Levetekɔ 25 - Bible

Góraŋ ǹɔ́ɔlu mɛi feerɛi

¹ Yâwɛɛ è m̀o Mose ma Sana Yeei ma a gɛɛ é

² dɔ̂ŋ-ŋai ŋí tɛ́ɛ Eezuɛ-ŋai pɔ́: Ka sèri ǹɔii ma Yâwɛɛ a dɛ̀ɛ kápɔi ka ƃaa kɛ́-maa tɛ́ɛ ǹyaa Yâwɛɛ pɔ́. Káfe kpâlaŋ ŋá tii kɛ̀ ǹɔii ma a góraŋ mɛi feerɛ ɣelei.

³ Ka kákpâlaŋ ŋá tii-ŋai kɛ́ kóraŋ lɔ́ɔlu mɛi da yée mu, ká zí-sãai m̀á kúla ká dípûi kɛ́, ká kási-sɛŋ kpɔlɔi su fála kóraŋ mɛi da yée mu.

⁴ Kɛ́lɛ góraŋ lɔ́ɔlu mɛi feerɛ ɣelei káa a fii-tɔ̂ɔ koraŋ ńyãa Yâwɛɛ ḿɛni ma. Káfe sí-sãa da sì a maa koraŋ tí.

⁵ Zí-sãai nyii-ŋai pâi ƃûu ƃôi ǹɔii ḿa díkpɔɔi yee mai kpaa máŋ m̀á gbɔmɔ-ŋai naa nyii-ŋai káfe dímaa kpɛ̀tɛ níi káfe da ƃá kùla. Góraŋ ŋí káa a ǹɔii fii-tɔɔ koraŋ.

⁶ Berei máŋ káfe pâi kpâlaŋ ŋá tii kɛ̂i la ǹɔii ḿâ góraŋ lɔ́ɔlu mɛi feerɛ ɣelei sui mii-sãa da pâi kɛ̂i naa kámɛni ma, káluɛ-ŋai, kátii kɛ́-ƃelai, ŋ̀ɔ̃ya-ŋai

⁷ da kátaa-tulɛ-ŋai nyii-ŋai ka pâi zɔlɔ ƃôi zí-sãai kpɛtɛi díkpɔɔi yee mai su. Kɛ́lɛ ka zɔlɔ ƃô, káfe da seêi kɛ̀.

Ŋuŋ maa ƃô koraŋ

⁸ Ka kóraŋ lɔ́ɔlu mɛi feerɛ sée gîei lɔ́ɔlu mɛi feerɛ. Gáa a kóraŋ buu náaŋ káo lɔ́ɔlu mɛi náaŋ.

⁹ À kɛ̀ tí, ŋ̀áloŋ ǹɔ́ɔlui mɛi feerɛi ŋɔfóloi buu ɣelei ƃe gáa a Gɛ-zu tɔnɔ Ɣelei. Vóloi ŋí ƃe ká dúrui fɛ́ɛ la ǹɔii sú gwaa kélee ḿa.

¹⁰ Góraŋ buu lɔ́ɔlui káa a kóraŋ maa waa gɛ́ ƃò a ŋuŋ ma ƃo koraŋ núu kélee mɛ̂ni ma. Diai kélee díkɔ̃liŋ kɔ̀lɛ kâai ka dɛ̀ɛ dípɔ pôlu, kpaa máŋ dílônii pɔ́ góraŋ ŋí su. Diai káyêei luɛ-laa sui ká díŋuŋ ḿa ƃó dí lí pôlu dínûai pɔ́ naa.

¹¹ Káfe sí-sãa da sì kpaa máŋ zí-sãai da kpɛ̂tɛ díkpɔɔi yee mai ká da m̀á miî, ká da pûi kɛ́, kpaa máŋ zí-sãai ǹɔɔi su dímaa fé kpɛtɛ níi da m̀á kula.

¹² Góraŋ ŋí káa a lii-nɛ̃ɛ kula kóraŋ maa waa kámɛni ma. Zí-sãai da kpɛ́tɛ díkpɔɔi yee mai dia nɔ́ ƃé ka pɔ̂ri díƃa miî.

¹³ Ǹii-nɛ̃ɛ koraŋ ŋí su, diai kélee díkɔ̃liŋ kɔ̀lɛ kâai ka dɛɛ dípɔ pôlu. Dîa ƃa namela kpîŋ-kpîŋ.

