Levetekɔ 6 - Bible

¹ Yâwɛɛ è mò Mose ma ǹyɛɛi,

² À kɛ̀ núu da a Yâwɛɛ ŋɔtɔ̂ŋ-ŋai da kàra a kíri tua kɛ́ɛ a m̀arâŋ Eezuɛ-nuu kɔ̃liŋ da siɣeɛɛ nyii è ǹɛɛ ǹyêei kpaa máŋ é ŋúma, kpaa máŋ é m̀arâŋ-nuu kɔ̃liŋ kúla ǹyêei a wôya pere,

³ kpaa máŋ é lɛ́ɛ kɛ́ é pîlaŋ sɛŋ da mɛni ma nyii làŋ ǹyêei ǹyaŋ a gáa kɛ́lɛ gɛ́ vòo a lɛ́ɛ pere ǹyɛɛ vé nîi gáa níi.

⁴ À kɛ̀ núu a mɛni-ŋai ŋí da kɛ̀, fɛ̂ɛ é zãai kélee fela-fei kɛ́ nyii è zɔlɔ bô a wôya perei.

⁵ Kpaa máŋ tãi a pá ŋɔsɔnyɔ̂ŋ maa sâla sɛŋ tɛ̂ɛi lai, é zɛŋ kélee fela fei kɛ́ nyii è zɔlɔ ƃô a wôya perei. É tela zɔ̃ɔ gbua buu feerɛ ɣele láa mà.

⁶ É pá a ƃála-sirɛ nyii pɔ́ɔ fé mai zâla láa soŋ nuui pɔ́ a ŋɔsɔnyɔ̂ŋ maa sâla sɛŋ Yâwɛɛ mɛ́ni ma. Zâla láa soŋ nuui é zâla sɛŋ ŋí ƃâa tée ŋâla-pɛrɛ kɛ́tɛi ŋɔtɔ̂ŋ la-wooi ma.

⁷ Ǹyaŋ zâla láa soŋ nuui a pâi ŋɔsɔnyɔ̂ŋ maa sâla kalâi Yâwɛɛ ŋɛ́i zɔnyɔ̂ŋ mɛni ma è gɛi. A kɛ̀ tí, ŋɔsɔnyɔ̂ŋ su mɛni a pâi lɛɛ̂i.

Zâla sɛŋ nyii da gélee kereŋ

⁸ Yâwɛɛ è mò Mose ma ǹyɛ̂ɛi,

⁹ “M̀ó Eelɔŋ ma da ǹônii yɛi, géreŋ sâla sɛŋ maa tɔ̂ŋ-ŋai ká ŋí. Zâla sɛŋ é nyíi ŋ̀âla-teƃelei ŋá, ŋɔŋ é nyíi sonîi naa.

¹⁰ Zâla láa soŋ nuui é ŋɔseɣe-kole nɛnɛ-fɛfɛɛ yokpoi tóo ma da ŋɔseɣe-kole nɛnɛ-fɛfɛ bɛrɛ-kpuai pú m̀a. É géreŋ sâla-sɛŋ maa luui kɔ́ɔ ŋ̀âla-teƃelei ŋá é bù gɔlɛ.

¹¹ Gɛ̀ ní é ŋɔseɣei maa fáleŋ é seɣe da kpɛ́ni tóo m̀a, é kúla a ǹuui mûui su é lí la gwaa maa waai ḿâ ƃɛ́ da ǹuui pìli naai.

¹² Ŋ̀âla-teƃelei ma ŋɔŋ é kɛ́ nɔ́ sónîi, vé ǹiiŋ. Zâla láa soŋ-nûui é kɔi pú ŋɔŋ ŋá a ɣele-wâla kélee, é géreŋ sala-sɛŋ pú ŋɔŋ ŋá a bú pere, é ǹii-sêei sâla-sɛŋ wúlɔ kéreŋ naa.

¹³ Ŋɔŋ é kɛ́ nɔ́ sónîi ŋ̀âla-teƃelei ŋá vé nìiŋ.”

M̀ii-sɛ̂ŋ sala-sɛŋ

¹⁴ M̀ii-sɛ̂ŋ sala-sɛŋ maa tɔ̂ŋ-ŋai ká ŋí. Zâla láa soŋ-nûui nyii gáa a Eelɔŋ ǹóŋ dɔnɔi, é lí a m̀ii-sɛ̂ŋ salai ŋí é gula ŋ̀âla-teƃele ŋá Yâwɛɛ ŋɛ́i-tuɛ.

¹⁵ Zâla láa soŋ-nûui é ǹyée tɔnɔ láa fɛ́ɛ a felaƃa fũa lɛ́lɛɛ sumóɔɔ a wúlɔ nyii è gùla m̀ii-sɛ̂ŋ sala-sɛŋ sui da kéreŋ-sɛŋ kúŋ nɛ̃ɛ é géreŋ ŋ̀âla-teƃelei ŋá a kili too ŋ̀á sala-sɛŋ, nyii gáa a kéreŋ sala-sɛŋ kúŋ nɛ̃ɛ Yâwɛɛ mɛni mai.

¹⁶ Eelɔŋ da ǹônii dí gbéli kpɛtɛ a kpólo nyii tɛ́-sɛŋ fé zui, dí mii Yâwɛɛ ŋɔpɛ́rɛ maa waai mu.

