Lomaŋ 12 - Bible

Kôrai-ƃelai dítii

¹ Mɛni ma ŋa kálîa-woo ƃôi, ŋánûa, Ɣâla ŋɔmaloŋ-kaai su, a gɛ́ɛ ka kákponôi tɛ́ɛ a fulu-laa sala-sɛŋ maa waa nyíi a Ɣâla líi làai. Mɛni ma, berei ŋí ƃé ya pɔ̂ri pɛlɛ̂i la Ɣâla kɔ́ɔ mu.

² Káfè kɛ̀ yɛ̂ɛ ǹɔii ŋí su-ƃelai, kɛ́lɛ, kámaa é kɛ́ a váleŋɔɔ kákili nina-ŋai sârai, a gɛ́ɛ ka Ɣâla ǹîa-mɛni kɔri nyíi gáa a mɛni lɛ́lɛɛ, da lii-laa-mɛni, e pɛlɛ mɛni-sãa ma Ɣâla ŋɛi tuɛi.

³ Ŋa mò núu kélee ma, m̀ɛlɛ-seei su nyíi dɛɛ̂i ḿbɔi, a gɛ́ɛ káfe kákpîŋ kàa a gɛ́tɛ é tɛ́ɛ berei ma kákaa lai. Kɛ́lɛ, ka kákili ŋá sia a ǹɛ́lɛɛ, yɛ̂ɛ berei Ɣâla a laa-la kɔɔ̂ŋ la núu kélee mɛni mai.

⁴ Kpɛ́ni fêi, yɛ̂ɛ berei kúwoŋo támaâi la kúkpono tɔnɔi ma, kɛ́lɛ, kúwoŋo-ŋai kélee dítii fe tɔnɔi,

⁵ mɛni ma, berei máŋ Kútamaâi lai, kúkaa a kpono tɔnɔ Kôrai su, ku ƃo ŋɔ́nɔ a kúkîe-ni woŋo.

⁶ Berei máŋ sama-sɛŋ-sii da kpɛni-ŋa díkaa la kúyêei yɛ̂ɛ berei Ɣâla ŋɔƃɛlɛ-sêei tɛɛ̂i la kúpɔi. À kɛ̀ máŋ a Ɣâla-woo ƃoɔ, kwaa ku Ɣâla-woo ƃo yɛ̂ɛ berei kúlaa-lai káa lai,

⁷ kpaa máŋ é kɛ́ a kpɔŋ-maa-tii kwaa ku gɛ; kpaa máŋ ǹúui gáa kɔlɔ lɛ̂i, é ǹɛ́;

⁸ kpaa máŋ ǹúui a núu lia-woo ƃoi é m̀ó; kpaa máŋ ǹúui a ƃɛlɛ-sêe kɛ̂i é gɛ́ a lii-lɛlɛ; kpaa máŋ à kɛ̀ a nuu-tuɛ-nuu, e ŋɔtíi kɛ́ a ǹɛ́lɛɛ; kpaa máŋ ǹúui a maloŋ-kaa kɛ̀i, e gɛ a lii-nɛ̃ɛ.

⁹ Káwɛli-kɛ-maai é kɛ́ a tɔ̃yâ-wɛli-kɛ-maa kpîŋ; ka mɛni nyɔ́mɔɔ kpɔara, ka kánaŋ mɛni lɛ́lɛɛ ma;

¹⁰ ka kákîe-ni wɛli a núu-laa wɛli-kɛ-maa; ka kɔ́ kpɔ́ a gbanaŋɔɔ ka ƃaa kɛ́-maa tɛ́ɛ kákîe-ni pɔ.

¹¹ Káfe nyɛ̃-yɛ̃ŋ kátii-ŋai su. Kɛ́lɛ, ka kpanaŋ kámɔ̂leŋ su, ká tíi kɛ́ Kúnuu-namui mi.

¹² Ka lii-nɛ̃ɛ kula kákili-kɛ-zui su. Ka kálii kpele mɛni-kpɔ̂lu su. Ka tɔɔ Ɣâla-fɛliɛ su a gbanaŋɔɔ.

¹³ Ka zãâi tɛ́ɛ Ŋ̀âla-ƃelai pɔ nyíi-ŋai maa-kpaaŋ káa dîa. Ka ŋɛi-pono maa kɔri.

¹⁴ Ka lûwa láa diai dîa da kákpɔ̀arâi. Ka lûwa láa dîa, káfe dínaɣaŋ.

¹⁵ Ka lii-nɛ̃ɛ kula ka diai da lii-nɛ̃ɛ kùlai. Ka wɔ́lɔ ka diai da wɔ́lɔ̂i.

¹⁶ Ka tûa a kákîe-ni a ǹɛ́lɛɛ; káfè kɛ̀ a su-mɛni-kɛtɛ-ƃela, ka ŋa-yeŋ-ƃela ka kɛ́ kákîe-ni dîa; káfe kákpîŋ kɛ̀tɛ.

¹⁷ Káfe mɛni nyɔ́mɔɔ gba kula a mɛni nyɔ́mɔɔ, kɛ́lɛ, ka kákili ŋa sia mɛnii ma ǹɛ́lɛɛ̂i núu kélee ŋɛi.

¹⁸ À kɛ̀ pere à kɛ̀ naa ka kɔ a gbanaŋɔɔ ka tûa a núu a lii-sêe-pere.

¹⁹ Ŋáwɛli-kɛ-maa-ƃelai, káfe mɛni pɔ́ɔ kula káa kpîŋ. Kɛ́lɛ, ka ǹɛɛ naa Ɣâla ŋɔlii-wana kpanaŋ mɛni ma, yɛ̂ɛ berei bɔ̃yɛɛ̂i la, “Mɛni pɔ́ɔ kúlaa káa a ḿbɔɔ, ŋa pâi bɔ́ɔ kulâi. Kúnuu-namui ƃe mò ti.”

²⁰ Káfe mɛni pɔ́ɔ kula kaa kpîŋ, kɛ́lɛ, ka gɛ́ yɛ̂ɛ berei bɔ̃yɛɛ̂i lai, “Puru à kɛ̀ kákpɔara-nuu kɛ̂i, ka mii-sɛŋ tɛɛ bɔ; kpele-wɛli à kɛ̀ gɛ̂i, ka yá tɛ́ɛ bɔ e gbele; kpɛ́ni fêi, kà gɛ̀ ti, gɛ̀ ní kákaa ŋɔŋ-téɣa pûi ŋ̀ûa.”

²¹ Káfe nɛ̀ɛ naa sɔnyɔ̂ŋ yée fè tɛ̀ɛ kâa. Kɛ́lɛ, káyee e tɛ́ɛ sɔnyɔ̂ŋ ma a mɛni lɛ́lɛɛ kɛ́ɛ.