Levetekɔ 4 - Bible

Dɔ̂ŋ-ŋai bîlaŋɔɔi zɔnyɔ̂ŋ ḿa núu a gɛ̀ dɛ̂i perei

¹ Yâwɛɛ è mò Mose ma ǹyɛɛi,

² “M̀ó Eezuɛ-ŋai dîa à kɛ̀ núu da a Yâwɛɛ ŋɔtɔ̂ŋ da kàra nyii vé gíri níi, fɛ̂ɛ maa ǹúui é mɛni-ŋai ŋí kɛ́.

³ “À kɛ̀ a zâla láa soŋ nûu kɛ́tɛi ƃé zɔnyɔ̂ŋ kɛ̀i, ŋɔsɔnyɔ̂ŋ a pâi kɛ̂i ǹûai kélee dîa. Gɛ̀ ní fɛ̂ɛ é sâla kula Yâwɛɛ ma a niŋa-nâɣa nyii pɔ́ɔ fé mai ŋɔsɔnyɔ̂ŋ mɛni ma.

⁴ É pá a niŋa-sîrɛi Yâwɛɛ ŋɔsua-kɔ̂lɔ-seɣe pɛrɛi gbôŋ lá, é ǹyée pɛ́lɛ ŋuŋ ma, é báa Yâwɛɛ ŋɛ́i-tuɛ.

⁵ Gɛ̀ ní zâla láa soŋ nûu kɛ́tɛi é niŋa-sirɛi ŋãa da siɣe é lɔ́ la Yâwɛɛ ŋɔsua kɔ̂lɔ-seɣe pɛrɛi mu.

⁶ Zâla láa soŋ nuui é ǹyée gbua lɔ́ ŋãai sú é gbɛ́mɛŋ gwaa ma Waa Maa Waai ḿa ŋɛ́i-tuɛ seɣei ŋɛ́i-tuɛ gîei lɔ́ɔlu mɛi feerɛ.

⁷ Zâla láa soŋ nuui é niŋa ŋãai da pú géreŋ sɛŋ kúŋ nɛ̃ɛ kéreŋ teƃelei mĩla-ŋai mâ nyii gáa Yâwɛɛ ŋɛ́i-tuɛ ŋɔsua kɔ̂lɔ seɣe pɛrɛi lai. É niŋa-sirɛ ŋãai kpéli pú géreŋ sala kula teƃelei kɔ́ɔ mu nyii gáa Yâwɛɛ ŋɔsua kɔ̂lɔ seɣe pɛrɛi gbôŋ lai.

⁸ Zâla láa soŋ nuu kɛ́tɛi é niŋa-sirɛi wúlɔ kélee kúla da goi sãâ ma wulɔi kélee,

⁹ goi kɔni-kao feerɛi da ŋ̀úlɔ kélee gáa mai da ǹíi pɛɣɛ-pɛɣɛi.

¹⁰ Zâla láa soŋ nuui é zãai ŋí kélee kéreŋ a kéreŋ sala-sɛŋ Ŋ̀âla-teƃelei ma, yɛ̂ɛ berei è gɛ̀ la a ǹaoi-laa sala sɛŋ.

^11-12 Kɛ́lɛ é niŋa-sirɛi kɔlɔ síɣe da ǹúu, da ŋ̀uŋ da gbɔrɔ, da goi sãai é pɛ́lɛ buru ma, é kúla a gélee mûui su é lí la gwaa ma waai ma ƃɛ́i da ǹuui pîli naai, é géreŋ naa.

¹³ “À kɛ̀ Eezuɛ-ŋai kélee ƃé sɔnyɔ̂ŋ kɛ̀ a Yâwɛɛ a ŋɔtɔ̂ŋ da karaa nyii dífe gili níi,

¹⁴ da dísɔnyɔ̂ŋ kɔ̂lɔŋ nyii dí gɛ̀i, fɛ̂ɛ dí pá a niŋa nâɣa Yâwɛɛ ŋɔsua kɔ̂lɔ seɣe pɛrɛi lá dí gúla a sɔnyɔ̂ŋ sala.

¹⁵ Ǹyaŋ Eezuɛ láa túɛ-ƃelai dí pá a ǹiŋa-nâɣai Yâwɛɛ ŋɛ́i-tuɛ dí díyee pɛ́lɛ ŋ̀uŋ ma dí báa.

¹⁶ Gɛ̀ ni zâla láa soŋ nuui é pá a ǹiŋa-nâɣai ŋãa da Yâwɛɛ ŋɔsua kɔ̂lɔ seɣe pɛrɛi mu,

¹⁷ é ǹyée gbua lɔ́ zua ŋãai su é gbɛ́mɛŋ gwaa maa waai maa waai ŋɛ́i-tuɛ seɣei ŋɛ́i-tuɛ gîei lɔ́ɔlu mɛi feerɛ Yâwɛɛ ŋɛ́i-tuɛ.

¹⁸ Zâla láa soŋ nuui é niŋa ŋãai da pú géreŋ sɛŋ kúŋ nɛ̃ɛ kéreŋ teƃelei mĩla-ŋai mâ nyii gáa Yâwɛɛ ŋɛ́i-tuɛ ŋɔsua kɔ̂lɔ seɣe pɛrɛi lai. É niŋa ŋãai kpéli pú géreŋ sala kula teƃelei kɔ́ɔ mu nyii gáa Yâwɛɛ ŋɔsua kɔ̂lɔ seɣe pɛrɛi gbôŋ lai.

¹⁹ É niŋa-sirɛi ŋ̀úlɔ kélee kúla é géreŋ ŋ̀âla teƃelei ma.