¹⁴ Ka káƃarâai ka mɛni kpɛtɛɛ kɛ̀ a gɛɛ ká sɛŋ da yá díyêei kpaa máŋ kɔ́lɛ dîa, káfe ŋɛi-naɣiŋ mɛi kɛ̀ a maa-ƃelai. Ka kákîe ni soŋ a núu-lâa pere.

¹⁵ Ka kɛ̀ pâi lɔii da kɔlɛ̂i káƃarâŋ da ma kpaa máŋ lɔii da yâi káƃarâŋ da yêei maa lɔii sɔ̃ɔ é kɛ́ a zeríɛɛ zí-sãai maa lɔii a pɔ̂ri gbɛ̂tɛi m̀á sɔ̃ɔ su ǹii-nɛ̃ɛ koraŋ bôlu koraŋ é lɛ́ɛ pâi serîi.

¹⁶ À kɛ̀ kóraŋ támaa káa niî pôlu, gɛ̀ ní ǹɔii sɔ̃ɔ é kɛ́ a dɛ́ɛ ɣelêi, kɛ́lɛ à kɛ̀ góraŋ fé ŋɔ́nɔ tâma ní, gɛ̀ ní ǹɔii sɔ̃ɔ é kɛ́ a doɔ́ɔ mu, kpɛ́ni fêi, zí-sãai ǹɔii a gbɛ̂tɛi díƃa sɔ̃ɔ ƃé da ǹɔii ƃâa tèe ma.

¹⁷ Káfe káƃarâai Eezuɛ-ŋai da fìli. Ka ƃaa kɛ́-maa tɛ́ɛ Káɣâlai Yâwɛɛ pɔ́.

Góraŋ lɔ́ɔlu mɛi feerɛi maa mɛni

¹⁸ M̀ɛni ma, ka ŋátɔ̂ŋ-ŋai mɛi káa ká m̀ɛni-ŋai kɛ́ ŋá m̀o kâai, gɛ̀ ní ka pâi lɛɛ̂i ǹɔii ma ŋá dɛ̀ɛ kápɔi káŋuŋ ma ƃóɔɔ.

¹⁹ Ǹɔii a pâi sí-sãa kpɛtɛ̂i kákɛ m̀ii ká kɛ́ ƃò naa káŋuŋ ma ƃóɔɔ.

²⁰ Ka pâi marê kɛ̂ɛ kɛ̂i kâai, “Lé ƃé kwa pâi kɛ̂i miî góraŋ su kúfe pâi sí-sãa sîi lai?”

²¹ Yâwɛɛ a pâi lûwa lâai ǹɔii ma góraŋ ǹɔ́ɔlu mɛi dai su é sí-sãa támaa kpɛtɛ kôraŋ feerɛ mɛni ma.

²² Ka kɛ̀ tíi kɛ̂i góraŋ mɛi saaƃai su mii-sãa pɔlɔ-ŋai lɛ̂ɛ káyêei góraŋ mɛi dai kpɛɛ ŋái ƃé ka pâi kɛ̂i m̀iî e lɛ́ɛ la zu góraŋ mɛi náaŋ é seri.

Núu kɔ̃liŋ ŋuŋ-ma ƃó mɛni

²³ “Káfe ǹɔii da kɔ̀lɛ núu da ma wɔlɔ-wɔlɔ da wɔlɔ-wɔlɔ mɛni ma, kpɛni fêi, vé a kápɔɔ. Gáa a Ɣâla pɔ́ɔ. Kákaa nɔ́ naa yɛ̂ɛ ŋɔ̃́ya-laa ma.

²⁴ “Núu da a ŋɔlɔii kɔ̂lɛ m̀arâŋ-nuu ma fɛ̂ɛ é kɛ́ a kpɛtɛ mɛni díloai a gɛɛ a pɔ̂ri ŋɔlɔii kpîŋ ŋuŋ ma ƃôi ǹyêei.

²⁵ Káai a Eezuɛ-ŋai káta a kòlo a ŋɔlɔii kɔlɛ m̀arâŋ nuu ma maa nuui ŋɔkáa-laai su-nuui da a pɔ̂ri maa lɔii ŋuŋ ma ƃôi.

²⁶ À kɛ̀ núu da fé naa é gɛ́ mì, a kɔ̀ a sɛŋ-kao sɔlɔ ƃô a gɛɛ é ŋ̀uŋ ma ƃó, a pɔ̂ri gɛ̂i tí.

