Lomaŋ 11 - Bible

Eezuɛ-ŋai nyíi-ŋai lɛ̀ɛ laa-la sui

¹ Gɛ̀ ní ŋa mare-kɛɛ kɛ̂i. Ɣâla a bôlu tɔɔ ŋɔnûai dîa? Ve ti a dɔnɔ kpîŋ! Ńyãa kpîŋ ŋ́gaa a Eezuɛ-nuu, ŋ́gɛ ƃo a Eberaɣɛ̃ɛ ŋɔsuui su-nuui da, ŋ́gɛ ƃo ŋɔ́nɔ a Bɛŋsima ŋɔsii da.

² Ɣâla fe bôlu tɔ̂ɔni ŋɔnûai dîa, nyíi-ŋai e díkɔ̀lɔŋ a maa-ŋuŋ. Káfe mɛnii kɔ́lɔŋ Ŋ̀âla-kɔlɔi a mò e pîlaŋ Ilaza ma, berei e Eezuɛ-ŋai maa-ŋ̀wana-lɔ̂ɔ lɔ la Ɣâla mai?

³ “Kúnuu-namui, da ílono-kɛ-ƃelai páa, da íteƃele-ŋai su kara. Ńyãa tɔnɔ nɔ́ ƃa lɛɛ, ǹyaŋ díkaa ḿbaa-pere kɔ́rîi.”

⁴ Kɛ́lɛ, Ɣâla e ŋ̀óo su tòo leŋ? “Núu wála lɔ́ɔlu mɛi feerɛ káa niî ǹyêei, nyíi-ŋai dífe niî pɛlɛ ni Bêe kɔɔ mu.”

⁵ Mɛni ma, tãi ŋí su máŋ, núu da-ni dí lɛ̀ɛ, nyíi-ŋai Ɣâla e dílɛ̀ ŋɔƃɛlɛ-sêei sârai.

⁶ Kɛ́lɛ, à kɛ̀ e dílɛ̀ ŋɔƃɛlɛ-sêei sârai, gɛ̀ ní ve dílɛ ni dítii kɛ́ɛ sârai; à wàla kɛ́ ti gɛ̀ ní Ɣâla ŋɔƃɛlɛ-sêei fe ŋɔ́nɔ pâi kɛ̂i a ƃɛlɛ-sêe.

⁷ Le ƃe ŋaŋ? Eezuɛ-ŋai dí fɛ̀ɣɛ a gɛ́ɛ dí mɛnii sɔlɔ ƃo dí kɛ̀ gɔ́rii. Diai Ɣâla e dílɛ̀i, dí zɔlɔ ƃo. Kɛ́lɛ, ǹúui gbeli-ŋai líi su è kɛ̀ a gbanaŋɔɔ,

⁸ yɛ̂ɛ berei bɔ̃yɛɛ̂i lai, “Ɣâla e díkili ŋá pù, é ŋɛi tɛ́ɛ dípɔ nyíi va kwaa kâai, é wóli tɛ́ɛ dípɔ nyíi va mɛni mɛnii, é lɛ́ɛ zu e seri tãi ŋí ma.”

⁹ Deeƃé a mò, ǹyɛɛ, “Tɔɔ díkuui é kɛ́ a deɣaŋ, ƃáre, lóa da tɔŋ-kpɛ́-maa dímɛni ma.

¹⁰ Tɔɔ díŋɛi é kpíni dîa a gɛ́ɛ dífe kwaa kaa, dí dímaa pɛ́lɛ wɔlɔ-wɔlɔ da wɔlɔ-wɔlɔ.”

Zɛ̃tai-ŋai díƃalo-laai

¹¹ M̀ɛni ma ŋa mare-kɛɛ kɛ̂i. Da karêŋ a gɛ́ɛ dí tóo? Ve ti a dɔnɔ kpîŋ! Kɛ́lɛ, díkɛɛ dífe Ɣâla wóo mɛni níi, ƃalo-laa a lí Zɛ̃tai-ŋai pɔ, a gɛ́ɛ é gɛ́ Eezuɛ-ŋai dí tólo kúla.

¹² Ǹyaŋ à kɛ̀ díkɛɛ dífe Ɣâla wóo mɛni níi, su-kulai ƃa tɔɔ-laa ŋ̀éniɛi mɛni ma, à kɛ̀ ŋɔ́nɔ dífɛɣɛi su-kulai ƃa tɔɔ-laa Zɛ̃tai-ŋai mɛni ma, gɛ̀ ní ve pâi kɛ̂i a tɔɔ-laa kɛ́tɛ à kɛ̀ da pà pôlu Ɣâla pɔ!