¹⁷ Dífe gbɛ̀tɛ a tɛ́-sɛŋ. Ŋa dɛ̀ɛ dípɔ a géreŋ sâla-sɛŋ díwɔ̂ mii. Gáa a sála sɛŋ maa waa kɛ́tɛ yɛ̂ɛ zɔnyɔ̂ŋ sala sɛŋ da mɛni kpa kuláa maa sala sɛŋ.

¹⁸ Eelɔŋ ǹônii sinaai dísuui su sinaai díwɔ̂ sala-sɛŋ mii ká ŋí zâla sɛŋ su nyii da dɛ̀ɛ Yâwɛɛ pɔ́i. Gáa a díwɔi wɔlɔ-wɔlɔ da wɔlɔ-wɔlɔ. Núu da kpɛ́ni a lɛ̀ɣɛ mii-sɛŋ ŋí ḿâ, a pâi naa pɔɔ lɛ̂i, kpɛ́ni-fei m̀aa waai.

¹⁹ Yâwɛɛ è mò Mose ma ǹyɛɛ̂i,

²⁰ Zama-sɛŋ ŋí ƃé Eelɔŋ da ǹônii da pâi dɛɛ̂i Yâwɛɛ pɔ́ tãi da díyee pɛ̀lɛ la Eelɔŋ ŋûai, felaƃa fũa pãŋ feerɛ a ŋ̀ele kélee mii-sɛŋ ḿaa sala sɛŋ. Dí ŋá kɔlɛ gîei feerɛ, gbua tɔnɔ kɛ́ ƃò a ŋ̀ele-wâa sala sɛŋ, gbeli kɛ́ ƃò a ŋ̀ele-wulii ŋ̀ɔi.

²¹ É kɛ́ a zumoɔɔ a wúlɔ a ǹɛ́lɛɛ, í gbɛtɛ kpólo kpɛtɛ sɛŋ su, í ŋ̀ale-ɣale, í dɛ̀ɛ a mii-sɛŋ sala sɛŋ nyii géreŋ kuŋ lɛ̂lɛɛi Yâwɛɛ mɛni mai.

²² Zâla láa soŋ nuui nyii gáa a Eelɔŋ ǹóŋ sinaai dɔnɔ nyii pâi Eelɔŋ pɔ́ɔ ŋá siɣêi é kɛ́ zâlai ŋí kulâi Yâwɛɛ ma wɔlɔ-wɔlɔ da wɔlɔ-wɔlɔ. É zâla-sãai ŋí kélee kpɔ́ kéreŋ vé da lɛ̀ɛ.

²³ Mɛni ma m̀ii-sɛŋ salai kélee zâla láa soŋ nuui a gulâi, núu da fé maa sâla-sɛŋ da mii. Fɛ̂ɛ é gélee kéreŋ Yâwɛɛ mɛni ma.

Sɔnyɔ̂ŋ nyii núu fé gili níi maa sâla

²⁴ Yâwɛɛ è mò Mose ma a gɛɛ é

²⁵ mó Eelɔŋ ma da ǹônii ǹyɛɛ dɔ̂ŋ-ŋai ká ŋí bîlaŋɔ̃i zɔnyɔ̂ŋ sala sɛŋ mai. Zɔnyɔ̂ŋ sala fɛnɛ-sɛŋ páa ƃɛ́i ƃa géreŋ salai maa taa-tulɛi pàa naai Yâwɛɛ ŋɛ́i-tuɛ. Gáa a sâla sɛŋ maa waa ŋánaa.

²⁶ Zâla láa soŋ nuui nyii zâlai ŋí kulâi é ma suai míi gwaa ma waai ma Yâwɛɛ ŋɔsua-kɔlo seɣe pɛ́rɛi mu.

²⁷ Sɛŋ da kélee kpaa máŋ núu da kélee a lɛ̀ɣɛ zâla sɛŋ ŋí ḿâ, zâla-seŋ a pâi bɔ́ɔ lɛɛ̂i m̀a kpɛ́ni-fei m̀aa wâai. Ŋãa da a tela pù seɣe da ḿâ, fɛ̂ɛ dí maa seɣei tí wáa gwaa ma waai ma.

²⁸ Ǹyaŋ da ŋ̀ili pɔ̂rɔ leɣi su, fɛ̂ɛ dí maa leɣii wólo. Kɛ́lɛ da ŋ̀ili kɔli leɣi su, dí maa kɔli leɣii su kîiŋ kpɔ́ a ǹɛ́lɛɛ dí ŋ̀waa a yá.

²⁹ Zinâai kélee zâla láa soŋ-ƃelai sámai da pɔ̂ri zâla sɛŋ ŋí da miî. Gáa a sâla sɛŋ maa wâai a ŋánaa.

³⁰ Kɛ́lɛ daa-tulɛi nyii kélee da gùla a sâla dí ŋãa kúla zu dí pá la Yâwɛɛ ŋɔsua-kɔlɔ-seɣe pɛrɛi mu a gɛɛ dí sɔnyɔ̂ŋ maa sâla kula la gwaa ma waai mai, núu da fé maa suai da mii. Dí maa suai kélee kéreŋ.