²⁷ Kɛ́lɛ é lɛ́ɛ pâi gɛ̂i tí, zí-sãa ƃai dí gùla ŋɔlɔii mai é zɔ̃ɔ su see é gúla zu é gbele tɛ́ɛ gba namui pɔ́.

²⁸ Kɛ́lɛ à kɛ̀ gbai è zòŋ va pɔ̂ri dêei, gɛ̀ ní ǹɔii é lɛ́ɛ ǹúui ǹyêei ǹyai ŋuŋ ma ƃô koraŋ é seri.

²⁹ “Daa-lêe maa kónaŋɔɔ a seɣãŋ su nuu da a ŋɔpɛ́rɛi kɔlɛ núu da ma ŋuŋ ma ƃô káa ǹyêei é ǹyá pôlu ǹúui yêei è gɔlɛ ma góraŋ maa-ŋuŋ su.

³⁰ Kɛ́lɛ à wàla pɔ̂ri ǹyâi pôlu a maa kôraŋ tí, gɛ̀ ní va ŋɔ́nɔ ǹyá pôlu. Ǹúui ǹya ǹyêei a lɛ̀ɛ ǹyêei a gɔ̃liŋ da ǹônii.

³¹ Kɛ́lɛ bɛ́rɛ-ŋai ɣéne ŋá pere gbanâŋ-ŋai lái da ǹamu a gɔlɛ núu da ma a pɔ̂ri ǹyâi pôlu ǹúui yêei è gɔ̀lɛ mai maa nuui é dɛ́ɛ bɔ́ pôlu a ŋuŋ ma ƃo koraŋ.

³² É máŋ kɛ́ tí Liiva nuu da ŋɔpɛ́rɛ a kɛ̀ ziɣãŋ da su a gɔlɛ núu da ma ŋuŋ ma ƃô káa Liiva nuui yêei a tãi kélee é ŋɔpɛ́rɛi yá pôlu ǹúui yêei è gɔ̀lɛ mai.

³³ À kɛ̀ bɛ́rɛ-ŋai daa lêe-ŋai ŋí sui Liiva nuu da a da kɔlɛ núu da ḿâ à wàla pɔ̂ri ǹyâi pôlu maa nuui yêei fɛ̂ɛ ǹúui kpîŋ é Liiva nuui ŋɔpɛ́rɛi tɛ́ɛ bɔ́ pôlu a ŋuŋ ma ƃo koraŋ, kpɛni fêi, bɛ́rɛ-ŋai daa-lee-ŋai sui gáa a Liiva-ŋai pɔ́ɔ Eezuɛ-ŋai sáma wɔlɔ-wɔlɔ da wɔlɔ-wɔlɔ.

³⁴ Ǹɔii kpuai Liiva-ŋai dítaa lêe-ŋai kɔlɛ mai, núu da fé da kɔ̀lɛ. Díkɔ̃liŋ ká tí wɔlɔ-wɔlɔ da wɔlɔ-wɔlɔ.

Kpa piliɛɛ gôlo-ƃelai dîa mɛni

³⁵ “Káai a Eezuɛ-ŋai káta a kòlo va pɔ̂ri gbîŋ mu ka kpɔŋ m̀a ká tûa la a ǹɛ́lɛɛ yɛ̂ɛ berei fɛ̂ɛ ká ŋ̀ɔ̃ya kpaa máŋ ǹɔii ŋuŋ da kpɛni su-ƃela sóŋ la kásamai a gɛɛ ǹyaa máŋ a pɔ̂ri ŋɔɣeniɛi kɛ̂i a ǹɛ́lɛɛ kákɔlɛ ma.

³⁶ Zɛŋ ka dɛ̀ɛ bɔ́i káfe gêni làa ma, kɛ́lɛ ka Ɣâla wóo mɛni a gɛɛ káƃarâŋ Eezuɛ-nuui é kɛ́ kákɔlɛ lii-see su.

³⁷ Mii-sɛŋ kpaa zɛŋ-kaoi ka dɛ̀ɛ bɔ́i káfe gêni làa da ma.

³⁸ Ńyãa ƃa Káɣâlai Yâwɛɛ. Ŋá kákùla Ize lɔii su ŋá pá a káa a gɛɛ ŋá Keena lɔii tɛ́ɛ kápɔ ŋá kɛ́ a Káɣâla.