¹³ Kɛ́lɛ, ŋa lônoi káai a Zɛ̃tai-ŋai kápɔ. Tãi nɔ́ ŋ́gaa la a Zɛ̃tai-ŋai dísia-nuui, ŋa kɔ̂i a gɛ́ɛ ŋa Ŋáɣâla-tii kɛ́ ƃaa kɛ́-maa-pere su

¹⁴ a gɛ́ɛ marâa-Zûu-ŋai dí tólo kula, ǹyaŋ da-ni da ƃâlo bere-sii ti su.

¹⁵ Kpɛ́ni fêi, à kɛ̀ díyee-kula-mui su-kulâi ƃa ŋ̀éniɛi páa pôlu Ɣâla pɔ́, gɛ̀ ní, díyee-see-mui su-kulâi ƃé pâi kɛ̂i a lé, é kúla fúlu-laa kúlaa saa yêei pôlu?

¹⁶ À kɛ̀ gbólo-kanei gbua-loŋ à kɛ̀ a ǹɛ́lɛɛ, gɛ̀ ní, gbólo-kanei kélee lɛ́lɛɛ̂i. À kɛ̀ máŋ ŋuru-samei à kɛ̀ a ǹɛ́lɛɛ, gɛ̀ ní ŋoŋo-ŋai lɛ́lɛɛ̂i.

¹⁷ Kɛ́lɛ, eêi kɛ̀ ŋulɔ-wuru lɛ́lɛɛi ŋoŋo da-ni dîi kɛ̀ a ŋaleɛ, ǹyaŋ yái íkaa ŋulɔ-wuru nyɔ́mɔɔi dí íwoŋo siɣe dí ŋuru-woŋo-ɣaleɛi pɛ́ŋ pɛlɛ la a gɛ́ɛ í ŋuru lɛlɛɛi ŋɔlɛ́lɛ-laai da sɔlɔ ƃo,

¹⁸ ífe yoŋka tèe ŋuru-woŋo-ŋai mɛi, kpɛ́ni fêi, à kɛ̀ yà yoŋka tèe, é kɛ́ íkili ŋá a gɛ́ɛ ya fe ŋurii ŋɔsamei sonîi, kɛ́lɛ, ŋurii ŋɔsamei ƃe ísonîi.

¹⁹ Ya pâi mòi, yɛɛ, “Dí wuru-woŋo-ŋa ɣàle a gɛ́ɛ dí dípɛŋ pɛ́lɛ a ńyãa.”

²⁰ Gáa a tɔ̃yâ. Dí díɣale, kpɛ́ni fêi, laa-la fe kɛ́ ni díyêei, kɛ́lɛ, ya tɔ̂ɔ nɔ́ a gbanaŋɔɔ, kpɛ́ni fêi, laa-la káa íyeêi. Mɛni ma ífe yoŋka tèe, kɛ́lɛ, tɔɔ Ɣâla ŋɔyao-maai su.

²¹ Kpɛ́ni fêi, à kɛ̀ Ɣâla fe ŋulɔ-wuru lɛ́lɛɛi kpîŋ woŋo-ŋai su mɛni lɛɛ ni, ve pâi ísu-mɛni lɛ̀ɛi.

²² Ya pɔ̂ri Ɣâla ŋɔsɔŋ lɛ̂lɛi kâai da ŋɔlii-kpanaŋ: ǹíi kpanaŋɔɔ̂i diai dîa da tooi, kɛ́lɛ, Ɣâla ŋɔsɔŋ-lɛ̂lɛi káa yâ à kɛ̀ yà lɛ̀ɛ nɔ́ ŋɔsɔŋ-lɛ̂lɛi su; à wàla kɛ́ ti da pâi íteêi ya máŋ.

²³ À kɛ̀ gbeli-ŋai máŋ nyíi-ŋai laa-la fe díyêei, Ɣâla a pâi dípɛŋ pɛlɛ̂i, kpɛ́ni fêi, wála-wala káa Ɣâla yêei a gɛ́ɛ e dípɛŋ pɛlɛ ŋɔ́nɔ.

