-maa Ŋ̀âla-ƃelai pɔ.

²⁶ Kpɛ́ni fêi, Masadonia-ƃelai da Ɛkeya-ƃelai líi e làa a gɛ́ɛ dí kpɔŋ-gîe-maa kɛ́ gôlo-ƃelai mɛni ma Zerusâlɛŋ-Ɣala-ƃelai sama.

²⁷ Dí gɛ̀ lii-laa su, ǹyaŋ Zerusâlɛŋ-ƃelai díkpa káa Zɛ̃tai-ŋai dîa a tɔ̃yâ. Kpɛ́ni fêi, à kɛ̀ Zɛ̃tai-ŋai da pá a gɛ́ɛ dí dílûwai da sɔlɔ ƃo nyíi kula M̀ɔlêŋ Maa Waai yêei, gɛ̀ ní dîa máŋ fɛ̂ɛ dí kpɔŋ dîa a ŋ̀éniɛi ŋí su-luai.

²⁸ Mɛni ma tãi ŋà nyíŋi kpɛ̀ɛ la, ŋá zɛŋ-kaoi tɛ́ɛ dípɔ Zɛ̃tai-ŋai dí bu gîe mai, ŋa pâi tɛɛ̂i a kápɔ naa-pere ŋá lí Sipîŋ;

²⁹ ŋá gɔ́lɔŋ a gɛ́ɛ ŋà pà kápɔ ŋa pâi pâi a lûwa kɛ́tɛ e kula Kôrai (ŋɔtuŋ lɛ́lɛɛi su).

³⁰ Ŋa kákpera fêi, ŋánûa, Zîsɛ Kôrai sârai da M̀ɔlêŋ ŋɔwɛli kɛ́-maai a gɛ́ɛ ka kpɔŋ mâ ku Ɣâla fɛli ḿɛni ma a gbanaŋɔɔ

³¹ a gɛ́ɛ ŋá kúla Zuda-ƃelai yêei nyíi-ŋai laa-la fe díyêei, a gɛ́ɛ ŋɔ́nɔ Zerusâlɛŋ-Ɣala-ƃelai dí díyee see gbɔŋ-maai mu ŋa liî la dípɔi,

³² a gɛ́ɛ Ɣâla à fàa ma ŋá pá kápɔ a lii-nɛ̃ɛ, su-kpanaŋ é pá ḿbɔ kásama.

³³ Nii-see-Ɣalai é kɛ́ kákelee kákɔlɛ. É kɛ́ ti.