Levetekɔ 3 - Bible

Dɔ̂ŋ bîlaŋɔɔi laoi-laa maa sâla kuláa mai

¹ À kɛ̀ núu da à kɛ̀ pâi a sama-sɛŋ Yâwɛɛ pɔ́ laoi-laa maa sâla kúla mɛni ma, nyii è gùla ŋɔniŋa-ŋai sámai, zirɛ kpaa záa, é kɛ́ a niŋa nyii pɔ́ɔ fé mai.

² É ǹyée pɛ́lɛ niŋai ŋuŋ ma, é báa Yâwɛɛ ŋɔsua kɔ̂lɔ seɣe pɛrɛi gbôŋ lá. Eelɔŋ ǹônii nyii-ŋai díkaa a zâla láa soŋ-ƃelai dí ŋãa kpɛ́mɛŋ ŋ̀âla-teƃelei kpono ma dí dínaŋ la.

³ Zâla láa soŋ-nuui é ǹaoi-laa sala kula niŋai m̀ɛ́i-ŋai ŋí kula Yâwɛɛ ma a kéreŋ sala, goi sãai ma wûlɔi kélee,

⁴ goi kɔni-kao feerɛi da ŋ̀úlɔi kélee gáa mai da ǹíi pɛɣɛ-pɛɣɛ.

⁵ Zâla láa soŋ-ƃelai dí zãai ŋí kélee kéreŋ da géreŋ sâla-sɛŋ gbéli-ŋai ŋ̀âla-teƃelei ŋá. Gáa a kéreŋ sama-sɛŋ nyii gúŋ lɛ̂lɛɛi Yâwɛɛ mɛni mai.

⁶ À kɛ̀ a ƃála kpaa ƃoli ƃé ƃa a pâi la a sama-sɛŋ Yâwɛɛ pɔ́ laoi-laa sala kula mɛni mai, a kɛ a zirɛ kpaa záa, é kɛ́ a nyíi pɔ́ɔ fé mai.

⁷ À kɛ̀ ŋɔsâla sɛŋ káa a ƃála, é pá la Yâwɛɛ ŋɛ́i-tuɛ,

⁸ é ǹyée pɛ́lɛ ŋuŋ ma, é báa Yâwɛɛ ŋɔsua kɔ̂lɔ seɣe pɛrɛi ŋɛ́i-tuɛ. Zâla láa soŋ-ƃelai dí ŋãa kpɛ́mɛŋ ŋ̀âla-teƃelei kpono ma dí dínaŋ ma.

⁹ Zâla láa soŋ-nuui é ǹaoi-laa sâla kula taa-tulɛi m̀ɛ́i-ŋai ŋí kúla ma Yâwɛɛ mɛni ma a kéreŋ sâla-sɛŋ, ŋ̀úlɔ, ŋ̀óŋ téɛɛ dɔɔ̂i, goi sãa ma wulɔi kélee,

¹⁰ goi kɔni-kao feerɛi da ŋ̀úlɔi kélee gáa mai é pɛ́lɛ ǹíi pɛɣɛ-pɛɣɛi ma.

¹¹ Zâla láa soŋ-nuui é zãai ŋí kéreŋ ŋ̀âla-teƃelei ma. Gáa a mii-sɛŋ sama-sɛŋ Yâwɛɛ mɛni ma.

¹² À kɛ̀ ŋɔsâla sɛŋ káa a ƃoli, é pa la Yâwɛɛ ŋɛ́i-tuɛ,

¹³ é ǹyée pɛ́lɛ ŋuŋ ma, é báa Yâwɛɛ ŋɔsua kɔ̂lɔ seɣe pɛrɛi ŋɛ́i-tuɛ, Eelɔŋ ǹônii dí ŋãa kpɛ́mɛŋ ŋ̀âla-teƃelei kpono ma dí dínaŋ ma.

¹⁴ Zâla láa soŋ-nuui é zâla kula taa-tulɛi m̀ɛ́i-ŋai ŋí kúla Yâwɛɛ mɛni ma a kéreŋ sâla, goi sãai ma wulɔi kélee,

¹⁵ goi kɔni-kao feerɛi da ŋ̀úlɔi kélee gáa mai é pɛ́lɛ ǹíi pɛɣɛ-pɛɣɛi ma.

¹⁶ Zâla láa soŋ-nuui é géreŋ ŋ̀âla-teƃelei ma. Gáa a mii-sɛŋ sama-sɛŋ kéreŋ kûŋ nɛ̃ɛ Yâwɛɛ mɛni ma. Sua wûlɔ kélee káa a Yâwɛɛ pɔ́ɔ.

¹⁷ Eezuɛ lonii kélee da fé sua wûlɔ, kpaa máŋ ŋãa mîi. Mɛnii ŋí káa a wɔlɔ-wɔlɔ tɔ̂ŋ kámɛni ma, ƃɛ́i kélee ká kɛ̂ naâi.