²⁴ Kpɛ́ni fêi, à kɛ̀ da íwoŋo tée, yái íkaa a ŋulɔ-wuru nyɔ́mɔɔi dí ŋulɔ-wuru lɛ́lɛɛi pɛŋ pɛlɛ la, a pɔ̂ri kɛ̂i a vii-kpɛɛ a gɛ́ɛ dí ŋulɔ-wuru lɛ́lɛɛi pɛŋ pɛlɛ a gbɔɔi-woŋo-ŋai.

Ɣâla a pâi pâi a Eezuɛ-ŋai pôlu

²⁵ Ŋánûa, ŋa ŋ̀wɛ̂lii a gɛ́ɛ ka noo-mɛnii ŋí ŋá káa a gɛ́ɛ káfe su-mɛni kɛtɛ kɛ́ káa kpîŋ mɛni ma. Lii-kpanaŋ a pá Eezuɛ-ŋai da-ni pɔ, e lɛɛ la zu Zɛ̃tai-ŋai kélee dí lɔ Ɣâla ŋɔkâloŋ-laai su,

²⁶ maa-perei ti su Eezuɛ-ŋai kélee da pâi ƃálôi; yɛ̂ɛ berei bɔ̃yɛɛ̂i lai, “Ŋuŋ-maa-ƃo-nuui a pâi kulâi Zãiyɔŋ, a pâi Zeeka ŋɔsii su-ƃelai kélee díŋ̀wana-lɔ̂ɔi kpɛɛ̂i”;

²⁷ “ǹyaŋ nyíŋi a pâi kɛ̂i a ŋákpanaŋ-woo kɛ́ɛ díyêei, tãi ŋa dísɔnyɔ̂ŋ kula la diai.”

²⁸ Kwà kúkili ŋa sìa e pîlaŋ Duŋ Lɛ́lɛɛi ma, kwa gàa a gɛ́ɛ Zûu-ŋai díkaa a Ɣâla kpɔara-ƃela kámɛni ma. Kɛ́lɛ, kwà kúkili ŋá sìa e pîlaŋ berei ma Ɣâla a núu lɛ̀ lai, kwa gàa a gɛ́ɛ díkaa a Ɣâla ŋɔwɛli-kɛ-maa-ƃela dínâŋ pɔlɔ-ŋai sârai.

²⁹ Kpɛ́ni fêi, Ɣâla fa ŋɔsama-sãai da ŋɔtólii siɣe pôlu.

³⁰ Yɛ̂ɛ berei nɔ́ káfe kɛ́ ni Ɣâla wóo mɛnii la, kɛ́lɛ, ka maloŋ-kaa sɔlɔ ƃo ǹyêei Zûu-ŋai Díɣâla wóo piliɛɛ̂i sârai,

³¹ bere nɔ́ ƃe Zûu-ŋai dífe Ɣâla wóo mɛni ni la a gɛ́ɛ dia máŋ dí (nâa) maloŋ-kaa sɔlɔ ƃo maloŋ-kaai sârai, nyíi Ɣâla e dɛ̀ɛ kápɔi.

³² Kpɛ́ni fêi, Ɣâla a núu kélee síɣe a ŋ̀óo-pili-ƃela a gɛ́ɛ é núu kélee malôŋ káa.

³³ Óo Ɣâla ŋɔtárei da ŋɔmɛni kɔlɔŋɔɔi nyíi-ŋai dísiŋɔɔ̂i dítɔɔ-laai sui! Berei káa ŋɔmɛni ŋa-teɛɛ-ŋai kúfa pɔ̂ri maa-kɔrii la da ŋɔpere-ŋai nyíi dɛɛi kúkili-ŋa-siai mai!

³⁴ “Gbɛ̂ɛ ƃa wɔ́lɔ Nuu-namui ŋɔkili-ŋa-siai kɔlɔŋ, kpaa máŋ, gbɛ̂ɛ ƃa wɔ́lɔ kɛ́ a ǹia-woo ƃo-nuu?”

³⁵ “Kpaa máŋ, gbɛ̂ɛ fulɔi ƃa wɔ́lɔ zama, a gɛ́ɛ ǹyaŋ é sama-sɛŋ sɔlɔ ƃo ǹyêei?”

³⁶ Kpɛ́ni fêi, sɛŋ kélee a kûla ǹyêei, ǹyaŋ sɛŋ kélee kɛ́ kpɛ̀tɛ zarâi, sɛŋ kélee kɛ́ ƃo ŋɔ́nɔ a bɔ́ɔ. Ǹyaŋ folo-laa káa mà wɔlɔ-wɔlɔ da wɔlɔ-wɔlɔ. É kɛ́ ti.