²⁰ É gɛ́ nɔ́ yɛ̂ɛ berei è gɛ̀ la a zɔnyɔ̂ŋ su mɛni lɛ̀ɛ maa sâla kula niŋa-sirɛi. Bere sîi ŋí ƃe a ǹûai dísɔnyɔ̂ŋ su mɛni lɛ̀ɛ maa sala kùla la. A kɛ̀ tí, dísɔnyɔ̂ŋ su mɛni a pâi lɛɛ̂i.

²¹ É kúla a niŋa-sirɛi m̀ûui su é géreŋ yɛ̂ɛ berei è gɛ̀ la a niŋa-sirɛi maa-ŋuŋ. Gáa a sɔnyɔ̂ŋ su mɛni lɛ̀ɛ maa sâla sɛŋ Eezuɛ-ŋai mɛni ma.

²² “À kɛ̀ ǹúu láa túɛ nuui da ƃé sɔnyɔ̂ŋ kɛ̀ a Yâwɛɛ ŋɔtɔ̂ŋ da karaa nyii vé gili níi,

²³ a ŋɔsɔnyɔ̂ŋ kɔ̂lɔŋ nyii è gɛ̀i, fɛ̂ɛ é pá a ƃoli-sirɛ nyii pɔ́ɔ fé mai a sâla sɛŋ,

²⁴ é ǹyée pɛ́lɛ ŋ̀uŋ ma é báa ŋ̀âla-teƃelei ŋá ƃɛ́i da géreŋ sâla kula taa-tulɛi paa naai Yâwɛɛ ŋɛ́i-tuɛ. Gáa a sɔnyɔ̂ŋ sala sɛŋ.

²⁵ Gɛ̀ ní zâla láa soŋ nuui é ǹyée gbua lɔ́ zɔnyɔ̂ŋ sala sɛŋ ŋãa su é bú géreŋ sala kula teƃelei mĩla-ŋai dîa, é ŋ̀ãai kpéli pú teƃelei kpîŋ kɔ́ɔ mu.

²⁶ É daa-tulɛi ŋ̀úlɔ kélee kéreŋ ŋ̀âla-teƃelei ŋá yɛ̂ɛ berei a gɛ̀ la a ǹíi-see sala sɛŋ. Gɛ̀ ní zâla láa soŋ nuui a pâi ǹúu láa túɛ-nuui ŋí ŋɔsɔnyɔ̂ŋ maa sâla kulâi, ǹyaŋ ŋɔsɔnyɔ̂ŋ su-mɛni a pâi lɛɛ̂i.

²⁷ “À kɛ̀ Eezuɛ-ŋai da ƃé sɔnyɔ̂ŋ kɛ̀ a Yâwɛɛ ŋɔtɔ̂ŋ karaa nyii vé gili níi,

²⁸ À ŋɔsɔyɔ̂ŋ kɔ̀lɔŋ nyii è gɛ̀i, fɛ̂ɛ é pá a ƃoli-sâa nyii pɔ́ɔ fé mai a sala sɛŋ ŋɔsɔnyɔ̂ŋ mɛni ma nyii è gɛ̀i.

²⁹ É ǹyée pɛ́lɛ ŋɔsɔnyɔ̂ŋ salai ŋí ŋuŋ ma é báa ƃɛ́i da géreŋ sala kula taa-tulɛi páa naai.

³⁰ Gɛ̀ ní zâla láa soŋ nuui é ǹyée gbua lɔ́ zɔnyɔ̂ŋ sala sɛŋ ŋí ŋãa su é bú géreŋ sala kula teƃelei zonoŋ su mĩla-ŋai dîa é ŋ̀ãai kpéli pú teƃelei kpîŋ kɔ́ɔ mu.

³¹ É ŋ̀úlɔ kélee kúla yɛ̂ɛ berei a gɛ̀ la a ǹíi-see sala sɛŋ. Ǹyaŋ zâla láa soŋ nuui é géreŋ ŋ̀âla-teƃelei ŋá nyii gáa a kéreŋ sâla-sɛŋ kúŋ nɛ̃ɛ Yâwɛɛ mɛni mai. Bere sîi ŋí su zâla láa soŋ nuui a Eezuɛ nuui ŋí ŋɔsɔnyɔ̂ŋ maa sâla kula. A kɛ̀ tí, ŋɔsɔnyɔŋ su-mɛni a pâi lɛɛ̂i.

³² “À kɛ̀ a ƃála ƃé è pà la a ŋɔsɔnyɔ̂ŋ maa sâla sɛŋ, é kɛ́ a ƃála-sâa nyii pɔ́ɔ fé mai.

³³ É ǹyée pɛ́lɛ zɔnyɔ̂ŋ sala sɛŋ ŋí ŋuŋ ma é báa ƃɛ́i da géreŋ sala kula taa-tulɛi pâa naai.

³⁴ Gɛ̀ ní zâla láa soŋ nuui é ǹyée gbua lɔ́ zɔnyɔ̂ŋ sala sɛŋ ŋí ŋãa su é bú géreŋ sala kula ɣâla-teƃelei mĩla-ŋai dîa, é ŋãai kpéli pú ŋ̀âla-teƃelei kpîŋ kɔ́ɔ mu.

³⁵ Zâla láa soŋ nuui é zɔnyɔ̂ŋ sala sɛŋ ŋí wúlɔ kélee kúla yɛ̂ɛ berei è gɛ̀ la a ǹíi-see salai máa ƃalai é géreŋ ŋ̀âla-teƃelei ŋá a kéreŋ sala Yâwɛɛ mɛni ma. Berei sîi ŋí su zâla láa soŋ nuui a Eezuɛ nuui ŋí ŋɔsɔnyɔ̂ŋ maa sâla kùla. A kɛ̀ tí, ŋɔsɔnyɔ̂ŋ su-mɛni a pâi lɛɛ̂i.”