Luɛ ŋuŋ ma ƃó mɛni

³⁹ “Káai a Eezuɛ-ŋai káta a kòlo a gbîŋ tɛ̀ɛ káta pɔ́ a luɛ sɛŋ mɛni ma káfe gɛ̀ maa nuui é tíi kɛ́ kâa yɛ̂ɛ luɛ.

⁴⁰ É kɛ́ káyêei yɛ̂ɛ kátii kɛ́-nuui da é lɛ́ɛ la zu ŋ̀uŋ ma ƃô koraŋ é seri.

⁴¹ Ŋ̀uŋ ma ƃo koraŋ a seri, ka dɛ̀ɛ pôlu bɔ́-naa da ǹônii dí lí ŋɔnûai kɔ̃liŋ mɛi dínûai pɔ́ naa,

⁴² kpɛni fêi, díkaa a ŋátii kɛ́-ƃela. Ńyãa ƃe díkùla Ize lɔii su. Núu da fé da kɔ̀lɛ.

⁴³ Káfe dísòŋ a ǹyɔ́mɔɔ, kɛ́lɛ ka yao Ńyãa Ɣâla ma.

⁴⁴ Kà kɛ̀ ŋ́wɛ̂lii a luɛ-ŋa ka díya kákɔlɛ ma lɔii-ŋai su.

⁴⁵ Ŋ̀ɔ̃ya-ŋai kásamai ka pɔ̂ri máŋ da-ŋa dílônii yâi díkɛ ƃò a káluɛ-ŋa dílônii dí ƃò a kákɔ̃liŋ-ŋa.

⁴⁶ Ka sàa da lɛ̀ɛ naa a kálônii dítii kɛ́-ƃela tãi nɔ̂ díkaa la ɣele mai. Kɛ́lɛ káfe káƃarâŋ Eezuɛ nuui da sòŋ a ǹyɔ́mɔɔ.

⁴⁷ “Ŋ̀ɔ̃ya-ŋai kásamai da a tɔ̀ɔ Eezuɛ-nuui da koloɔɔ é gbîŋ kɔlɛ ŋ̀ɔ̃yai kpîŋ ma kpaa máŋ ŋ̀ɔ̃yai tí ŋɔkáa-yɔɔ da ma,

⁴⁸ ŋuŋ ma ƃo káa Eezuɛ nuui tí yêei é gbîŋ maa tée ŋ̀ɔ̃yai yêei.

⁴⁹ Pɔri mâa à wàla niî kɛ́ ǹyêei, gêra a pɔ̂ri ǹyâi pôlu ŋ̀ɔ̃yai yêei kpaa máŋ m̀arêŋ kpaa máŋ ŋɔkáa-yɔɔ-ŋai da kpaa máŋ ǹyée a kùla naa pôlu ma a pɔ̂ri gbîŋ ŋuŋ ma ƃôi.

⁵⁰ Nyíŋi pôlu ma, fɛ̂ɛ góraŋ a lɛɛ ŋ̀uŋ ma ƃô koraŋ é lɛ́ɛ serîi da ǹúui è gbîŋ kɔlɛ mai dí zu see yɛ̂ɛ berei ǹûui kpîŋ a ŋɔtíi kɛ́-ƃelai fela-fè lai é maa sɛŋ-kaoi tɛ́ɛ maa nuui pɔ́.

⁵¹ À kɛ̀ kóraŋ támaa kâa niî pôlu a pâi maa sɛŋ-kaoi kpɛɛ̂i.

⁵² À kɛ̀ góraŋ fé ŋɔ́nɔ táma ní a pâi zɛŋ-kaoi kpɛɛ̂i yɛ̂ɛ berei díi maa nɛ̃ɛ̂i é gɛ́ góraŋ kpɛ́-kpɛɛ tí yée mui gɛ́ nuu fela-fei

⁵³ kóraŋ tɔnɔ mɛni ma. M̀ɛi nuui fé zoŋ a ǹyɔ́mɔɔ.

⁵⁴ À kɛ̀ ŋ̀uŋ ma fé ƃó ní bere sîi ŋí da su, fɛ̂ɛ m̀ɛi nuui é ŋ̀uŋ ma ƃó da ǹônii ŋ̀uŋ ma koraŋ su.

⁵⁵ Eezuɛ-ŋai da fé kɛ̀ luɛ-lâai wɔ́lɔ-wɔlɔ da wɔlɔ-wɔlɔ, kpɛni fêi, díkaa a ḿbɔɔ. Ŋá díkùla Ize lɔii su. Ńyãa ƃa Díɣâlai Yâwɛɛ.”